Esai 1 - Sră Goh 2018

Jơnau wàs gùng ( 1:1-31 )

¹ Tòm rài at bồ ală cau bơtau Ôsia, Jôtham, Aca mơ Ejekia la ală cau bơtau lơgar Juda dê, gen Esai kòn klau Amôs gơs bơta gơtơnggŏ bơh lơgar Juda mơ ƀòn dờng Jerusalem.

Bơta iơh bơsak làng bol Juda dê

² Ơ ală tap trồ, iat tĕ! Ơ ù, ơn tồr iat tĕ! Bơh Yàng Jehôwa neh đơs lah: “Añ neh ròng siam kòn sau mơ lơh bol khai in dờng, mơya bol khai bơtào tòmdră wơl mơ Añ.

³ Kơnrồ git cau tòm gơ dê, alàng git bòng ñhơt cau tòm gơ dê, mơya Israel gen ò git, làng bol Añ jê ò git wă.”

⁴ Ơ hơh! Lơgar lơi gơs bềng tồi glài, làng bol àñ kơnjơ̆ bơta tồi glài iơh bơsak, jơi bơtiàn lơh bơta iơh bơsak, ală kòn sau gơlềng gơlàng ne! Bol khai neh sang lòi Yàng Jehôwa, sền òsơp di Bơtau Sàng Goh Israel dê, bol khai neh gơlik be cau crih mat ngan.

⁵ Ñchi bơh tài bol mê jòi bơta pù ơlih rlau tai taih? Ñchi bơh tài bol mê kư̆ gam tòmdră sùm taih? Jơh dô nơm bồ kòp jê, jơh dô nơm nùs jê sồt.

⁶ Bơh kơndòl jơng jơl tus di bồ, ò gơs tiah lơi gam niam, mìng gơs tềl sồt, tềl brơp, mơ tềl sồt mhàm ur pù lơh, òhềt rañ, hala pồt sơm, hala bong mơñà nàng geh rài bơta jê sồt.

⁷ Lơgar bol mê dê kong sang lòi ngềt ngơt, ală ƀòn dờng bol mê dê kong chu mơ ồs; di đap mat bol mê cau lơgar bơdìh tòmpìt ù tiah bol mê dê, gơkòl sang lòi ngềt ngơt be tòm tŭ ală cau làng bol bơdìh lơh gơprah gơpring.

⁸ Kòn ùr Siôn dê kòl sang lòi be dô nơm sàl tòm suơn ño, be dô nơm rnŭ tòm suơn ño, mơ be dô nơm tiah kìng crŭ tòm suơn rpung, be dô nơm ƀòn dờng kòl gơrwàng.

⁹ Dilah Yàng Jehôwa Gơnap Gơnoar Dờng Làm Jơh ò lòi wơl bol he in dô êt nă cau gam kis, gen bol he rơp gơlik gơs be Sôdôm, mơ tòm toh be Gômôrơ.

¹⁰ Iat tĕ jơnau Yàng Jehôwa dê; Ơ bol mê la ală cau kwang Sôdôm dê; Iat tĕ jơnau bơto sồr Yàng Tom Trồ bol he dê; Ơ làng bol Gômôrơ dê!

¹¹ Yàng Jehôwa đơs: “Ñchi kwơ Añ in rbô rhiang phan ơn duh khoai bol mê dê taih? Añ neh dil bơh ală phan ơn chu pơrguc belàt dam dê, mơ dơngi ală phan poan jơng lơmă; Añ ò niam nùs di mhàm kơnrồ dam, belàt kòn mơ be dam.

¹² Tòm tŭ bol mê tus tơlik mat di đap Añ, Ñcau lùp ală phan do bơh tê bol mê? Bañ jă trơm ƀlàng jơng hìu Añ jê tai.

¹³ Bañ ơn phan ơn ò kwơ Añ in tai! Añ cù kìr di ƀô kơlhô Ngai Dùl Lik, ngai Saƀat bal mơ ală bơta pơjum; Añ ò jai kong ală bơta pơjum bal iơh rmơh bol mê dê.

¹⁴ Hwềng soàn Añ gơjrañ di ală bơta pơjum sa Ngai Dùl Lik mơ ală ngai pơjum sa bol mê dê, ală bơta hơ̆ neh gơlik gơs ơnòng kơnjơ̆ Añ in, Añ bòl glar mơ àñ ơnòng gơ.

