Ejekiel 44 - Sră Goh 2018

Ală cau ơm tòm tiah sàng goh

¹ Gen khai cèng añ wơl tus di mpồng pơnggàr bơdìh tiah sàng goh dê, la mpồng wèt hơ đah mattơngai lik, mpồng hơ̆ neh til.

² Yàng Jehôwa đơs mơ añ lah: “Mpồng pơnggàr do rơp lòi til sùm. Gơ ò geh pò; ò gơs cau lơi geh mut bơh mpồng do. Gơ pal lòi til sùm tài bơh Jehôwa la Yàng Tom Trồ Israel dê neh mut bơh mpồng hơ̆.

³ Mìng cau bơtau la cau rgơi nggui di đah dơlam gùng mpồng hơ̆ nàng sa di đap mat Yàng Jehôwa. Khai pal mut bơh di gùng ƀlàng rơng bơdìh mpồng pơnggàr dê, mơ khai kung pal lik bơh di gùng hơ̆.”

Bơta geh bơtơl tòm hìu duh khoai

⁴ Gen cau hơ̆ neh cèng añ tus di đap hìu duh khoai bơh gùng mpồng pơnggàr đah đang. Añ rmê sền mơ neh gŏ bơta gơklŏ Yàng Jehôwa dê ơm bềng lìu tòm hìu duh khoai Yàng Jehôwa dê, mơ añ gơpừ gơcup blup mat tòm ù.

⁵ Yàng Jehôwa đơs mơ añ lah: “Ơ kòn mơnus, sền tĕ loh làng, iat tĕ nền nền, mơ ơn tĕ nùs di kòp bơta mơ Añ yal mê in bơh ală bơta sồr lam gơwèt mơ hìu duh khoai Yàng Jehôwa dê. Sền tĕ nền ală cau geh gơnoar mut tòm hìu duh khoai mơ ală cau lơi lik bơh di tiah sàng goh.

⁶ Đơs tĕ mơ hìu jak tòmdră Israel dê lah: Do la jơnau đơs Jehôwa Yàng Tom Trồ dê: ‘Ơ hìu Israel, ală broă lơh iơh bol mê dê pal kòl pơndut!

⁷ Tòm bơta bơtơl làng bol bơdìh ò siat gơltau tòm nùs mơ tòm poac să, neh gơs tòm tiah sàng goh Añ jê, lơh ƀơ̆ ƀơl hìu duh khoai Añ jê tòm tŭ bol mê ơn pơdơng, phan sa Añ in, dơngi mơ mhàm. Bol mê sang lòi bơta ho bal Añ jê bal mơ jơh ală broă cù kìr bol mê dê.

⁸ Bol mê ò lơh wil tơl broă tòm bol mê dê gơwèt mơ ală phan sàng goh Añ jê, mơya bol mê neh bơtào ală cau làng bol bơdìh duh broă tòm tiah sàng goh Añ jê.’

⁹ Do la jơnau đơs Jehôwa Yàng Tom Trồ dê: ‘Ò gơs cau làng bơdìh lơi ò siat gơltau tòm nùs mơ tòm poac să geh mut tòm tiah sàng goh Añ jê, bulah la cau làng bơdìh neh kis digùl làng bol Israel kung behơ̆ sơl.

¹⁰ Tòm tŭ làng bol Israel lòt tìs nrah, ală cau Lebi neh lòt ngài bơh di Añ, sang lòi Añ mơ lòt jat ală rùp ràk gen bol khai pal kong cồng nha tồi glài bol khai dê.

¹¹ Bol khai rgơi duh broă tòm tiah sàng goh Añ jê, sền gàr ală mpồng pơnggàr hìu duh khoai dê mơ duh broă tềng hơ̆; bol khai tơnchơt ală phan ơn chu pơrguc mơ ală phan ơn làng bol dê, ntào di đap làng bol mơ duh broă.

¹² Tài bơh bol khai duh broă làng bol di đap ală rùp ràk mơ lơh hìu Israel gơtơmut tòm tồi glài, gen tàng Añ neh srat să gơwèt mơ bol khai lah bol khai rơp kong àñ bơta lơh glài bol khai dê, Jehôwa Yàng Tom Trồ đơs behơ̆.

¹³ Bol khai rơp ò geh tus rềp nàng duh broă Añ be ală cau gơnoar ơn phan duh khoai, kung ò tus rềp di dô nơm phan ơn sàng goh Añ jê, di ală phan ơn sàng goh ngan añ jê; bol khai pal kong bơta ƀàssìl bơh ală broă cù kìr bol khai dê.

¹⁴ Bulah behơ̆, Añ rơp bơtào bol khai duh broă tòm hìu duh khoai, lơh jơh ală broă pal lơh mơ jơh ală broă pal lơh sir tòm hơ̆.’”

