Ejekiel 40 - Sră Goh 2018

Bơta tơnggŏ hìu duh khoai pa

¹ Tòm nam bàr jơt pram tơnơ̆ mơ tŭ bol hi kong kup cèng pơrdô, tòm bồ sơnam, ngai jơt tòm kơnhai, hơ̆ la nam dơ̆ jơt poan tơnơ̆ mơ tŭ ƀòn dờng kong tơrlah, tòm ngai hơ̆, tê Yàng Jehôwa ơn hơđang añ; mơ Kơnràñ cèng añ tus tềng hơ̆.

² Tòm ală bơta gơtơnggŏ Yàng Tom Trồ dê, Kơnràñ cèng añ tus tòm lơgar Israel, mơ ơn añ hơđang dô nơm mơnơm jơnhoa ngan, bơh hơđang hơ̆ añ sền gŏ hơ đah đơm gơlơh be dô nơm ƀòn dờng gơs oă hìu.

³ Kơnràñ neh cèng añ tus tềng hơ̆ mơ añ gŏ dô nă cau gơs rùp să kung be kòng. Cau hơ̆ ntào di gùng mpồng pơnggàr, at tòm tê dô dang che brài mơ dô nơm gai was mơ proh.

⁴ Khai đơs mơ añ lah: “Ơ kòn mơnus, ai tĕ mat sền nền, ai tĕ tồr iat nền, mơ ơn tĕ nùs kơlôi bơh kòp bơta mơ añ rơp sơnio mê in, bơh hơ̆ la tơnggume mơ mê geh cèng tus tềng do; yal wơl tĕ hìu Israel in jơh ală bơta mê gŏ.”

Mpồng Đah Mattơngai Lik tus hơ Ƀlàng Bơdìh

⁵ Añ gŏ dô nơm dơrñang gùt dar tiah bơt hìu duh khoai. Gai was khai at tòm tê la prau tal jòng, kòp tal jòng rlau mơ tal òs dô nđàm. Khai was dơrñang đah lơut la dô gai, mơ đah jơnhoa kung dô gai.

⁶ Gen khai lòt tus di mpồng pơnggàr đah mattơngai lik. Khai cơnđòa digùl ală kơnă ntùng mơ was ròc mpồng pơnggàr dê; gơ jrô dô gai.

⁷ Ală ơdŭ cau ling kơp gàr dê gơs dô gai jòng mơ dô gai ơnàng, mơ tiah pah digùl ơdŭ mut dơlam, la pram tal; mơ ròc mpồng pơnggàr di gah mpồng rơng wèt song hơđap hìu duh khoai gơs dô gai jrô.

⁸ Gen khai was mpồng rơng gùng mpồng pơnggàr dê.

⁹ Gen gơ jrô phàm tal, mơ ală jrong mpồng gơ dê lơut bàr tal. Mpồng rơng gùng mpồng pơnggàr dê wèt mat hơ hìu duh khoai.

¹⁰ Tòm dơlam mpồng pơnggàr đah mattơngai lik gơs pe nơm ơdŭ cau ling kơp gàr hơđang kòp gah, jơh pe nơm ơdŭ hơ̆ jòng ơnàng ndròm bal, mơ đah mat ală dơrñang mpòl digùl kòp gah gơs jòng ơnàng ndròm bal.

¹¹ Gen khai was đah ơnàng gùng mpồng pơnggàr dê, gơ gơs jơt tal, mơ đah jòng la jơt pe tal.

¹² Di đap kòp nơm ơdŭ cau ling kơp gàr dê gơs dô nơm dơrñang jơnhoa dô tal; mơ ală ơdŭ cau ling kơp gàr dê gơs prau tal poan đah ndròm bal.

¹³ Gen khai was gùng mpồng pơnggàr bơh bồ dơrñang đah ngkòi ơdŭ do tus dê dơrñang đah ngkòi ơdŭ ne; la bàr jơt pram tal, mpồng do tòm toh mat mơ mpồng ne.

¹⁴ Khai kung was ală ơdŭ bơdìh, gơs bàr jơt tal, mơ mpồng rềp di jrong hơ̆ kòp đah tòm ƀlàng.

¹⁵ Bơh di đap mpồng di gùng mut tus di tiah lồi ơdŭ dơlam la pram jơt tal.

¹⁶ Ơdŭ gơmut dơlam mơ ală jrong gơ dê gơs ală mpồng dềt, mơ ală kai kal đah dơlam gùt dar ală mpồng, mơ tòm ală ơdŭ kung gơs mpồng dềt gùt dar đah dơlam; mơ hơđang ală jrong la rùp ală chi gòl.

