Ejekiel 8 - Sră Goh 2018

Bơta duh khoai rùp ràk tòm hìu duh khoai Yàng

¹ Nam dơ̆ prau, ngai pram kơnhai prau, tòm tŭ añ ơm nggui tòm hìu añ jê, mơ ală cau kwang kra Juda dê ơm nggui di đap añ, gen tê Jehôwa Yàng Tom Trồ dê tus hơđang añ.

² Añ tơnggòr sền mơ gŏ gơs rùp să gơlơh kung be rùp dô nă kòn mơnus. Bơh di but cau hơ̆ tus di hơđơm khai gơlơh be ồs; ai bơh di but tus di hơđang gơlơh àng gơcrà kung be kòng àng lơr.

³ Cau hơ̆ pò tơlik gơlơh kung be dô nơm tê mơ sơmbat kup di sŏ hơđang bồ añ. Hwềng yò tơngguh añ digùl trồ mơ tiah, mơ cèng añ tòm bơta gơtơnggŏ Yàng Tom Trồ dê hơ Jerusalem, di gùng mut tòm mpồng dờng đah đang la tiah bơtào rùp ràk bơta ƀoah pơrñat, la bơta gơchồl bơta ƀoah pơrñat dê.

⁴ Mơ tềng hơ̆, gơs bơta gơklŏ Yàng Tom Trồ Israel dê, kung be añ neh sền gŏ tòm bơta gơtơnggŏ tòm thòng.

⁵ Gen Yàng Tom Trồ đơs mơ añ lah: “Ơ kòn mơnus, wèt sền tĕ đah đang.” Behơ̆ gen añ wèt mat sền mơ di gùng mut đah đang mpồng dờng cơnòng duh khoai dê, gơs rùp ràk bơta ƀoah pơrñat dê.

⁶ Mơ Kơnràñ đơs mơ añ lah: “Ơ kòn mơnus, mê gŏ sơl bơta bol khai lơh, hơ̆ la ală bơta cù kìr rlau jơh mơ hìu Israel ơm lơh tềng do, la ală bơta lơh Añ in ơm ngài mơ tiah sàng goh Añ jê? Mơya mê rơp gŏ ală bơta cù kìr rlau tai sơl.”

⁷ Gen Kơnràñ cèng añ tus di gùng mut tòm rơng hìu. Añ sền mơ gŏ dô nơm trồm tòm dơrñang.

⁸ Kơnràñ đơs mơ añ lah: “Ơ kòn mơnus, tŭ do tò tĕ tòm dơrñang.” Behơ̆ añ tò tòm dơrñang mơ gŏ dô nơm mpồng tềng hơ̆.

⁹ Mơ Kơnràñ đơs tai mơ añ lah: “Mut tĕ sền ală bơta iơh bơsak cù kìr mơ bol khai ơm lơh tềng do.”

¹⁰ Behơ̆ añ mut mơ sền gŏ làm hơđang ală dơrñang gơs tơl ală rùp jơh ală phan wìn sròng mơ phan poan jơng cù kìr bal mơ tơl jơh ală rùp ràk hìu Israel dê.

¹¹ Di đap bol gơ gơs poh jơt nă cau kwang kra hìu Israel dê ơm ntào, digùl bol khai gơs Jaajania, kòn klau Saphan. Kòp nă at gri kơlhô tòm tê, ñhŭ ƀô bơlhu gơguh làm tiah.

¹² Gen Kơnràñ đơs mơ añ lah: “Ơ kòn mơnus, mê gŏ sơl bơta ală cau kwang kra hìu Israel dê ơm lơh tòm bơta klam jơngo, kòp nă duh khoai di đap rùp ràk is he dê? Bơh bol khai đơs lah: ‘Yàng Jehôwa ò gŏ bol he ò; Yàng Jehôwa neh sang lòi lơgar do rau!’”

¹³ Kơnràñ đơs tai lah: “Mê rơp sền gŏ bol khai ơm lơh ală bơta cù kìr rlau tai.”

¹⁴ Gen Kơnràñ cèng añ tus di gùng mut tòm mpồng dờng đah đang hìu Yàng Jehôwa dê mơ añ gŏ ală cau ùr ơm nggui ñìm bơh yàng Tammus.

¹⁵ Kơnràñ đơs mơ añ lah: “Ơ kòn mơnus, mê gŏ sơl bơta hơ̆? Mê rơp sền gŏ ală bơta cù kìr rlau mơ hơ̆ tai.”

¹⁶ Tơnơ̆ mơ hơ̆, Kơnràñ cèng añ mut tòm rơng đah dơlam hìu Yàng Jehôwa dê; mơ tềng hơ̆, di di gùng mut tòm hìu duh khoai Yàng Jehôwa, digùl mpồng rơng mơ cơnòng duh khoai, añ gŏ gơs pơgap bàr jơt pram nă cau klau. Bol khai wèt ngkòi hơ đah hìu duh khoai Yàng Jehôwa mơ wèt mat hơ đah mattơngai lik, bol khai cùn khoai mattơngai đah mattơngai lik.

¹⁷ Gen Kơnràñ đơs mơ añ lah: “Ơ kòn mơnus, mê neh gŏ bơta hơ̆ sơl? Hơ̆ di sơl la dô bơta ò tơl ƀơ̆ iơh mơ hìu Juda ơm lơh ală bơta cù kìr behơ̆ tềng do ơ? Bol khai pal lơh ală bơta iơh bơsak bềng lìu tòm lơgar nàng kư̆ bơrcek Añ gơjrañ ơ? Sền tĕ bol khai ai ntê chi ơn rềp di muh bol khai dê!

¹⁸ Behơ̆ gen Añ rơp lơh di bol khai jat bơta gơhào gơjrañ; Añ rơp ò nđàc sơngit di bol khai hala pơlai bol khai. Bulah bol khai nggà driau dờng di tồr Añ, Añ kung rơp ò bài iat bol khai.”