Ejekiel 47 - Sră Goh 2018

Hiòng dà hòr lik bơh di hìu duh khoai

¹ Cau hơ̆ cèng añ rê wơl hơ gùng mut tòm hìu duh khoai, mơ añ gŏ dà gơhòr lik bơh di hơđơm mpồng hìu duh khoai dê wèt hơ đah mattơngai lik (bơh hìu duh khoai wèt hơ đah mattơngai lik). Dà hơ̆ gơhòr mù bơh đah đơm hìu duh khoai, đah đơm cơnòng ơn phan duh khoai.

² Gen khai cèng añ lik bơh di gùng mpồng ƀòn đah đang mơ lam añ lòt gùt dar đah bơdìh tus hơ gùng mpồng ƀòn đah bơdìh wèt hơ đah mattơngai lik, mơ dà gơhòr bơh di đah đơm.

³ Tòm tŭ khai lòt hơ đah mattơngai lik mơ gơs che was tòm tê, khai was dô rbô tal mơ lam añ lòt gan dà jrô bam tus di mat be jơng.

⁴ Gen khai was dô rbô tal tai mơ lam añ lòt gan dà jrô bam tus di gơltang. Khai was dô rbô tal tai mơ lam añ lòt gan dà jrô bam tus di but.

⁵ Khai was dô rbô tal tai, mơya tŭ hơ̆ gơlik dô nơm hiòng dà mơ añ ò rgơi tiă tài bơh dà gơguh mơ jrô tơl nàng re, hơ̆ la dô nơm hiòng dà mơ ò gơs cau lơi rgơi tiă.

⁶ Khai lùp añ: “Ơ kòn mơnus, mê sền gŏ bơta hơ̆ sơl?” Gen khai lam añ rê wơl hơ gah hiòng dà.

⁷ Tòm tŭ añ neh tus tềng hơ̆ rau, añ sền gŏ gơs oă ngan chi di bàr gah hiòng.

⁸ Khai đơs mơ añ lah: “Dà do gơhòr tus di kơnhwàl đah mattơngai lik, mơ hòr mù tus di Arabah lồc behơ̆ gơ mut tòm dàlềng. Tòm tŭ gơ neh mut tòm dàlềng gen dà tòm dàlềng gơlik dà bơkah niam.

⁹ Tiah lơi hiòng dà gơhòr tus gen gơs oă ală phan kis rơp kis. Tềng hơ̆ rơp gơs oă ngan ka, tài bơh dà hiòng do hòr tus tềng hơ̆ mơ lơh dà ƀă gơlik dà bơkah niam; behơ̆ hiòng dà do gơhòr tus di tiah lơi gen jơh ală phan rơp kis.

¹⁰ Ală cau dang bơtơng kup ka rơp ntào rò gah dà; bơh di Engedi tus hơ En Elaim rơp gơs ală tiah nàng dang bơtơng. Rơp gơs oă jơi ka krơi is, kung be ka tòm dàlềng dờng.

¹¹ Mơya dà tòm ală tiah bŏ tiah tơnau ò gơlik gơs dà bơkah niam; ală tiah hơ̆ rơp sang lòi boh in.

¹² Tơl ală jơi chi gơs plai di sa rơp hòn di bàr gah hiòng dà. Nha gơ rơp ò ro jrùh, plai gơ kung ò tŭ lơi jơh. Kòp kơnhai dô dơ̆ gơ gơs plai, tài bơh dà gơhòr bơh di tiah sàng goh tus di gơ. Plai gơ rơp ngui lơh gơs phan sa mơ nha gơ ngui nàng sơmbòi kòp jê.”

Ală nhàr lơgar dê

¹³ Do la jơnau đơs Jehôwa Yàng Tom Trồ dê: Do la nhàr tòm tŭ mê tòmpà lơgar lơh gơs phan jơtài jơt bàr jơi bơtiàn Israel in, gơs bàr pơnah hìu Jôsep in.

¹⁴ Mê pal tòmpà ring bal digùl bol khai. Tài bơh Añ neh srat să ho nền ai lơgar do ală ồng pàng mê in, lơgar do rơp gơlik gơs phan jơtài bol mê dê.

¹⁵ Do rơp la nhàr lơgar dê: “Đah đang gen gơ rơp lòt bơh di dàlềng dờng bơh gùng Hetlôn gan Lebô Hamas tus Jedat,

¹⁶ Berothah mơ Sibraim (gơ ơm di nhàr digùl Damas mơ Hamas), lòt ngài tus Hajer Hatikôn la tiah hơđang nhàr Hauran dê.

¹⁷ Nhàr rơp lòt ngài bơh di dàlềng tus hơ Hasar Enan, jat rò gah nhàr đah đang Damas dê, gơs nhàr Hamas di đah đang. Hơ̆ rơp la đah nhàr đang.

¹⁸ Đah mattơngai lik gen nhàr rơp gơ lòt bơh digùl Hauran mơ Damas lòt jat rò gah Jordan, digùl Galaat mơ lơgar Israel, tus di dàlềng đah mattơngai lik mơ lòt ngài tus di Tamar. Hơ̆ la nhàr đah mattơngai lik.

¹⁹ Đah đơm rơp gơ lòt bơh di Tamar, lòt ngài tus di ală dà Meriba Kades, lồc behơ̆ lòt jat rò gah croh dà Ejiptơ dê tus hơ Dàlềng Dờng. Hơ̆ rơp la nhàr đah đơm.

²⁰ Đah mattơngai mut geh Dàlềng Dờng rơp la nhàr tus di tiah tòm toh di đap Lebo Hamat. Hơ̆ rơp la nhàr đah mattơngai mut.

²¹ Mê rơp tòmpà lơgar do digùl bol mê jat ală jơi bơtiàn Israel dê.

²² Mê rơp tă khà tòmpà lơgar lơh gơs phan jơtài bol mê in mơ ală cau lơgar ndai ơm sùm digùl bol mê mơ neh gơs kòn sau. Mê pal kòp bol khai kung be cau làng tòm Israel deh tòm lơgar; bol khai rơp tă khà kung be bol mê mơ dòp leng phan jơtài digùl ală jơi bơtiàn Israel dê.

²³ Bol khai ơm tòm ù tiah jơi bơtiàn lơi gen bol mê pal ai bol khai in phan jơtài tòm jơi bơtiàn hơ̆.” Jehôwa Yàng Tom Trồ đơs behơ̆.