Ejekiel 5 - Sră Goh 2018

Jerusalem kong lơh glài

¹ Tŭ do, ơ kòn mơnus, ai tĕ dô nơm đào sồt; ngui be pềs cau siat sŏ nàng koah bồ mơ koah sơnò tềp mê dê. Lồc behơ̆ ngui phan kơr nàng kơr mơ tòmpà sŏ hơ̆.

² Tòm tŭ ală ngai gơrwàng gùt dar mê dê neh tơl, mê rơp chu dô pơnah pe sŏ hơ̆ tòm dơlam ƀòn dờng. Ai tĕ dô pơnah pe sŏ ndai mơ koh sreh gơ mơ đào gùt dar ƀòn. Lồc behơ̆, rsìh dô pơnah pe sŏ gam wơl tòm càl, mơ Añ rơp tă đào bơh đah ngkòi bol gơ.

³ Mơya ai tĕ dô êt dang sŏ hơ̆ mơ kơt di tiang ào jrùh mê dê.

⁴ Kung ai tĕ dô êt tòm ală sŏ hơ̆, sơrbì gơtòm ồs mơ chu gơ; bơh hơ̆ dô nơm ồs rơp lik tòmdră mơ jơh hìu Israel.

⁵ Yàng Jehôwa đơs be do: “Do la Jerusalem, Añ neh ơn gơ digùl ală làng bol, bal mơ ală lơgar ơm gùt dar gơ.

⁶ Mơya gơ neh bơtào tòmdră mơ ală bơta boh lam mơ ală bơta sồr lam Añ jê gơlik iơh bơsak rlau mơ ală làng bol mơ ală lơgar gùt dar gơ, neh sang lòi ală bơta boh lam Añ jê mơ ò lơh jat ală bơta sồr lam Añ jê.

⁷ Gen tàng, Jehôwa Yàng Tom Trồ đơs be do: ‘Tài bơh mê neh kơldang bồ rlau mơ ală làng bol ơm gùt dar bol mê, ò lơh jat ală bơta sồr lam Añ jê hala prap gàr ală bơta boh lam Añ jê. Mơya bol mê lơh jat ală bơta boh lam jơh ală làng bol ơm gùt dar bol mê.’

⁸ Gen tàng, Jehôwa Yàng Tom Trồ đơs be do: ‘Añ, să tòm Añ tus tòmdră mơ mê, Añ rơp cahrña mê di đap ală làng bol.

⁹ Tài bơh ală bơta ngkòr ngkàc mê dê, Añ rơp lơh di mê bơta mơ Añ òhềt tŭ lơi lơh, mơ Añ rơp ò tŭ lơi lơh bơta behơ̆ tai.

¹⁰ Digùl bol mê, ngan, ală mè bèp rơp sa poac ală kòn bol khai dê, mơ ală kòn rơp sa poac ală mè bèp bol khai dê. Añ rơp tơndùh bơta lơh glài hơđang mê mơ Añ rơp rsìh tòm càl jơh ală cau gam kis mê dê.’”

¹¹ Jehôwa Yàng Tom Trồ đơs lah: “Gen tàng di ngan kung be Añ kis, tài bơh mê neh lơh ƀơ̆ ƀơl tiah sàng goh Añ jê bơh ală rùp duh khoai cù kìr bal mơ ală bơta duh khoai ƀơ̆ iơh, gen tàng să tòm Añ rơp koh tơmù mê, Añ rơp ò prap lòi mê hala nđàc sơngit ò.

¹² Dô pơnah pe làng bol mê dê rơp chơt pluh, hala roh rui bơh bơta jơgloh rung tòm mê; dô pơnah pe rơp pừ bơh đào gùt dar mê; mơ dô pơnah pe tai Añ rsìh tòm kòp nơm càl, mơ tă đào bơh sơmprồm ting jat bơh ngkòi.

¹³ Gen bơta gơhào gơjrañ Añ jê rơp tơl mơ bơta gơjrañ dờng Añ jê hơđang bol khai rơp rài mơ lơh hừh nùs Añ. Tòm tŭ Añ neh tuh bơta gơjrañ dờng Añ jê hơđang bol khai rau gen bol khai rơp git lah hơ̆ să tòm Añ Yàng Jehôwa, neh đơs tòm bơta ƀoah pơrñat Añ jê.

¹⁴ Rlau tai Añ rơp lơh mê in tơrlah tơrling mơ kong lah pơrhơng tòm ală lơgar gùt dar mê, di đap mat jơh ală cau lòt gan.

¹⁵ Tòm tŭ Añ gơhào gơjrañ mơ gơjrañ dờng mơ tuh hơđang mê bơta lơh glài mơ bơta lah pơrhơng jê sồt gen mê rơp gơlik dô bơta cau sền òsơp mơ dơñŏ tơnhial, dô jơnau bơto pơhìn, mơ dô nơm phan cù kìr ală lơgar gùt dar mê. Să tòm Añ la Yàng Jehôwa đơs behơ̆.

¹⁶ Tòm tŭ Añ pañ mê mơ ală kam bơta chơt jơgloh rung, ală kam tơnchơt mơ tơnroh Añ jê, Añ rơp pañ nàng tơnroh mê. Añ rơp bơtơl tai bơta jơgloh rung hơđang mê, mơ pơndut phan sa mê dê.

¹⁷ Añ rơp cèng bơta jơgloh rung mơ sồr phan poan jơng tòm brê tus tòmdră mơ mê, bol gơ rơp tơnroh kòn sau mê dê. Kòp jê pluh plàng mơ bơta lơh gơhòr mhàm rơp gan mê; Añ rơp cèng đào hơđang bol mê. Să tòm Añ la Yàng Jehôwa neh đơs behơ̆.”