Esai 2 - Sră Goh 2018

Jơnau đơs hwơr bơh Juda mơ Jerusalem ( 2:1 – 12:6 ) Mơnơm Yàng Jehôwa dê

¹ Do la ală bơta mơ Esai, kòn klau Amôs dê, neh gŏ bơh Juda mơ Jerusalem:

² Tòm ală ngai rơp tus, mơnơm hìu duh khoai Yàng Jehôwa dê rơp geh bơt bơtào jơnhoa hơđang rlau jơh ală mơnơm; gơ rơp geh tơngguh jòng rlau mơ ală dòr, mơ jơh ală làng bol rơp lòt kung be dà hòr tus tềng hơ̆,

³ Oă làng bol rơp tus mơ đơs lah: “Tus tĕ, bol he guh lă hơđang mơnơm Yàng Jehôwa dê, tus hơ hìu Yàng Tom Trồ Jakôp dê; Kơnràñ rơp bơto bol he in gùng dà Kơnràñ dê, tồ bol he rgơi lòt tòm ală gùng Kơnràñ dê.” Bơh bơta boh lam rơp lik bơh Siôn, jơnau đơs Yàng Jehôwa dê rơp lik bơh Jerusalem.

⁴ Kơnràñ rơp cahrña digùl ală làng bol mơ rơp pơnring bơta tòmyă digùl oă làng bol, bol khai rơp ai đào bol khai dê mơ tiar gơs sề ngal, mơ ai tà bol khai dê tiar gơs mơ̆. Làng bol do rơp ò tă đào tòmlơh mơ làng bol ne, bol khai rơp ò gam bơto bơta tòmlơh tai.

Bơta cahrña tòmdră mơ cau pơnhừ să

⁵ Ơ hìu Jakôp, tus tĕ, bol he cơnđòa lòt tĕ tòm bơta àng Yàng Jehôwa dê.

⁶ Yàng neh sang lòi làng bol Kơnràñ dê la hìu Jakôp, lơgar bềng lìu ală bơta juh proh bơh đah mattơngai lik, òs sền dà kung be cau Philistin, mơ at tê tòmsòr bal mơ ală cau làng bol bơdìh.

⁷ Lơgar bol khai dê gơs bềng lìu màh mơ priă, phan mơna bol khai dê tơngkah tơngkañ. Lơgar bol khai dê gơs oă ngan ală ơseh, rơndeh lòs tòmlơh bol khai dê ò rgơi kòp.

⁸ Lơgar bol khai dê gơs bềng lìu ală rùp ràk, bol khai cùn khoai ală phan tê bol khai neh lơh, phan mơ ràs tê bol khai dê neh mòn gơs.

⁹ Behơ̆ kòn mơnus rơp kong tơnliah; bañ toh glài bol khai, ơ Yàng!

¹⁰ Mut tĕ tòm ală trồm pơnai lŭ klềr, hala pồn tòm trồm tòm ù nàng pleh klàs bơh di bơta rngòt rngơt Yàng Jehôwa dê, mơ bơh bơta gơklŏ ryŭ ryơm Kơnràñ dê!

¹¹ Gar mat pơnhừ să làng bol dê rơp kong tơnliah, mơ bơta jòng să kòp nă cau dê rơp kòl tơmù; mìng Yàng Jehôwa rơp geh yò tơngguh hơđang, tòm ngai hơ̆.

¹² Bơh Yàng Jehôwa Gơnap Gơnoar Dờng gơs dô ngai, tòmdră mơ jơh ală cau pơnhừ să mơ ală cau jòng să, mơ tòmdră mơ jơh ală cau yò tơngguh is să he;

¹³ Kơnràñ tòmdră mơ jơh ală chi pơnàng tòm Liban, ală chi jòng jơnhoa mơ pơnhừ să, jơh ală chi nho rề tòm lơgar Basan,

¹⁴ Kơnràñ tòmdră mơ jơh ală mơnơm jơnhoa, mơ ală dòr jơnhoa rlau jơh;

¹⁵ jơh ală theng jơnhoa, mơ kòp nơm dơrñang kơ̆ cê.

¹⁶ Kơnràñ rơp tòmdră mơ ală ơhò dờng Tarsi dê, mơ tòmdră mơ jơh ală ơhò màng ryŭ.

¹⁷ Bơta pơnhừ să kòn mơnus dê rơp kong tơmù, mơ bơta jòng să ală cau dê rơp kong tơnliah; lòi mìng Yàng Jehôwa lơm rơp geh yò tơngguh tòm ngai hơ̆.

¹⁸ Ală rùp ràk rơp kòl roh thit jơh hir.

¹⁹ Mut tĕ tòm ală rgồng lŭ, mơ tòm ală trồm tòm ù nàng pleh klàs bơh di bơta rngòt rngơt Yàng Jehôwa dê, mơ bơh bơta gơklŏ mơ ryŭ ryơm Kơnràñ dê, tòm tŭ Kơnràñ guh nàng lơh rngòt rngơt plai ù.

²⁰ Tòm ngai hơ̆, cau rơp sang sơrbì ală đe in mơ ală rềt in ală rùp ràk mơ priă mơ màh mơ bol khai neh lơh gơs nàng duh khoai.

²¹ Bol khai rơp dô pồn tòm ală trồm lŭ, tòm ală rgồng lŭ ală cìr, nàng pleh klàs bơh bơta rngòt rngơt Yàng Jehôwa dê, mơ bơh di bơta gơklŏ mơ ryŭ ryơm Kơnràñ dê, tòm tŭ Kơnràñ guh nàng lơh rngòt rngơt tòm plai ù.

²² Bañ kơnòm di kòn mơnus, la jơi mìng gơs nhơm tă tòm trồm muh; bol khai gơs bơta kwơ màng kàr lơi taih?