Ejekiel 43 - Sră Goh 2018

Bơta gơklŏ gơrê wơl hơ hìu duh khoai

¹ Gen cau hơ̆ lam añ tus di mpồng pơnggàr wèt hơ đah mattơngai lik,

² mơ añ gŏ bơta gơklŏ Yàng Tom Trồ Israel dê tus bơh đah mattơngai lik. Sap Kơnràñ dê kơno tòm toh kung be ntas dà dờng nggồr, mơ ù tiah àng gơcrà bơh bơta gơklŏ Kơnràñ dê.

³ Bơta gơtơnggŏ añ neh gŏ hơ̆ tòm toh be bơta gơtơnggŏ mơ añ neh gŏ tòm tŭ Kơnràñ tus nàng tơnroh ƀòn dờng, mơ kung be ală bơta gơtơnggŏ mơ añ neh gŏ di gah hiòng Kebar, mơ añ gơpừ blup mat tòm ù.

⁴ Bơta gơklŏ Yàng Jehôwa dê mut tòm hìu duh khoai bơh di mpồng pơnggàr wèt hơ đah mattơngai lik.

⁵ Gen Hwềng yò añ tơngguh mơ cèng añ mut tòm ƀlàng dơlam; mơ bơta gơklŏ Yàng Jehôwa dê bềng lìu hìu duh khoai.

⁶ Tòm tŭ cau hơ̆ ntào di gah añ gen añ neh kơno gơs cau đơs mơ añ bơh tòm dơlam hìu duh khoai.

⁷ Khai đơs mơ añ lah: “Ơ kòn mơnus, do la tiah ơn sơbàn Añ jê, mơ la tiah ơn kơndòl jơng Añ jê. Do la tiah Añ rơp ơm sùm sùm digùl kòn sau Israel. Hìu Israel, bol khai hala ală cau bơtau bol khai dê, rơp ò tŭ lơi lơh ƀơ̆ ƀơl tai sơnđan sàng goh Añ jê bơh bơta dri tơlàr bol khai dê, mơ bơh ală rùp ràk ò gơs bơta kis ală cau bơtau bol khai dê hơđang ală tiah jơnhoa.

⁸ Tòm tŭ bol khai ơn mpồng bol khai dê di gah mpồng Añ jê, mơ ơn jrong mpồng bol khai dê di gah jrong mpồng Añ jê, gơs mìng dô nơm dơrñang lơm digùl Añ mơ bol khai, bol khai lơh ƀơ̆ iơh sơnđan sàng goh Añ jê bơh ală broă lơh cù kìr bol khai dê. Behơ̆ gen Añ tơnroh bol khai tòm bơta gơjrañ Añ jê.

⁹ Tŭ do lòi bol khai tă sang ngài bơh di Añ bơta duh khoai ală rùp ràk, mơ ală ƀồc ală bơtau bol khai dê, gen Añ rơp ơm digùl bol khai sùm sùm.

¹⁰ Ai mê, ơ kòn mơnus, yal tơlik tĕ hìu Israel in git bơh hìu duh khoai do, lòi bol khai was jat be sơnoa rnoas do, tồ bol khai in ƀàssìl bơh tồi glài bol khai dê.

¹¹ Tòm tŭ bol khai ƀàssìl bơh jơh ală broă bol khai neh lơh, gen mê pal yal bol khai in git bơta rcang lài bơh hìu duh khoai do, bơta rơndap tap sèng ală phan, ală gùng lik mơ ală gùng mut, mơ jơh ală bơta bal mơ gơ, jơh ală bơta sồr lam mơ ală bơta boh lam. Cih tĕ ală bơta hơ̆ di đap bol khai nàng bol khai in kơrhia mơ lơh jat jơh bơta rơndap mơ jat ală bơta sồr lam.

¹² Do la bơta boh lam hìu duh khoai dê: Jơh ală kơnhwàl gùt dar hơđang bồ mơnơm la tiah sàng goh ngan. Do la bơta boh lam hìu duh khoai dê.