Ƀlàng Bơdìh

¹⁷ Lồc behơ̆, khai lam añ tus tòm ƀlàng bơdìh. Tềng hơ̆ añ gŏ gơs ală ơdŭ, gùt dar ƀlàng jơng gùng gơs gùng sap mơ lŭ gùt dar ƀlàng, rò gah gùng sap lŭ hơ̆ gơs pe jơt nơm ơdŭ.

¹⁸ Gùng sap lŭ hơ̆ jat rò gah ală mpồng pơnggàr dê, đah jòng ndròm mơ mpồng ƀòn; hơ̆ la gùng lòt hơđơm sap mơ lŭ.

¹⁹ Gen khai was đah jòng bơh di đah dơlam gùng mpồng pơnggàr gah hơđơm tus di đah bơdìh ƀlàng dơlam dê, gơ gơs dô rhiang tal ndròm bal.

Mpồng Đah Đang

²⁰ Gen khai was gah jòng mơ gah ơnàng mpồng pơnggàr wèt hơ đah đang, lam tus hơ ƀlàng bơdìh.

²¹ Bàr gah mpồng ƀòn, kòp đah gơs pe nơm ơdŭ, ală jrong mơ ală ơdŭ cau ling kơp gàr dê tềng hơ̆, sơnoa rnoas ndròm bal mơ mpồng sơnròp: jòng bàr jơt pram met, ơnàng jơt bàr met nggùl.

²² Ală mpồng dềt, ală rơng mpồng mơ ală chi gòl gơ dê gơs gah jòng mơ gah ơnàng ndròm bal mơ mpồng pơnggàr đah mattơngai lik. Gơs poh kơnă ntùng lam guh tus hơ mpồng ƀòn; mơ gơs dô nơm rơng tòm dơlam hơ̆.

²³ Tòm toh mơ mpồng pơnggàr đah đang mơ mpồng dờng đah mattơngai lik la mpồng dờng lam mut tus hơ ƀlàng rơng dơlam; khai was bơh mpồng do tus hơ mpồng hơ ne, la pram jơt met.

Mpồng Đah Đơm

²⁴ Gen khai lam añ tus di đah hơđơm mơ añ gŏ dô nơm mpồng pơnggàr wèt hơ đah hơđơm. Khai was ală jrong mơ ală mpồng rơng gơ dê, mơ gơ gơs jòng ơnàng ndròm bal.

²⁵ Ơdŭ bơdìh hơ̆ gơs ală mpồng dềt tòm toh be ală mpồng dềt ndai. Gơ jòng bàr jơt pram met mơ ơnàng jơt bàr met nggùl.

²⁶ Poh kơnă ntùng guh tus hơ mpồng dờng, ƀlàng rơng tòm dơlam gơ; ală jrong gơs ală rùp chi gòl jơh bàr đah mat.

²⁷ Ƀlàng dơlam kung gơs dô nơm mpồng wèt hơ đah đơm, mơ khai was bơh di mpồng hơ̆ tus di mpồng bơdìh đah hơđơm, gơs dô rhiang tal.

Ƀlàng Dơlam

²⁸ Gen khai cèng añ tus tòm ƀlàng dơlam bơh mpồng dờng đah đơm, mơ khai was mpồng pơnggàr đah đơm, gơ gơs dờng ơnàng ndròm bal mơ gơp.

²⁹ Ală ơdŭ, ală jrong mơ ală ƀlàng rơng gơ dê sơnoa rnoas ndròm bal mơ gơp gơ dê. Gùng mpồng pơnggàr mơ ală ƀlàng rơng gơ dê gơs ală mpồng dềt gùt dar. Ală ƀlàng rơng jòng ròt bàr jơt pram met, mơ ơnàng jơt bàr met nggùl.

³⁰ Gùt dar gơs ală ƀlàng rơng jòng ròt jơt bàr met nggùl, ơnàng bàr met nggùl.

³¹ Ală ƀlàng rơng wèt mat hơ ƀlàng bơdìh; gơs ală rùp tòm chi gòl hơđang ală jrong gơ dê, mơ gơs phàm kơnă ntùng nàng guh tus hơđang.

³² Lồc behơ̆ khai cèng añ tus tòm ƀlàng dơlam đah mattơngai lik, khai was gùng mpồng pơnggàr, gơ gơs sơnoa rnoas ndròm bal mơ gơp.

³³ Ală ơdŭ, ală jrong mơ ală ƀlàng rơng gơ dê gơs jòng ơnàng ndròm bal mơ gơp. Gùng mpồng pơnggàr bal mơ ƀlàng rơng gơ dê gơs ală mpồng dềt gùt dar. Ală ƀlàng rơng jòng bàr jơt pram met mơ ơnàng jơt bàr met nggùl.

