Ejra 9 - Sră Goh 2018

Jơnau hòi dan Ejra dê bơh làng Bol Israel tòmbau mơ cau làng bol bơdìh

¹ Tơnơ̆ mơ tŭ ală broă hơ̆ neh sir rau, ală cau kwang at bồ lòt tus hơ añ mơ đơs lah: “Làng bol Israel, ală cau gơnoar ơn phan duh khoai, mơ ală cau Lebi, ò cah is să bol khai bơh di ală làng bol ơm tòm lơgar bal mơ bơta ngkòr ngkàc làng bol hơ̆ dê, bơh di làng bol Kanaan, làng bol Hetit, làng bol Pheres, làng bol Jebusit, làng bol Ammôn, làng bol Môap, làng bol Ejiptơ mơ làng bol Amôr.

² Bơh bol khai neh lap ală kòn ùr ală làng bol hơ̆ dê nàng bau să tòm bol khai in mơ ală kòn klau bol khai in sơl. Ală gar sơntìl sàng goh do neh gơbơcă mơ làng bol ơm tòm lơgar, mơ tòm bơta ò dòn song do ală cau kwang mơ cau lam bồ neh lam gùng.”

³ Tòm tŭ añ neh kơno jơnau hơ̆, añ crè ào dơlam bal mơ ào jrùh añ jê, mơ dŭi sŏ di bồ mơ sơnò tềp añ jê, mơ nggui rngòt rngơt.

⁴ Gen jơh ală cau rơm să rngòt di ală jơnau Yàng Tom Trồ Israel dê, tài bơh bơta ò dòn song ală cau rê bơh di tiah kong kup cèng, pơjum gùt dar añ tòm tŭ añ ơm nggui rngòt rngơt jơl tus di tŭ ơn phan duh khoai mho.

⁵ Di di tŭ ơn phan duh khoai mho, añ ñă ntào bơh di tiah ơt sa añ jê, ào dơlam mơ ào jrùh añ jê neh gơcrè, añ cùn gơltang pò tê hơ Jehôwa Yàng Tom Trồ añ jê,

⁶ mơ hòi dan lah: “Ơ Yàng Tom Trồ añ, añ ƀàssìl oă ngan mơ tơnggòr mat hơ Kơnràñ; ơ Yàng Tom Trồ añ jê, bơh bơta tồi glài bol hi dê neh gơguh jòng rlau mơ bồ bol hi dê, mơ bơta tìs glài bol hi dê neh guh tus hơđang ală tap trồ.

⁷ Bơh tòm ală ngai ồng pàng bol hi dê jơl tus di ngai do, bol hi neh ndơp tòm bơta tồi glài, mơ bơh ală bơta tồi glài bol hi, mơ ală cau bơtau, mơ ală cau gơnoar ơn phan duh khoai bol hi dê neh kong jào ală bơtau tòm lơgar in, tơnroh mơ đào mơ kong kup cèng, kong cau phà kơñau mơ kong ƀàssìl be neh gơs ngai do.

⁸ Mơya tŭ do, bơh tŭ tơngai liah ngan, bơta nđàc neh geh yal tơlik bơh Jehôwa Yàng Tom Trồ bol hi dê, la Bơtau neh lòi bol hi gam wơl mơ ai bol hi dô nơm phan ai bồ tòm tiah sàng goh Kơnràñ dê, nàng Kơnràñ pơnđàng àng mat bol hi in, mơ ai bol hi in phan sa bơkah tòm bơta ơm dĭ bol hi dê.

⁹ Bơh bol hi la ală cau dĭ, bulah behơ̆ Yàng Tom Trồ bol hi dê ò sang lòi bol hi tòm bơta ơm dĭ bol hi dê. Mơya neh ràng tơlik bol hi in bơta kòñ gơboh kơ̆ dơn Kơnràñ dê di đap ală cau bơtau lơgar Persia dê, nàng ai bol hi in rài kis pa, nàng bơtào wơl hìu Yàng Tom Trồ bol hi dê mơ rcang niam wơl ală tiah tơrlah tơrling gơ dê, mơ ai bol hi in dô nơm dơrñang tòm Juda mơ Jerusalem.

¹⁰ Mơ tŭ do, ơ Yàng Tom Trồ bol hi dê, ñchi jơnau bol hi pal đơs tơnơ̆ mơ ală bơta do taih? Bơh bol hi neh sang lòi ală bơta sồr lam Kơnràñ dê,

¹¹ mơ Kơnràñ neh kơnòm di ală cau duh broă Kơnràñ dê la ală cau gơnoar hwơr mơ đơs lah: ‘Lơgar mơ bol mê rơp mut nàng dòp leng la dô nơm lơgar neh gơlik ƀơ̆ ƀơl bơh bơta tồi glài ală làng bol gơ dê. Bơh ală broă lơh cù kìr bol khai dê, bol khai neh lơh lơgar in bềng lìu bơta ƀơ̆ ƀơl bol khai dê bơh đah do tus hơ đah ne.

¹² Gen tàng, bañ ai ală kòn ùr bol mê dê bau mơ ală kòn klau bol khai dê, hala bañ ai ală kòn klau bol mê dê bau mơ ală kòn ùr bol khai dê. Bañ tŭ lơi jòi jat bơta ring lơngai mơ bơta pas sơm bol khai dê, tồ oh mi in geh pràn kơldang mơ geh sa ală phan niam ù tiah dê, mơ lòi gơ wơl ală kòn sau bol mê in lơh gơs phan jơtài gam sùm sùm.’

¹³ Tơnơ̆ mơ jơh ală bơta neh tus hơđang bol hi la bơh ală broă iơh bơsak bol hi neh lơh mơ tồi glài dờng bol hi dê; bulah behơ̆, ơ Yàng Tom Trồ bol hi dê, Kơnràñ ò lơh glài bol hi dô bă kơnjơ̆ di pal mơ tồi glài bol hi dê, mơ neh lòi bol hi in dô pơnah làng bol gam wơl be do.

¹⁴ Bol hi rơp gơltac sang tai ală bơta sồr lam Kơnràñ dê mơ tòmbau mơ ală làng bol neh lơh jat bơta cù kìr behơ̆ sơl ơ? Kơnràñ rơp ò gơjrañ di bol hi tian gơs tơnroh bol hi, ò lòi dô pơnah làng bol gam wơl hala dô nă cau lơi gam kis ò ơ?

¹⁵ Ơ Yàng Jehôwa, la Yàng Tom Trồ Israel dê, Kơnràñ la song ring, mơya bol hi geh pleh klàs be làng bol gam tơngkah wơl, be ngai do. Do bol hi ơm di đap Kơnràñ tòm bơta tồi glài bol hi dê, bulah ò gơs dô nă cau lơi rgơi ntào di đap mat Kơnràñ tài bơh bơta do.”