Ejekiel 45 - Sră Goh 2018

Bơta tòmpà lơgar

¹ “Tòm tŭ bol mê tòmpà lơgar lơh gơs sre brê, bol mê pal ơn Yàng Jehôwa in dô pơnah ù tiah lơh gơs dô kơnhwàl ơn is sàng goh, jòng ròt bàr jơt pram rbô tal, ơnàng bàr jơt rbô tal; jơh dô kơnhwàl do rơp la tiah sàng goh.

² Tòm kơnhwàl ù tiah do, dô pơnah la pram rhiang tal poan gah ring bal rơp la tiah bơt hìu duh khoai, gùt dar tiah do gơs pram jơt tal lòi ƀlàng gòi.

³ Tòm kơnhwàl sàng goh, was tĕ dô pơnah jòng ròt bàr jơt pram rbô tal mơ ơnàng jơt rbô tal. Tòm tiah hơ̆ rơp la tiah sàng goh, la tiah sàng goh ngan.

⁴ Gơ rơp la pơnah sàng goh tòm lơgar; gơ rơp la tiah cau gơnoar ơn phan duh khoai in, la ală cau duh broă tòm tiah sàng goh mơ la ală cau tus rềp di Yàng Jehôwa nàng duh broă Kơnràñ; mơ gơ rơp la tiah hìu bol khai dê, mơ la dô bă tiah sàng goh tòm tiah sàng goh.

⁵ Dô pơnah ndai jòng bàr jơt pram rbô tal mơ ơnàng jơt rbô tal rơp gơrê bal mơ cau Lebi la ală cau duh broă tòm hìu duh khoai, bol khai dòp geh lơh gơs sre brê nàng bơt bơtào ală ƀòn dờng mơ ơm tềng hơ̆.

⁶ Di gah tiah ơn is sàng goh, bol mê pal ơn dô kơnhwàl ơnàng pram rbô tal mơ jòng ròt bàr jơt pram rbô tal nàng bơt bơtào ƀòn dờng; gơ rơp gơrê bal mơ jơh dô nơm hìu Israel.

⁷ Cau bơtau rơp gơs ù tiah rò gah kòp đah ù tiah lơh gơs kơnhwàl sàng goh mơ ù tiah ƀòn dờng dê, di gah kơnhwàl sàng goh mơ di tiah gơs ƀòn dờng, wèt hơ đah mattơngai mut mơ đah mattơngai lik, tòmpal mơ đah jòng ròt bơh đah jơi bơtiàn do tus đah jơi bơtiàn ne, mơ bơh đah nhàr mattơngai mut tus hơ đah nhàr mattơngai lik ù tiah dê.

⁸ Hơ̆ la pơnah sre brê khai dê tòm Israel. Mơ ală cau bơtau Añ jê rơp ò tai rồn bơklơn làng bol Añ jê, mơya rơp lòi hìu Israel in dòp geh ù tiah jat be jơi bơtiàn bol khai dê.

⁹ Jehôwa Yàng Tom Trồ đơs be do: ‘Tơl rau, Ơ ală cau bơtau Israel dê! Sang tĕ bơta jàñ bơsak mơ bơta rồn bơklơn ngài bơh làng bol Añ jê mơ lơh tĕ bơta song ring mơ di ngan. Dơh tĕ, bañ bơtrơh tơlik tai làng bol Añ jê, Jehôwa Yàng Tom Trồ đơs behơ̆.’”

Kơr mơ was

¹⁰ “Bol mê pal ngui phan kơr tòm toh sơnoa rnoas, epha tòm toh sơnoa rnoas, mơ bat tòm toh sơnoa rnoas.

¹¹ Epha mơ bat pal gơs ndròm bal, dô bat gơs dô pơnah jơt ôme mơ dô epha la dô pơnah jơt ôme dê; ôme pal la phan was sơnoa rnoas epha mơ bat dê.

¹² Dô sieklơ rơp la bàr jơt gera. Bàr jơt sieklơ tơrgòm bal mơ bàr jơt pram sieklơ tơrgòm bal mơ jơh pram sieklơ gen gơs dô min.”

