Esai 23 - Sră Goh 2018

Jơnau đơs hwơr bơh Tirơ

¹ Jơnau đơs hwơr bơh Tirơ: Ơ ală ơhò Tarsi, ñìm rac tĕ! Tài bơh Tirơ neh kong tơnroh, ò gam hìu tum hala gùng lòt! Tòm tŭ bol khai tus bơh Kittim, bol khai neh git bơh jơnau yal hơ̆.

² Ơm mŏ mŏ tĕ, bol mê la làng bol ơm rò gah dàlềng; Ơ ală cau kă bro Sidôn dê, la cau kong sồr tiă dàlềng pơdiang bềng ală phan mơna.

³ Mơ neh pơdiang hơđang gùng dàlềng hòr pràn, bol mê tơrgòm prap gar sơntìl Sihor dê, tòm kơnhai toès bơh hiòng Nil dê; bol mê la ală cau kă bro ală lơgar dê.

⁴ Ơ Sidôn, lơh ƀàssìl tĕ! Bơh dàlềng neh đơs, tiah kơp gàr dàlềng dê đơs be do: “Añ ò tŭ lơi jê deh hala deh kòn; Añ ò tŭ lơi ròng kòn klau hala ròng kòn ùr.”

⁵ Tòm tŭ jơnau hơ̆ pơnro tus Ejiptơ, bol khai rơp jê sồt ngan kơno jơnau yal bơh Tirơ.

⁶ Tiă tĕ tus hơ Tarsi; ñìm rac tĕ, ơ làng bol ơm rò gah dàlềng.

⁷ Ngan sơl do la ƀòn dờng chò hòp bol mê dê, La ƀòn dờng bơh rài yut rài yau, mơ jơng ală cau neh cèng khai tus ơm tòm tiah ngài ò ơ?

⁸ Ñcau neh lơh nền bơta hơ̆ tòmdră mơ Tirơ taih? Gơ la ƀòn dờng neh ndau sơgơn bơtau, cau kă bro gơ dê la ală kòn cau bơtau, cau blơi rwat gơ la cau tiơng pơnro tòm plai ù.

⁹ Yàng Jehôwa Gơnap Gơnoar Dờng neh lơh nền bơta hơ̆ nàng tơmù bơta pơnhừ să jơh ală bơta gơklŏ dê, mơ lơh ƀàssìl jơh ală cau dờng ryŭ tòm dunnia.

¹⁰ Ơ ală ơhò Tarsi dê, tiă tĕ tus di ù tiah tòm ai dê, Be tiah hiòng Nil hòr mù; tềng do dô nơm rnơs ò gam tai.

¹¹ Yàng Jehôwa neh pò tơlik tê Kơnràñ dê hơđang dàlềng, Kơnràñ rơnggô ală lơgar bơtau dê. Kơnràñ neh ai gơnoar sồr bơh Kanaan nàng tơnroh ală tiah kơp gàr gơ dê.

¹² Kơnràñ neh đơs lah: “Ơ Kòn ơruh dềt Sidôn dê la ală cau kong rồn bơklơn, ai rơp ò gam hòn chò tai. Guh tĕ, tiă tus hơ Kittim, bulah tềng hơ̆ ai kung rơp ò geh rlô.”

¹³ Sền tĕ lơgar Babilôn, do la dô nơm làng bol do ò di la cau Asiri. Bol khai neh lòi is tiah Tirơ dê gơlik gơs tiah ală phan brê in ơm; bol khai bơt bơtào ală theng nàng gơrwàng, bol khai phà tơrlah ală gơlang gơ dê, lơh gơ in gơlik gơs dô gơnru lề lac.

¹⁴ Ơ ală ơhò Tarsi dê, ñìm rac tĕ! Bơh theng kơp gàr bol mê dê neh kòl tơnroh rau.

¹⁵ Bơh tŭ hơ̆, Tirơ rơp kòl lòi hŭi tòm poh jơt nam, la dô rài cau bơtau. Tòm tŭ lồi dut poh jơt nam rau, Tirơ rơp gơlik gơs tòm toh be bơta đơs chò cau ùr dri dê:

¹⁶ “Ơ cau ùr dri neh kòl lòi hŭi ne, ai tĕ kơñi rơs, lòt làm ƀòn dờng! Rơs kơñi sap bơkah tồr, đơs chò tĕ oă bơta đơs chò Nàng cau in kah wơl ai.”

¹⁷ Tòm tŭ neh lồi poh jơt nam rau, Yàng Jehôwa rơp còp Tirơ. Khai rơp lơh wơl broă khai dê, mơ khai rơp lơh dri tơlàr mơ jơh ală lơgar bơtau tòm dunnia hơđang ù.

¹⁸ Mơya ală phan kă bro mơ jền tơngai khai dê rơp geh ơn Yàng Jehôwa in, cồng nha gơ rơp ò geh prap lòi tòm đam. Mơya phan mơna khai geh rơp ai ală cau ơm di đap Yàng Jehôwa nàng bol khai geh tơngkah tơngkañ phan sa mơ phan soh.