Esai 15 - Sră Goh 2018

Jơnau đơs hwơr tòmdră mơ Môap

¹ Jơnau đơs hwơr bơh Môap: Tài bơh Ar neh tơrlah tơrling tòm dô mang, Môap òhềt bơt sir! Tài bơh Kir neh tơrlah tơrlơm tòm dô mang, Môap òhềt bơt sir!

² Cau Dibôn lòt tus hơ bơmồng nàng duh khoai, guh hơđang ală tiah jơnhoa nàng ñìm. Cau Môap ñìm rac pơt wòl bơh Debô mơ Medeba. Kòp nơm bồ neh kơlờl, mơ kòp nơm sơnò tềp neh koah.

³ Bol khai soh ào dur lòt tòm ală gùng, hơđang rkàng hìu mơ tòm ală hìu dờng, jơh tơl nă ñìm rac, lề lac tòm dà mat.

⁴ Hesbôn mơ Eleale nggà ñìm, sap bol khai kơno tus hơ Jahas. Gen tàng ală but Môap dê gơ ơwañ, hwềng nùs bol khai gơrơm.

⁵ Nùs añ ñìm rac bơh Môap; cau ntoat dô pleh khai dê tus hơ Joar, mơ tus hơ Eglat Selisia. Bơh tòm gùng guh tus hơ Luhit, bol khai guh ndang ñìm ndang, tòm gùng hơ Hôrônaim, bol khai ñìm rac ròc bơh bơta tơnroh.

⁶ Ală dà tòm Nimrim neh soat jơh, ñhơt neh ro, ñhơt bơnung ò gam tai, ò gam chi tơlir tai.

⁷ Gen tàng ală phan mơna jòi geh, mơ phan màng neh prap lòi, bol khai ai cèng pơrdô jơh tiă gan thòng chi nrài dà.

⁸ Bơh dô jơnau ñìm ngkè neh mpong gùt dar ù tiah Môap; jơnau ñìm rac bol khai kơno tus di Eglaim, jơnau pơt wòl bol khai dê kơno tus hơ Beer Elim.

⁹ Bơh dà hiòng Dimôn gơs bềng mhàm, mơ Añ rơp cèng bơtơl tai hơđang Dimôn, Ală cau Môap dô klàs bơh dô nơm klìu triă, bơh ală cau gam wơl tòm lơgar.