Ală phan ơn

¹³ “Do la phan ơn mơ bol mê pal ơn: Dô pơnah prau epha bơh kòp ôme kòi mi mơ dô pơnah prau epha bơh di kòp ôme kòi mac.

¹⁴ Dô pơnah mơñà neh lơh nền, was bơh phan was la bat, la dô pơnah jơt bat bơh di kòp kơr (dô kor gơs jơt bat hala dô ôme, bơh jơt bat la ndròm bal mơ dô ôme).

¹⁵ Dô nơm belàt kung pal kup bơh di kòp mpồl bàr rhiang belàt bơh di ală ƀlàng ñhơt niam Israel dê. Ală phan do rơp ngui lơh gơs ală phan ơn mơ kòi mbo, ală phan ơn chu pơrguc, mơ ală phan ơn bơta ring lơngai nàng lơh gơs phan ơn tơwài glài làng bol in, Jehôwa Yàng Tom Trồ đơs behơ̆.

¹⁶ Jơh làng bol tòm lơgar pal gơs pơnah tòm phan ơn do nàng cau bơtau Israel in ngui.

¹⁷ Broă tòm cau bơtau dê la pal rcang gơs ală phan ơn chu pơrguc, ală phan ơn mơ kòi mbo, mơ phan ơn hùc tòm ală ngai pơjum sa, ală ngai Dùl Lik mơ ală ngai Saƀat, jơh ală ngai pơjum sa neh lơh nền hìu Israel dê. Khai rơp rcang gơs ală phan ơn tơwài glài, ală phan ơn mơ kòi mbo, ală phan ơn chu pơrguc mơ ală phan ơn ring lơngai nàng tơwài glài hìu Israel in.”

Ală ngai wèr

¹⁸ Jehôwa Yàng Tom Trồ đơs be do: “Tòm ngai dùl kơnhai dùl mê pal kup dô nơm kơnrồ dam ò tềl sồt rmàñ nàng lơh goh tiah sàng goh.

¹⁹ Cau gơnoar ơn phan duh khoai ai mhàm bơh phan ơn tơwài glài mơ bong gơ hơđang ală jrong mpồng hìu duh khoai dê, hơđang poan mum pơnah bơtơl hơđang cơnòng ơn phan duh khoai, mơ hơđang ală jrong ală mpồng ƀlàng dơlam dê.

²⁰ Bol mê kung pal lơh ndròm bal behơ̆ tòm ngai dơ̆ poh tòm kơnhai kòp nă cau lơi in tìs glài ò git hala tài bơh bơrngơl gơla; behơ̆ bol mê tơwài glài hìu duh khoai in.

²¹ Tòm ngai jơt poan kơnhai dùl, mê pal kah prap ngai Lòt Gan la ngai pơjum sa tòm poh ngai, tòm ală ngai hơ̆ mê pal sa piang lă ò gơs kañ.

²² Tòm ngai hơ̆ cau bơtau pal rcang gơs dô nơm kơnrồ dam nàng lơh gơs phan ơn tơwài glài să tòm khai in mơ jơh làng bol tòm lơgar in.

²³ Kòp ngai tòm poh ngai pơjum sa hơ̆, khai pal rcang gơs poh nơm kơnrồ dam mơ poh nơm be dam ò gơs tềl sồt rmàñ nàng lơh gơs phan ơn chu pơrguc Yàng Jehôwa in, bal mơ dô nơm be dam nàng lơh gơs phan ơn tơwài glài.

²⁴ Khai pal rcang gơs dô epha phan ơn mơ kòi mbo jat bal kòp nơm kơnrồ dam mơ dô epha jat bal kòp nơm be dam, kung gơs dô hin mơñà tòm pơnjat bal mơ kòp epha.

²⁵ Tòm poh ngai pơjum sa rơp sơntòm tòm ngai jơt pram kơnhai poh, khai pal rcang gơs ală phan ndròm bal behơ̆ nàng lơh gơs ală phan ơn tơwài glài, ală phan ơn chu pơrguc, ală phan ơn ò gơs mhàm mơ mơñà.”