Ejra 4 - Sră Goh 2018

Cau sò tơm kơryan bơta bơt bơtào wơl hìu duh khoai

¹ Tòm tŭ ală cau sò tơm làng bol Juda mơ Benjamin di kơno lah, ală cau neh kòl kup cèng rê wơl bơt bơtào wơl dô nơm hìu duh khoai Jehôwa Yàng Tom Trồ Israel dê,

² gen bol khai tus hơ Jerubabel mơ hơ ală cau bồ ală hìu nhă mơ đơs lah: “Lòi bol hi dong kòl bơt bơtào bal mơ ală ồng, tài bơh bol hi duh khoai Yàng Tom Trồ ală ồng dê kung be ală ồng mơ bol hi neh ơn phan duh khoai Kơnràñ in bơh di tŭ Esarhatdôn bơtau Asiri neh cèng bol hi tus ơm tềng do.”

³ Mơya Jerubabel, Jesua mơ ală cau gam wơl at bồ ală hìu nhă Israel dê đơs mơ bol hơ̆ lah: “Bol mê ò gơs pơnah lơi bal mơ bol hi tòm bơta bơt bơtào dô nơm hìu duh khoai Yàng Tom Trồ bol hi dê. Mìng bol hi lơm rơp bơt bơtào hìu hơ̆ Jehôwa Yàng Tom Trồ Israel dê, jat be Sirus bơtau Persia neh ai gơnoar sồr bol hi.”

⁴ Gen ală làng bol tòm lơgar lơh làng bol Juda in gơplơ̆ nùs mơ lơh bol khai in rngòt tòm bơta bơt bơtào.

⁵ Bol khai loă ală cau kwang nàng lơh gơprah broă bol khai dê, tòm jơh rài at bồ bơtau Sirus bơtau Persia dê jơl tus di rài Darius bơtau Persia dê.

Bơta tòmdră tòm rài Ahasuerus mơ Artaserses

⁶ Tòm rài at bồ Ahasuerus dê, tòm nam khai sơntòm at bồ, bol khai cih sră yă làng bol Juda mơ làng bol ơm tòm Jerusalem.

⁷ Mơ tòm rài Artaserses bơtau Persia dê, gen Bislam, Mitredat, Tabeel mơ jơh ală cau lơh broă bal mơ bol khai, cih dô pang sră pơyoa tus hơ Artaserses. Sră pơyoa hơ̆ cih tòm jơnau Aram mơ jơnau cih tơlik.

⁸ Rehum cau kwang at bồ ling mơ Simsai cau gơnoar cih, cih dô pang sră tòmdră mơ Jerusalem mơ pơyoa tus hơ bơtau Artaserses be do:

⁹ “Rehum cau kwang at bồ ling mơ Simsai cau gơnoar cih bal mơ jơh ală cau lơh broă bal mơ bol khai, la ală cau kwang cahrña mơ ală cau kwang at bồ ală cau bơh di Tripolis, Persia, Erek mơ Babilôn, cau Elam bơh di Susa,

¹⁰ mơ ală cau ndai tòm ală làng bol, cau kwang dờng ryŭ ryơm Osnappar, neh geh sồr mơ lòi ơm tòm ƀòn dờng Samari dê mơ tòm jơh kơnhwàl gam wơl Đah Ne Hiòng.”

¹¹ Do la dô pang sră cih wơl jat sră bol khai pơyoa khai in: “Pơyoa Bơtau Artaserses: Bơh ală cau duh broă bơtau dê ơm Đah Ne Hiòng, mơ pơyoa còp să.

¹² Bơtau pal git lah tŭ do ală cau Juda neh bơh di bơtau mơ lòt tus hơ bol hi neh tus hơ Jerusalem, mơ bol khai bơt bơtào wơl ƀòn dờng jak tòmdră mơ iơh bơsak hơ̆. Bol khai bơt wơl dơrñang mơ rcang niam wơl ală mơnàng.

¹³ Tŭ do, dan yal bơtau in git lah, dilah ƀòn dờng do geh bơt wơl mơ ală dơrñang gơ geh bơtào wơl, bol khai rơp ò dap dia bơtau in tai jat bơta òs mòng, dap dia lòt gùng mơ đam priă lơgar bơtau dê rơp gơhuc.

¹⁴ Mơ tai, tài bơh bol hi dòp geh boh bơh gơlang bơtau dê mơ bơta hơ̆ lơh bol hi in ò lòi cau sền òsơp dê bơtau, gen tàng bol hi pơyoa jơnau yal tơnggit do bơtau in,

¹⁵ tồ bơtau sồr cau sền sơwì tòm ală sră yal broă kòp nam bơh ồng pàng bơtau dê. Bơtau rơp jòi bàn tòm ală sră yal broă kòp nam, bơtau rơp jòi gŏ lah ƀòn dờng do la dô nơm ƀòn dờng jak tòmdră, òs lơh bòl glar di ală cau bơtau mơ ală kơnhwàl lơgar, hơ̆ la dô bă tiah jak pơrlơ̆ dră bơh tòm rài yau. Tài bơh hơ̆ tàng ƀòn dờng do neh lòi srau gòi.

¹⁶ Bol hi kòñ yal bơtau in git dilah ƀòn dờng do geh bơt wơl mơ ală dơrñang gơ geh bơtào sir, gen bơtau rơp ò gam gơs pơnah lơi tòm kơnhwàl Đah Ne Hiòng.”

¹⁷ Cau bơtau cih sră ho wơl be do: “Pơyoa Rehum cau kwang at bồ ling, Simsai cau gơnoar cih mơ jơh ală cau lơh broă bal ơm tòm Samari mơ tòm jơh kơnhwàl Đah Ne Hiòng, Jơnau còp să.

¹⁸ Sră bol mê neh pơyoa bol hi in gen neh geh sền mơ sơpơ̆bơr di đap añ rau.

¹⁹ Añ neh ai jơnau sồr mơ cau neh jòi sơwì, mơ neh geh bàn tòm ală sră yal yau lơgar dimơ neh git lah ƀòn dờng hơ̆ bơh yau òr neh òs tòmdră mơ ală cau bơtau, mơ la dô bă tiah jak pơrlơ̆ dră mơ òs chồl tơngguh bơta tòmdră.

²⁰ Jerusalem neh gơs ală cau bơtau gơs gơnoar pràn at bồ làm jơh Đah Ne Hiòng, mơ làng bol neh dap dia bơh jơh ală bơta ală cau bơtau hơ̆ in.

²¹ Tŭ do bol mê ai tĕ jơnau gơnoar sồr jơh ală cau hơ̆ pal dơh wơl, ò geh gơnoar bơt wơl ƀòn dờng hơ̆ jơl tus di tŭ añ ai gơnoar sồr bơh broă hơ̆.

²² Kơrhia tĕ lơh jat jơnau sồr do nàng ală cồng nha bơtau dê ò gơkòl roh gơcoh.”

²³ Tòm tŭ neh sir sền sră cih wơl jat sră bơtau Artaserses dê pơyoa Rehum in, Simsai cau gơnoar cih in, mơ ală cau lơh broă bal in rau, gen bol khai lòt mo tus hơ ală cau Juda tòm Jerusalem mơ ngui bơta pràn kơldang nàng kơryan bol khai lơh broă.

²⁴ Behơ̆ broă bơt hìu duh khoai Yàng Tom Trồ tòm Jerusalem ơm dơh wơl jơl tus di nam bàr rài at bồ Darius bơtau Persia dê.