Cau gơnoar ơn phan duh khoai Lebi

¹⁵ “Mơya ală cau gơnoar ơn phan duh khoai gơrê bal mơ cau Lebi jơi bơtiàn Jadôk dê, la cau dòn song duh broă tòm tiah sàng goh Añ jê, tòm tŭ làng bol Israel lòt tìs nrah bơh di Añ, rơp tus rềp dê Añ nàng duh broă di đap Añ; bol khai rgơi ntào di đap Añ nàng ơn phan ơn gơs dơngi mơ mhàm, Jehôwa Yàng Tom Trồ đơs behơ̆.

¹⁶ Mìng bol khai rgơi mut tòm tiah sàng goh Añ jê; mìng bol khai rgơi tus rềp di cơnòng Añ jê nàng duh broă di đap Añ mơ lơh ală broă Añ jê.

¹⁷ Tòm tŭ bol khai mut di ală mpồng ƀlàng dơlam dê, bol khai pal soh ồi ào mơ che dơmài; bol khai ò di soh ồi ào lơi mơ sơnò belàt tòm tŭ duh broă di ală mpồng ƀlàng dơlam dê hala tòm dơlam hìu duh khoai.

¹⁸ Bol khai pal pùt ală chèo mơ bài che dơmài gùt dar bồ bol khai dê, mơ ồi ào dơlam mơ che dơmài gùt dar but bol khai dê. Bol khai ò di soh phan lơi lơh bol khai in gơlik kơlhề.

¹⁹ Tòm tŭ bol khai lik di ƀlàng bơdìh la tiah gơs mat làng bol, bol khai pal hồ ồi ào mơ bol khai neh soh tòm tŭ duh broă tòm dơlam mơ lòi bol gơtòm ală ơdŭ ơn is sàng goh, mơ bol khai soh ală ồi ào ndai, tồ bol khai ò lơh làng bol in gơs sàng goh tài bơh ală ồi ào bol khai dê.

²⁰ Bol khai ò di koah bồ hala lòi sŏ jòng, mơya bol khai pal siat niam sŏ hơđang bồ bol khai dê.

²¹ Ò gơs cau gơnoar ơn phan duh khoai lơi ñô tơrnòm tòm tŭ mut tòm ƀlàng dơlam.

²² Bol khai ò di bau mơ cau ùr bơnrau hala cau ùr neh bau sang lòi; bol khai mìng bau mơ cau ơruh kòn sau Israel dê lơm hala mơ cau ùr bơnrau cau gơnoar ơn phan duh khoai dê.

²³ Bol khai pal bơto làng bol Añ jê git bơta krơi is digùl bơta sàng goh mơ bơta òs, mơ sơnio bol khai in git mbe cah is digùl bơta sàng goh mơ bơta ò sàng goh.

²⁴ Tòm tŭ gơs bơta tòm pơndang lơi, bol khai pal lơh be cau kwang cahrña, mơ bol khai pal lơh nền jat bơta cahrña Añ jê. Bol khai pal prap gàr bơta boh lam mơ ală bơta sồr lam Añ jê gơwèt mơ jơh ală ngai wèr neh lơh nền, mơ bol khai pal prap gàr sàng goh ală ngai Saƀat Añ jê.

²⁵ Bol khai ò di lơh khai in gơlik gơs ƀơ̆ ƀơl tài bơh tus rềp di dô nă cau chơt; bulah behơ̆, bơh bèp hala mè khai dê, mơ bơh kòn klau hala kòn ùr khai dê, mơ bơh oh mi hala ruh lŏ òhềt bau khai dê, gen khai rgơi gơlik ƀơ̆ ƀơl.

²⁶ Tơnơ̆ mơ tŭ khai neh geh lơh gơs sàng goh, khai pal gơn poh ngai.

²⁷ Tòm ngai khai lòt mut tòm ƀlàng dơlam tiah sàng goh dê nàng duh broă tòm tiah sàng goh, khai pal ơn phan ơn duh khoai tơwài glài să tòm khai in, Jehôwa Yàng Tom Trồ đơs behơ̆.

²⁸ Bơh phan jơtài gen Añ la phan jơtài bol khai dê. Bol mê rơp ò ai bol khai in sre brê lơi tòm Israel; Añ rơp la sre brê bol khai dê.

²⁹ Bol khai rơp sa ală phan ơn mơ kòi mbo, ală phan ơn tơwài bơta gơtup tìs mơ ală phan ơn tơwài glài, mơ jơh ală phan mơ cau Israel kòñ ơn Yàng Jehôwa in rơp gơrê bal mơ bol khai.

³⁰ Phan niam rlau jơh tòm jơh ală phan bồ sơnam, mơ jơh ală phan ơn krơi is mơ ală phan òs ơn bol mê dê rơp gơrê bal mơ ală cau gơnoar ơn phan duh khoai. Bol mê pal ai bol khai in pơnah phan sa sơnròp ngan gơlik bơh ù tồ hìu nhă bol mê dê geh lơngai lơngò.

³¹ Ală cau gơnoar ơn phan duh khoai ò di sa poac phan lơi, sềm hala phan poan jơng lơi neh chơt hala gơkòl crè poac bơh phan poan jơng tòm brê.”