³⁴ Ƀlàng rơng mpồng pơnggàr do wèt mat tòm toh hơ ƀlàng bơdìh; gơs ală chi gòl bơka hơđang ală jrong gơ dê jơh bàr đah, mơ gơs phàm kơnă ntùng nàng guh tus hơđang.

³⁵ Gen khai cèng añ tus hơ gùng mpồng pơnggàr đah đang mơ was gơ. Gơ jòng mơ ơnàng ndròm bal mơ ală mpồng pơnggàr ndai,

³⁶ kung be ală ơdŭ mơ ală jrong mơ ală ƀlàng rơng gơ dê, mơ gơ gơs ală mpồng dềt gùt dar gơ. Gơ jòng ròt bàr jơt pram met mơ ơnàng jơt bàr met nggùl.

³⁷ Ală ƀlàng rơng gơ dê wèt mat hơ ƀlàng bơdìh; gơs ală chi gòl bơka ală jrong ơm bàr gah, mơ gơs phàm kơnă ntùng nàng guh tus hơđang.

Ală ơdŭ ngui nàng rcang ală phan ơn duh khoai

³⁸ Dô nơm ơdŭ gơs mpồng ơm di gah mpồng rơng mpồng pơnggàr dê, la tiah cau rào ală phan ơn duh khoai chu pơrguc.

³⁹ Tòm ƀlàng rơng gùng mpồng pơnggàr dê gơs bàr nơm cơnòng ơn phan tòm kòp đah, hơđang hơ̆ cau sreh tơnchơt ală phan ơn duh khoai chu pơrguc, ală phan ơn duh khoai tơwài glài bơta gơtup tìs mơ ală phan ơn duh khoai tơwài glài.

⁴⁰ Đah bơdìh ƀlàng rơng rềp tiah guh hơ gùng mpồng pơnggàr đah đang dê, gơs bàr nơm cơnòng ơn phan, đah ne ƀlàng jơng gùng mpồng pơnggàr kung gơs bàr nơm cơnòng ơn phan.

⁴¹ Behơ̆ gơs poan nơm cơnòng ơn phan đah do mpồng pơnggàr dê mơ poan nơm di đah ne, jơh ală la phàm nơm, hơđang ală cơnòng hơ̆ cau sreh tơnchơt ală phan ơn duh khoai.

⁴² Kung gơs poan nơm cơnòng mơ lŭ poan mat ngui nàng ơn phan ơn duh khoai chu pơrguc, kòp nơm jòng nggùl met, ơnàng poh jơt pram sentimet, mơ jơnhoa nggùl met. Cau ơn ală phan ngui nàng sreh tơnchơt ală phan ơn duh khoai chu pơrguc hơđang hơ̆, bal mơ ală phan ơn duh khoai ndai.

⁴³ Ală gai kơlnĕ ơnàng dô mpàng tê, geh yồng làm gùt dar dơrñang. Ală poac ơn duh khoai pal ơn hơđang cơnòng ơn phan.

Ală ơdŭ ală cau gơnoar ơn phan duh khoai in

⁴⁴ Đah bơdìh mpồng pơnggàr dơlam, gơs ală ơdŭ ală cau đơs chò in, dô nơm rềp di gah mpồng pơnggàr đah đang mơ wèt mat hơ đah đơm, mơ dô nơm ndai rềp di gah mpồng pơnggàr đah đơm mơ wèt mat hơ đah đang.

⁴⁵ Khai đơs mơ añ lah: “Ơdŭ wèt mat hơ đah đơm lòi is ală cau gơnoar ơn phan duh khoai in la ală cau duh broă tòm hìu duh khoai,

⁴⁶ mơ ơdŭ wèt mat hơ đah đang lòi is ală cau gơnoar ơn phan duh khoai la cau duh broă di cơnòng duh khoai. Hơ̆ la ală kòn klau Jadôk dê, mìng ală cau Lebi lơm rgơi tus rềp di Yàng Jehôwa nàng duh broă di đap Kơnràñ.”

⁴⁷ Gen khai was ƀlàng hìu duh khoai dê, gơ gơs poan gah ring bal, jòng ròt pram jơt met mơ ơnàng pram jơt met. Mơ cơnòng duh khoai geh ơn di đap hìu duh khoai.

Hìu duh khoai

⁴⁸ Khai cèng añ tus di ƀlàng rơng hìu duh khoai dê, mơ was ală jrong ƀlàng rơng dê, kòp gah ơnàng bàr met nggùl. Gah ơnàng mpồng pơnggàr dê poh met mơ đah jrô mpồng pơnggàr kòp đah la dô met nggùl.

⁴⁹ Ƀlàng rơng jòng ròt jơt met, đah ơnàng pram met nggùl. Gơs ntùng jơt kơnă lam guh tus hơ ƀlàng rơng dơlam mơ di gah jrong gơs bàr nơm jrong, kòp đah dô nơm jrong.