Ejra 7 - Sră Goh 2018

Ejra lòt tus hơ Jerusalem

¹ Tơnơ̆ mơ ală bơta hơ̆, tòm rài at bồ Artaserses bơtau Persia dê, Ejra kòn klau Seraya, Seraya kòn klau Ajaria, Ajaria kòn klau Hilkia,

² Hilkia kòn klau Sallum, Sallum kòn klau Jadôk, Jadôk kòn klau Ahitup,

³ Ahitup kòn klau Amariah, Amariah kòn klau Ajaria, Ajaria kòn klau Merayôt,

⁴ Merayôt kòn klau Jerahiah, Jerahiah kòn klau Uji, Uji kòn klau Buki,

⁵ Buki kòn klau Abisua, Abisua kòn klau Phineas, Phineas kòn klau Eleajar, Eleajar kòn klau Arôn la cau gơnoar dờng ơn phan duh khoai,

⁶ hơ̆ la Ejra do neh rê bơh Babilôn. Khai la dô nă cau git jak tòm bơta boh lam Môise dê, mơ Yàng Jehôwa la Yàng Tom Trồ Israel dê neh ai khai in; mơ bơtau neh ai khai in jơh ală bơta khai neh dan, tài bơh tê Yàng Jehôwa la Yàng Tom Trồ khai dê ơm hơđang khai.

⁷ Gơs cau ƀà tòm làng bol Israel, ƀà la ală cau gơnoar ơn phan duh khoai, ală cau Lebi, ală cau đơs chò, ală cau kơp gàr mpồng, mơ ală cau duh broă tòm hìu duh khoai kung rê wơl hơ Jerusalem, tòm nam dơ̆ poh rài at bồ bơtau Artaserses dê.

⁸ Bol khai tus hơ Jerusalem tòm kơnhai pram, nam dơ̆ poh rài bơtau hơ̆ dê.

⁹ Tòm ngai dùl kơnhai dùl, bơta lòt gùng bơh Babilôn neh sơntòm, mơ tòm ngai dùl kơnhai pram khai neh tus hơ Jerusalem, bơh tê kòñ nđàc Yàng Tom Trồ dê neh ơm hơđang khai.

¹⁰ Bơh Ejra neh ơn nùs khai dê bơtê bơta Boh Lam Yàng Jehôwa dê, mơ lơh jat gơ, nàng bơto ală jơnau sồr lam mơ bơta boh lam tòm Israel.

Sră bơtau Artaserses pơyoa Ejra in

¹¹ Do la dô pang sră cih wơl jat sră bơtau Artaserses ai Ejra in la cau gơnoar ơn phan duh khoai, cau bơto, cau git jak tòm ală bơta gơwèt hơ ală bơta lơh nền mơ ală jơnau gơnoar sồr Yàng Jehôwa neh ai Israel in:

¹² “Artaserses, bơtau ală bơtau dê, pơyoa Ejra in la cau gơnoar ơn phan duh khoai, cau bơto bơta boh lam Yàng hơđang trồ dê: Niam să!

¹³ Tŭ do añ lơh nền lah ală cau Israel tòm lơgar añ, kòp bal ală cau gơnoar ơn phan duh khoai mơ ală cau Lebi, cau lơi kòñ lòt tus hơ Jerusalem bal mơ mê gen khai rgơi lòt.

¹⁴ Bơtau mơ poh nă cau bơyai broă bơtau dê neh sồr mê lòt nàng lùp sơwì bơh Juda mơ Jerusalem, gơwèt hơ bơta boh lam Yàng Tom Trồ mê dê, la bơta boh lam ơm tòm tê mê dê.

¹⁵ Mơ kung cèng bal priă, màh mơ bơtau mơ ală cau bơyai broă bơtau dê neh jat nùs kòñ mơ ơn Yàng Tom Trồ Israel in la Bơtau gơs tiah ơm sùm tòm Jerusalem,

¹⁶ bal mơ jơh priă màh mơ mê geh bơh tòm kơnhwàl Babilôn, bal mơ ală phan ơn duh khoai jat nùs kòñ làng bol dê, mơ ală cau gơnoar ơn phan duh khoai ơn jat nùs bol khai kòñ ơn hìu Yàng Tom Trồ bol khai in tòm Jerusalem.

