Esai 20 - Sră Goh 2018

Jơnau đơs hwơr tòmdră mơ Ejiptơ mơ Kus

¹ Tòm nam mơ Sargôn, bơtau Asiri, sồr cau kwang dờng at bồ ling tus Asdôk, tòmlơh mơ tòmpìt ai gơ,

² tòm tŭ hơ̆, Yàng Jehôwa kơnòm di Esai, kòn klau Amôs, mơ đơs lah: “Hồ tĕ ƀào sơnò kiat bơh di să mê, mơ gơltau jă bơh di jơng mê.” Esai lơh jat, lòt gùt dar să kuh mơ jơng gòi.

³ Gen Yàng Jehôwa đơs lah: “Kung be cau duh broă Añ jê la Esai neh lòt să kuh mơ jơng gòi tòm pe nam, lơh tềl sơnio lài bơh Ejiptơ mơ Kus,

⁴ behơ̆ bơtau Asiri kung rơp kup dĭ cau Ejiptơ mơ kup cèng cau Kus lòt hơ lơgar ngài sơl, jơh ală cau pơnu mơ cau kra, lòi rồ mơ lòt nàng lơh ƀàssìl Ejiptơ.

⁵ Mơ bol khai rơp rngòt rngơt mơ roh gơn kơnòm tài bơh bol khai gơn kơnòm di Ethiôpi mơ jòng să bơh Ejiptơ.

⁶ Tòm ngai hơ̆, làng bol ơm rềp di gah dàlềng do rơp đơs lah: ‘Sền ne la bơta neh gơlik gơs di làng bol mơ bol he neh ơn nùs gơn kơnòm, di làng bol mơ bol he neh ràn tus mơ dan dong kòl mơ dong tă bơh di bơtau Asiri! Mơ bol he, mbe bol he geh klàs taih?’”