Esai 17 - Sră Goh 2018

Jơnau đơs hwơr tòmdră mơ Damas

¹ Do la dô jơnau đơs hwơr bơh Damas: “Do, Damas rơp ò gam geh kòp la dô nơm ƀòn dờng, mơ rơp gơlik gơs dô gơnru tơrlah tơrlơm.

² Ală ƀòn dờng Arôe dê kòl sang lòi ngềt ngơt jơl sùm sùm, rơp lơh gơs tiah mpồl belàt in ơm bic rlô, ò gơs cau lơi rơp lơh bol gơ in rngòt.

³ Tiah kơp gàr kơ̆ cê rơp roh thit bơh di Epraim, mơ lơgar bơtau ò gam tai, bơh di Damas; làng bol gam wơl Aram dê rơp kung be bơta gơklŏ kòn sau Israel dê,” Yàng Jehôwa Gơnap Gơnoar Dờng đơs behơ̆.

⁴ “Tòm ngai hơ̆, bơta gơklŏ Jakôp dê rơp gơhuc, dơngi tòm poac să khai dê rơp gơ mù.

⁵ Gơ rơp gơlik gơs kung be tòm tŭ cau toès kòi tơrgòm ală sơnyùr kòi, mơ ai tê toès sơnyùr kòi; mơ kung be tòm tŭ dô nă cau dòñ kòi tòm thòng Rephaim.

⁶ Bulah behơ̆ dô pơnah kòi rơp gam wơl òhềt dòñ, kung be chi ôlibe tòm tŭ cau pù ntê gơ nàng ai plai, gam wơl bàr pe nai hơđang ntê jơnhoa ngan, mơ poan hala pram nai hơđang ntê oă plai.” Jehôwa Yàng Tom Trồ Israel dê đơs behơ̆.

⁷ “Tòm ngai hơ̆, cau rơp rmê sền di Bơtau Crơng Gơs he, mơ wèt mat tơnggòr di Bơtau Sàng Goh Israel dê.

⁸ Bol khai rơp ò sền di ală cơnòng duh khoai, la broă lơh tê bol khai dê; bol khai ò rmê di ală jrong duh khoai rùp ràk Asera dê, mơ ală cơnòng chu kơlhô mơ ràs tê bol khai neh lơh gơs.

⁹ Tòm ngai hơ̆, ală ƀòn dờng kơ̆ cê bol khai dê rơp kung be ală tiah sang lòi ngềt ngơt tòm brê hala hơđang mơnơm. Hơ̆ la ală tiah neh gơkòl sang lòi di đap kòn sau Israel dê; hơ̆ la tiah srau gòi.

¹⁰ Bơh bol mê neh hŭi Yàng Tom Trồ Bơtau Dong Klàs bol mê dê, ò kah Pơnai Lŭ Kìng Crŭ mê dê. Gen tàng bulah bol mê tam ală chi niam rlau jơh, mơ tam ală tòm ño cèng tus bơh lơgar ndai,

¹¹ bulah bol mê lơh gơ in hòn, tòm ngai bol mê tam gơ, mơ lơh gơ in cat sơmbut, tòm àng drim bol mê neh sih gơ; rơp ò gơs dô nơm plai lơi tòm kơnhai pic plai, mơya tòm ngai moat jrùng mơ jê sồt ò rgơi geh sơmbòi.

¹² Ơ hơh! Ală làng bol gal lơh nggồr nggàc ngan, gơ ntơr kung be dàlềng nggồr! Ơ hơh! Ală lơgar driau dờng nggồr nggàc ngan, bol khai driau nggà kung be ală dà hòr pràn!

¹³ Bulah ală làng bol lơh nggồr nggàc kung be bơta nggồr nggàc ală dà jrài dê, mơya Kơnràñ lah pơrhơng bol khai gen bol khai dô ngài, kòl càl pơrdô kung be nsiap kòi hơđang mơnơm, kung be dô puk thul ơmul càl rbut khồm.

¹⁴ Tòm trồ mho, nisơna gơs bơta rngòt rngơt! Lài mơ tŭ rìng àng drim, bol khai neh ò gam tai! Hơ̆ la pơnah ală cau phà kơñau bol he, la pơnah lơh nền lòi ală cau tòmpìt sơmbrơt bol he.