¹⁷ Ală jền priă do gen mê pal ngac ngar blơi ală kơnrồ dam, ală belàt dam, ală belàt kòn, bal mơ ală phan ơn duh khoai mơ kòi mbo, ală phan ơn duh khoai ñô, mơ mê pal ơn ală phan hơ̆ hơđang cơnòng duh khoai, tòm hìu Yàng Tom Trồ mê dê tòm Jerusalem.

¹⁸ Ală priă mơ màh gam tơngkah wơl gen mê mơ oh mi mê dê rgơi ngui tòm ală broă lơi niam rlau jơh jat be nùs kòñ Yàng Tom Trồ mê dê.

¹⁹ Ală phan ngui neh jào mê in tòm bơta duh broă hìu Yàng Tom Trồ mê dê, mê pal jào di đap Yàng Tom Trồ tòm Jerusalem.

²⁰ Mơ ală bơta lơi ndai pal càng tòm hìu duh khoai Yàng Tom Trồ mê dê mơ mê rgơi ơn gen mê ai tĕ bơh tòm đam jàr bơtau dê mơ ơn.

²¹ Añ la bơtau Artaserses, ai jơnau gơnoar sồr jơh ală cau at bồ đam jàr tòm kơnhwàl Đah Ne Hiòng: Bulah bơta lơi cau gơnoar ơn phan duh khoai Ejra, cau git jak bơta boh lam Yàng Tom Trồ hơđang trồ kòñ dan mơ bol mê, lơh tĕ ală bơta hơ̆ jơh nùs ngac ngar,

²² hơđang dô rhiang talơng priă, dô rhiang ƀào kòi mi, dô rhiang thùng tơrnòm, dô rhiang thùng mơñà ôlibe, mơ boh gen kàr lơi di lơm.

²³ Ală bơta lơi Yàng hơđang trồ sồr pal rcang gen ngac ngar lơh tĕ hìu duh khoai Kơnràñ in, hala lòi bơta gơjrañ dờng tus hơđang lơgar bơtau dê mơ hơđang ală kòn klau bơtau dê taih?

²⁴ Bol mê kung pal git lah bol mê ò gơs gơnoar boh dia lơi di ală cau gơnoar ơn phan duh khoai, ală cau Lebi, ală cau đơs chò, ală cau kơp mpồng, ală cau duh broă tòm hìu duh khoai, hala ală cau lơh broă ndai tòm hìu Yàng Tom Trồ dê.

²⁵ Ai mê, ơ Ejra, jat be bơta jak chài Yàng Tom Trồ mê dê mơ mê neh gơs, pồ bơtào tĕ ală cau kwang at bồ mơ ală cau kwang cahrña nàng bol khai cahrña jơh làng bol tòm kơnhwàl ơm Đah Ne Hiòng, la ală cau git ală bơta boh lam Yàng Tom Trồ mê dê, mơ mê pal bơto ală bơta hơ̆ cau lơi ò git ală bơta boh lam hơ̆.

²⁶ Cau ò dòn bơr lơh jat bơta boh lam Yàng Tom Trồ mê dê mơ bơta boh lam cau bơtau dê gen pal lơh glài kràñ cê hơđang bol khai, bulah bơh bơta tơnchơt, tơnroh, tă ai jơh phan jơtài, hala kup jàm.”

²⁷ Pal jòng ro Jehôwa Yàng Tom Trồ ală ồng pàng bol he dê bơh Kơnràñ neh ơn ală bơta hơ̆ tòm nùs cau bơtau nàng khai lơh gơklŏ hìu Yàng Jehôwa tòm Jerusalem,

²⁸ la Bơtau neh lơh añ in geh bơta kòñ gơboh kơ̆ dơn di đap cau bơtau mơ ală cau kwang bơyai broă bơtau dê, mơ di đap jơh ală cau kwang gơs gơnoar pràn cau bơtau dê. Añ gơs bơta khin cha, tài bơh tê Jehôwa Yàng Tom Trồ añ jê neh ơm hơđang añ, mơ añ pơjum tơrgòm ală cau lam bồ tòm Israel nàng lòt bal mơ añ.