Cơnòng duh khoai

¹³ Do la sơnoa rnoas cơnòng duh khoai dê jat ală tal jòng, hơ̆ la jòng rlau mơ tal òs dô nđàm. Mơnàng gơ jòng nggùl met mơ ơnàng nggùl met, rò gah kềng gùt dar gơs dô pơnah bơtơl ơnàng dô nđàm. Mơ do la gah jơnhoa cơnòng duh khoai dê:

¹⁴ Bơh di mơnàng gơ dê bơh ù guh tus di pơnah bơtơl hơđang jơnhoa dô met mơ ơnàng nggùl met, mơ bơh pơnah bơtơl dềt tus hơ pơnah bơtơl dờng gen jơnhoa bàr met mơ ơnàng nggùl met.

¹⁵ Pơnah dơlam cơnòng duh khoai jơnhoa bàr met, gơs poan nơm ngke gơ pò hơđang bơh di pơnah dơlam cơnòng.

¹⁶ Pơnah dơlam cơnòng duh khoai gơs poan mat ring bal, jòng ròt prau met mơ ơnàng prau met.

¹⁷ Pơnah bơtơl hơđang kung gơs poan gah ring bal, jòng ròt poh met mơ ơnàng poh met, gơs dô nơm gùng kềng ơnàng bàr nđàm nggùl mơ dô nơm ƀòng nggùl met. Ală kơnă ntùng gơ dê wèt hơ đah mattơngai lik.”

¹⁸ Gen khai đơs mơ añ lah: “Ơ kòn mơnus, Jehôwa Yàng Tom Trồ đơs lah: ‘Do la ală bơta sồr lam bơh phan ơn duh khoai chu pơrguc mơ bơh bơta rsìh mhàm hơđang cơnòng duh khoai tòm tŭ gơ neh geh bơt bơtào.’

¹⁹ ‘Mê pal ơn dô nơm kơnrồ dam lơh gơs phan ơn tơwài glài ală cau gơnoar ơn phan duh khoai in, hơ̆ la jơi bơtiàn Lebi gơrê bal mơ hìu nhă Jadok, la cau tus rềp mơ añ nàng duh broă di đap Añ,’ Jehôwa Yàng Tom Trồ đơs behơ̆.

²⁰ ‘Mê pal ai dô êt mhàm gơ mơ bong hơđang poan nơm ngke cơnòng duh khoai dê mơ hơđang poan mum pơnah kềng gùt dar cơnòng duh khoai dê, behơ̆ mê lơh goh cơnòng duh khoai mơ ơn phan ơn tơwài glài gơ in.

²¹ Mê pal cèng kơnrồ dam neh lơh gơs phan ơn tơwài glài mơ chu gơtòm tiah ơn is gơrê bal mơ hìu duh khoai, đah bơdìh tiah sàng goh.

²² Tòm ngai bàr, mê pal ơn dô nơm be dam ò tềl sồt rmàñ lơh phan ơn tơwài glài, mơ cơnòng duh khoai pal lơh gơs sàng goh kung be gơ gơs sàng goh bal mơ kơnrồ dam behơ̆ sơl.

²³ Tòm tŭ mê neh sir lơh sàng goh gơ in rau, gen pal ơn dô nơm kơnrồ dam mơ dô nơm be dam kup bơh tòm mpồl, jơh bàr nơm phan hơ̆ pal ò gơs tềl sồt rmàñ.

²⁴ Mê rơp ơn bàr nơm phan hơ̆ di đap Yàng Jehôwa, mơ ală cau gơnoar ơn phan duh khoai pal rsìh boh hơđang bol gơ, mơ ơn bol gơlơh gơs phan ơn chu pơrguc Yàng Jehôwa in.

²⁵ Tòm poh ngai, mê pal rcang kòp ngai dô nơm be dam nàng lơh gơs phan ơn tơwài glài; mê kung rcang gơs dô nơm kơnrồ dam mơ dô nơm be dam kup bơh tòm mpồl, bol gơ pal ò gơs tềl sồt rmàñ.

²⁶ Tòm poh ngai, bol gơ pal geh ơn lơh gơs phan ơn tơwài glài cơnòng duh khoai in mơ lơh gơ in gơs sàng goh; mơ behơ̆ ơn is gơ.

²⁷ Tus di lồi ală ngai hơ̆, rơp sơntòm bơh ngai phàm, ală cau gơnoar ơn phan duh khoai pal ơn phan ơn duh khoai chu pơrguc mơ phan ơn bơta ring lơngai bol mê dê hơđang cơnòng duh khoai. Gen Añ rơp dòp rò bol mê, Jehôwa Yàng Tom Trồ đơs behơ̆.’”