Ejekiel 7 - Sră Goh 2018

Bơta lồi dut neh tus

¹ Gơs jơnau Yàng Jehôwa đơs mơ añ lah:

² “Ơ kòn mơnus, Jehôwa Yàng Tom Trồ đơs mơ lơgar Israel be do: ‘Bơta lồi dut! Bơta lồi dut neh tus di poan mum lơgar!

³ Tŭ do bơta lồi dut neh tus hơđang mê. Añ rơp tuh tơlik bơta gơjrañ Añ jê hơđang mê. Añ rơp cahrña mê jat gùng dà mê dê, mơ rơp lơh glài mê bơh jơh ală bơta cù kìr mê dê.

⁴ Mat Añ rơp ò nđàc sơngit di mê hala pơlai di mê ò; Añ rơp lơh glài mê jat ală gùng dà mê dê, tòm tŭ ală bơta cù kìr gam gơs digùl bol mê. Gen mê rơp git Añ la Yàng Jehôwa.’

⁵ Jehôwa Yàng Tom Trồ đơs be do: ‘Sền ne, bơta rung rài pơnjat bơta rung rài! Gơ tus rau.

⁶ Dô bơta lồi dut neh tus, bơta lồi dut neh tus! Gơ neh guh tòmdră mơ mê. Gơ neh tus ne!

⁷ Ơ làng bol ơm tòm lơgar, bơta rung rài neh tus hơđang bol mê. Tŭ neh tus, ngai neh rềp; gơs bơta rngòt rngơt, ò gŏ bơta chò hòp hơđang ală mơnơm.

⁸ Añ rơp tuh bơta gơjrañ dờng Añ jê hơđang mê, mơ ràng tơlik bơta gơhào gơjrañ Añ jê tòmdră mơ mê; Añ rơp cahrña mê jat bơta lơh lòt mê dê mơ tơm wơl mê in jat ală bơta iơh mơ mê neh lơh.

⁹ Añ rơp ò nđàc sơngit di mê hala ò pơlai di mê. Añ rơp tơm wơl mê in jat bơta lơh lòt mơ jat ală bơta iơh mơ mê neh lơh digùl bol mê. Bol mê rơp git lah să tòm Añ, Yàng Jehôwa, la Bơtau tuh ală bơta rung rài hơ̆.

¹⁰ Ngai hơ̆ neh tus! Gơ neh tus rau! Bơta rung rài neh gơlik gơs; gai lồng neh cat sơmbut, bơta jòng să neh lik bơkào!

¹¹ Bơta jàñ bơsak neh hòn dờng mơ gơlik gơs gai lồng nàng lơh glài bơta iơh bơsak; ò gơs dô nă cau lơi tòm làng bol gam wơl, ò gam dô nă cau lơi tòm mpồl bol khai dê, ò gam phan mơna, ò gam phan lơi kas màng.

¹² Tŭ jơ neh tus, ngai neh tus rềp. Bañ lòi cau blơi chò hòp hala cau tac moat jrùng, bơh gơs bơta gơjrañ dờng neh dùh hơđang jơh mpồl làng bol.

¹³ Bơh ală cau neh tac ò rgơi rê wơl nàng ai ală phan bol khai neh tac bulah khai gam kis. Bơh bơta gơtơnggŏ bơh jơh dô mpồl bol khai rơp ò pơrlac wơl. Tài bơh tồi glài bol khai dê, ò dô nă cau lơi tòm bol khai rgơi prap gàr bơta kis he dê.

¹⁴ Bulah bol khai uh kơlwòk mơ rcang sir jơh ală bơta, ò gơs dô nă cau lik lòt tòmlơh, bơh bơta gơjrañ dờng Añ jê neh dùh hơđang jơh mpồl làng bol.

