Esai 18 - Sră Goh 2018

Jơnau đơs hwơr tòmdră mơ cau Ethiôpi

¹ Bòl glar ù tiah tàp pơnđar in đah ne ală hiòng Ethiôpi dê,

² mê sồr cau ala mat bơh di hiòng Nil, hào plung lơh mơ proh hơđang dàlềng. Ơ bol mê la ală cau kong sồr sơrbac sơrbang ne, lòt tĕ tus hơ dô nơm làng bol jơnhoa mơ gơltau àng gơcrà, tus hơ dô làng bol rngòt tiah ngài mơ rềp, tus hơ dô nơm lơgar pràn kơldang mơ tòmpìt sơmbrơt, la ù tiah tòmcah bơh ală hiòng dà.

³ Ơ jơh ală làng bol tòm lơgar dunnia, la cau ơm hơđang plai ù, Tòm tŭ bồng bi yò tơngguh hơđang mơnơm, Sền tĕ! Tòm tŭ kơlwòk neh uh, Iat tĕ!”

⁴ Bơh do la jơnau Yàng Jehôwa đơs mơ añ: “Añ rơp ơm mŏ mŏ mơ sền bơh di tiah Añ ơm, kung be bơta duh mattơngai pơnđàng, be mhwal dà tŭ bơta duh kơnhai toès dê.

⁵ Bơh lài mơ kơnhai toès, tòm tŭ bơkào neh jơh, mơ bơkào gơlik dô dơrkum plai ño dum, Kơnràñ rơp ngui pềs koh nàng koh ală cat sơmbut, koh sang ală ntê oă nha.

⁶ Bol khai jơh tơl nă rơp kong sang lòi ală sềm sa poac tòm mơnơm, mơ ală jơi phan poan jơng tòm brê in; ală sềm rơp sa bol khai tòm jơh kơnhai prang, mơ ală jơi phan poan jơng tòm ù rơp sa bol khai tòm jơh kơnhai noat mrềt.”

⁷ Tòm tŭ hơ̆ phan pà rơp geh cèng ơn Yàng Jehôwa Gơnap Gơnoar Dờng in bơh dô nơm làng bol să jơnhoa gơltau àng gơcrà, dô nơm làng bol pal rngòt bơh tòm tiah ngài mơ tiah rềp, dô nơm làng bol jak tòmpìt sơmbrơt pràn kơldang, dô nơm lơgar ù tiah tòmcah bơh ală hiòng dà, tus hơ mơnơm Siôn la tiah gơrê mơ sơnđan Yàng Jehôwa Gơnap Gơnoar Dờng dê.