Esai 21 - Sră Goh 2018

Jơnau đơs hwơr tòmdră mơ Babilôn

¹ Jơnau đơs hwơr bơh Ƀlàng ngềt ngơt di gah dàlềng: Be càl wàl bong khồm pơs tòm Negep, gơ tus bơh ƀlàng bràs, bơh dô nơm lơgar rngòt rngơt,

² Dô bơta gơtơnggŏ kràñ cê neh yal añ in: Cau pơrlơ̆ dră gam pơrlơ̆ dră, mơ cau tơnroh gam tơnroh. Ơ Elam, guh tĕ! Ơ Medi, gơrwàng tĕ! Jơh ală jơnau rac ròc khai neh lơh gơs, Añ rơp cèng bơta lồi dut.

³ Gen tàng but añ jê sồt ngan, ală bơta jê neh gơrwàng añ, kung be bơta jê deh cau ùr dê; añ kun tơmù gen tàng añ ò rgơi kơno, Añ rngòt rngơt gen tàng añ ò rgơi gŏ!

⁴ Nùs añ ò suk ơm, bơta rngòt lơh añ in dơrcul; rìng àng drim mơ añ kơp gơn neh gơlik gơs bơta rngòt rơm să añ in.

⁵ Bol khai rcang yò sa dờng, bol khai lă ală bềl, bol khai sa, bol khai ñô! Ơ ală cau kwang at bồ, guh tĕ! Bong mơñà tĕ di ală khèl!

⁶ Yàng Jehôwa đơs mơ añ be do: “Lòt tĕ, ơn cau kơp gàr, lòi khai yal bơta lơi khai gŏ.

⁷ Tòm tŭ khai gŏ cau hào ơseh lòt mơ yô mơ yô, ală cau hào alàng, ală cau hào làkđa, lòi tĕ khai iat nền nền, ơn nùs nền ngan.”

⁸ Mơ cau kơp gàr driau dờng lah: “Ơ Yàng, añ ntào hơđang theng kơp gàr sùm kòp ngai, kòp mang añ ntào tòm tiah añ jê.

⁹ Sền ne, gơs cau ling hào ơseh tus, cau hào ơseh mơ yô mơ yô! Khai ho lah: ‘Babilôn neh tơrlơm rau, neh tơrlơm rau! Jơh ală rùp ràk yàng gơ dê, bic bơcah lề hơđang ù tiah!’”

¹⁰ Ơ cau neh kong pơrjòt mơ cau tòmpơr kòi tòm làn añ jê, bơta añ neh kơno bơh Yàng Jehôwa Gơnap Gơnoar Dờng, la Yàng Tom Trồ Israel dê, añ neh yal tơnggit bol mê in rau.

Jơnau đơs hwơr tòmdră mơ Duma

¹¹ Dô jơnau đơs hwơr bơh Duma: Gơs cau bơh Seirơ hòi añ mơ đơs lah: “Ơ cau ling kơp gàr, mang ti mbe lơi? Ơ cau kơp gàr, mang ti mbe lơi taih?”

¹² Cau kơp gàr ho lah: “Àng drim tus, mơ mang kung tus. Dilah mê kòñ lùp gen lùp tĕ; rê wơl tai.”

Jơnau đơs hwơr tòmdră mơ Arabi

¹³ Jơnau đơs hwơr bơh Arabi: Ơ mpồl cau lòt kă bro Dedan dê, tòm rlau chi tòm tiah ring ƀlàng bràs dê bol mê rơp bic rlô.

¹⁴ Ơ bol mê la cau ơm tòm Thema, cèng tĕ dà ală cau tơhìr in; cèng tĕ phan sa ală cau dô kơlìn in;

¹⁵ Bơh bol khai neh dô bơh đào, dô bơh đào rlai, dô bơh àtak neh wàr, mơ dô bơh bơta tòmlơh dờng.

¹⁶ Do la jơnau Yàng Jehôwa neh đơs mơ añ: “Tòm dô nam tai, jat be nam ală cau lơh ơpah, bơta gơklŏ Keda dê rơp lồi.

¹⁷ Ală cau pañ àtak gam wơl cau Keđa dê mìng dô êt lơm.” Yàng Jehôwa la Yàng Tom Trồ Israel dê neh đơs behơ̆.