Ejekiel 6 - Sră Goh 2018

Jơnau đơs hwơr tòmdră mơ Israel

¹ Gơs jơnau Yàng Jehôwa đơs mơ añ be do:

² “Ơ kòn mơnus, wèt tĕ mat sền di ală mơnơm Israel dê, đơs hwơr tĕ tòmdră mơ bol gơ,

³ mơ lah: ‘Ơ ală mơnơm Israel dê, iat tĕ jơnau Jehôwa Yàng Tom Trồ dê. Jehôwa Yàng Tom Trồ đơs mơ ală mơnơm mơ ală dòr, ală croh, ală thòng be do: Añ, să tòm Añ rơp cèng đào tus hơ bol mê, mơ Añ rơp tơnroh ală tiah jơnhoa bol mê dê.

⁴ Ală cơnòng duh khoai bol mê dê rơp kong tơrlah tơrlơm, ală cơnòng chu kơlhô bol mê dê rơp kong pòng bơcah lề; Añ rơp sreh tơnchơt bol mê di đap ală rùp ràk bol mê dê.

⁵ Añ rơp lòi ală ƀồc chơt cau Israel dê di đap ală rùp ràk bol khai dê, mơ Añ rơp rsìh ală ntìng bol mê dê gùt dar ală cơnòng duh khoai bol mê dê.

⁶ Bulah bol mê ơm tiah lơi, gen ală ƀòn dờng rơp kong sang lòi srau gòi, ală tiah jơnhoa rơp kong tơnroh, gen tàng ală cơnòng duh khoai bol mê dê rơp kong sang gòi mơ roh rui, ală rùp ràk bol mê dê rơp kong pòng bơcah mơ kong tơnroh, ală cơnòng chu kơlhô bol mê dê rơp kong pòng pă lề, mơ ală broă lơh bol mê rơp pơs tơlik jơh hir.

⁷ Bơta sreh tơnchơt dùh digùl bol mê, gen bol mê rơp git lah Añ la Yàng Jehôwa.

⁸ Mơya Añ rơp lòi wơl dô êt nă, bơh dô êt nă tòm bol mê geh klàs bơh đào tòm tŭ bol mê ơm nrah nring tòm ală lơgar mơ ală làng bol.

⁹ Tòm bol mê la ală cau geh klàs hơ̆ rơp kah wơl Añ digùl ală làng bol mơ bol khai neh kong kup cèng, mbe lơi Añ neh jê sồt moat jrùng bơh nùs bơrsèl tơnhial bol khai dê, neh pơrlac sang bơh Añ, mơ bơh gar mat bơrsèl tơnhial bol khai dê, neh wèt hơ ală rùp ràk bol khai dê. Gen bol khai rơp cù kìr di să tòm he bơh ală bơta tồi glài iơh bơsak mơ bol khai neh tìs. Bơh jơh ală broă ngkòr ngkàc mơ bol khai neh lơh.

¹⁰ Bol khai rơp git Añ la Yàng Jehôwa; Añ ò đơs pơhìn gòi mơ ò tơndùh bơta rung rài hơđang bol khai.’”

¹¹ Jehôwa Yàng Tom Trồ đơs be do: “Tàp tĕ tê mơ ntrơm tĕ jơng mơ hòi driau lah: ‘Ơ hơh! Hơ̆ la tài bơh jơh ală bơta iơh mơ broă lơh cù kìr hìu Israel dê! Bơh khai rơp pừ chơt bơh đào, jơgloh rung mơ pluh plàng.’

¹² Cau lơi ơm ngài rơp chơt bơh pluh plàng, cau lơi ơm rềp rơp pừ bơh đào, mơ cau lơi gam kis, gam lòi wơl gen rơp chơt bơh jơgloh rung. Hơ̆ la bơta gơjrañ dờng Añ jê, Añ rơp tuh hơđang bol khai.

¹³ Mơ bol mê rơp git Añ la Yàng Jehôwa, tòm tŭ làng bol bol khai dê gơkòl sreh tơnchơt digùl ală rùp ràk gùt dar ală cơnòng duh khoai bol khai dê, hơđang kòp nơm dòr jòng jơnhoa mơ hơđang jơh ală bồ mơnơm, tòm tiah mƀur kòp nơm chi dờng mơ kòp nơm chi gus, làm ală tiah bol khai chu kơlhô ƀô bơkah jơh ală rùp ràk bol khai in.

¹⁴ Añ rơp pò tê tòmdră mơ bol khai, Añ rơp lơh ù tiah hơ̆ gơlik gơs tiah srau gòi, tòm làm bă tiah lơi bol khai ơm, bơh ƀlàng ngềt ngơt tus di Riblah. Gen bol khai rơp git Añ la Yàng Jehôwa.”