¹⁵ Đào đah bơdìh, pluh plàng mơ jơgloh rung đah dơlam; ală cau ơm tòm ƀlàng rơp chơt bơh đào; ală cau ơm tòm ƀòn dờng rơp kong bơta jơgloh rung mơ kòp jê pluh plàng sa loan.

¹⁶ Jơh ală cau gam kis mơ geh lik klàs rơp ơm hơđang ală mơnơm, rac ròc kung be sềm ntòp tòm thòng, kòp nă tài bơh tồi glài khai dê.

¹⁷ Kòp nơm tê rơp lơgah lơgañ, kòp nơm gơltang rơp lơbơn kung be dà.

¹⁸ Bol khai rơp soh ƀào sơnò kiat, mơ rơp soh bơta rngòt rngơt. Muh mat bol khai dê rơp kong jơm gòm mơ bơta ƀàssìl ƀàsso, mơ bồ bol khai rơp kong koah.

¹⁹ Bol khai rơp sơrbì priă bol khai dê tòm gùng, mơ màh bol khai dê rơp gơlik gơs dô nơm phan ƀơ̆ ƀơl. Màh mơ priă bol khai dê ò rgơi dong klàs bol khai tòm ngai gơjrañ dờng Yàng Jehôwa dê. Bol khai rơp geh rài bơta jơgloh hala tơmbềng kơndul bol khai dê bơh phan hơ̆, bơh gơlơh bol khai in gơtup pừ tòm tồi glài.

²⁰ Bol khai neh jòng să bơh ală phan bơka să hàng mơnĕ bol khai dê, mơ ngui gơlơh gơs ală rùp ràk cù kìr bal mơ ală rùp duh khoai iơh rmơh. Behơ̆ tàng Añ rơp lơh ală phan hơ̆ gơlik gơs dô nơm phan ƀơ̆ ƀơl bol khai in!

²¹ Añ rơp jào gơlơh gơs phan tòmpìt geh tòm tê làng bol bơdìh, lơh gơs phan phà kup cau iơh bơsak tòm ù in; bol khai rơp lơh ƀơ̆ iơh di gơ.

²² Añ rơp pơrlac mat bơh di bol khai, mơ bol khai rơp lơh ƀơ̆ ƀơl tiah sàng goh Añ jê; ală cau ntung kơñau rơp mut tềng hơ̆ mơ lơh ƀơ̆ ƀơl tiah hơ̆.

²³ Rcang tĕ ală che sreng tài bơh lơgar gơs bềng bơta lơh gơtuh mhàm, mơ ƀòn dờng gơs bềng bơta rhung rhang.

²⁴ Añ rơp cèng tus dô làng bol iơh bơsak rlau jơh tòm ală làng bol nàng tòmpìt ai ală hìu bol khai dê; Añ rơp tơnlồi bơta jòng să cau pràn kơldang dê, mơ ală tiah duh khoai bol khai dê rơp kong lơh gơlik gơs ƀơ̆ ƀơl.

²⁵ Tòm tŭ bơta rngòt rngơt tus, bol khai rơp jòi jat bơta ring lơngai, mơya jòi ò bàn.

²⁶ Rung rài do gơbơtơl hơđang rung rài ndai, jơnau pơnro do gơpơnjat jơnau pơnro ne. Bol khai rơp pơnđơl jòi bơta gơtơnggŏ bơh di cau gơnoar hwơr; jơnau bơto tơngkah bơh cau gơnoar ơn phan duh khoai rơp roh rui, jơnau bơto sơnio bơh di ală cau kwang kra kung rơp ò gơs.

²⁷ Cau bơtau rơp ñìm rac, cau kwang at bồ rơp soh bơta roh nùs moat jrùng, mơ tê làng bol tòm lơgar rơp rơm rngòt. Añ rơp lơh gơwèt hơ bol khai jat be bơta lơh lòt bol khai dê, mơ Añ rơp cahrña bol khai jat be bơta bol khai neh cahrña. Gen bol khai rơp git Añ la Yàng Jehôwa.’”