¹⁵ Tòm tŭ bol mê pò tê bol mê dê, Añ rơp cang kìng mat Añ bơh di bol mê. Bulah dilah bol mê hòi dan oă jơnau, Añ rơp ò iat. Tê bol mê dê bềng mhàm.

¹⁶ Rào tĕ să tòm bol mê, lơh tĕ să tòm bol mê in sàng goh! Tă sang tĕ ală broă iơh bol mê dê bơh di đap mat Añ! Ơm tĕ, bañ lơh tìs tai.

¹⁷ Bơtê lơh tĕ bơta di ngan! Jòi jat tĕ bơta song ring, dong tă cau kong rồn bơklơn, dong tò tĕ ală kòn đòi, bơsong tĕ jơnau cau yă bơklơn cau ùr bơnrau.”

¹⁸ Yàng Jehôwa đơs: “Tŭ do tus tĕ nàng bol he tòmbơyai bal. Bulah tồi glài bol mê dê be dà phồng, rơp gơlik bò be piar, bulah pơrhê be mhàm, rơp gơlik be sơnò belàt kò.

¹⁹ Dilah bol mê gơs nùs kòñ dòn bơr, bol mê rơp geh sa plai đo niam ù tiah dê

²⁰ Mơya dilah bol mê tòmdră mơ sang lòi, gen bol mê rơp gơkòl đào sa loan, bơh bơr Yàng Jehôwa dê neh đơs behơ̆.”

Ƀòn dờng tồi glài roh rui

²¹ Sền ne, mbe ƀòn dờng dòn song gơlik gơs be cau ùr dri! Bơh lài gơ gơs bềng bơta song ngan, bơta song ring òs ơm sùm tòm hơ̆, mơya tŭ do gơ gơs bềng ală cau tơnchơt cau!

²² Priă ai dê neh gơlik gơs be è lòs, tơrnòm bơkah ai dê neh crài bal mơ dà.

²³ Ală cau kwang at bồ ai dê la cau pơrlơ̆ dră, lơh yô mơ cau ntung kơñau, jơh tơl nă bol khai hàm kòñ phan sa loă, mơ jòi ală phan ai gòi. Bol khai ò dong tò cau kòn đòi, ò pơnring bơta cau yă cau ùr bơnrau.

²⁴ Behơ̆ tàng Yàng Jehôwa la Yàng Jehôwa Gơnap Gơnoar Dờng Làm Jơh, la Bơtau Gơnap Gơnoar Dờng Làm Jơh Israel dê, đơs be do: “Ngan Añ rơp tuh bơta gơjrañ dờng Añ jê hơđang ală cau sò tơm Añ jê, mơ sal tê di ală cau sò tơm di Añ!

²⁵ Añ rơp tơrwơl tê tòmdră mơ ai, Añ rơp tŏ tiar mơ lơh ai in gơs goh bơh di jơh ală bơta kung be è lòs, mơ tă sang jơh ală bơta ƀơ̆ ƀơl ai dê.

²⁶ Añ rơp bơtào wơl ală cau kwang cahrña ai dê kung be tòm ngai yau òr, bơtào wơl ală cau chài bơyai broă ai dê be tòm tŭ sơnròp. Tơnơ̆ mơ hơ̆ cau rơp sơnđan ai la Ƀòn Dờng Song Ring, la Ƀòn Dờng Dòn Song.

²⁷ Siôn rơp geh tơwài wơl mơ gơlik gơs song ngan, ală cau gơjrañ sang glài rê wơl gen rơp geh kòp la song ring.

²⁸ Mơya ală cau tòmdră mơ ală cau tồi glài rơp kong bal bơta tơnroh, mơ ală cau sang lòi Yàng Jehôwa gen rơp kong roh rui.

²⁹ Đah mơ ai rơp kong ƀàssìl bơh ală tòm cha mơ ai lơh gơs tiah duh khoai, mơ la tiah ai kòñ gơboh; Ai rơp kong ƀàssìl ƀàsso tài bơh ală suơn mơ ai neh sac rwah.

³⁰ Ai rơp gơlik be tòm cha neh ro nha, be suơn ò gơs dà.

³¹ Cau gơnoar pràn rơp gơlik be dô nsồm sing ồs; mơ broă lơh khai dê be gơđat rnga ồs, bol khai mơ broă lơh bol khai dê rơp kong chu bal mơ gơp, ò gơs dô nă cau lơi đơp chơt gơ.”