Ejekiel 4 - Sră Goh 2018

Jơnau đơs hwơr bơta tơrlah tơrlơm Jerusalem dê

¹ “Ai mê, ơ kòn mơnus, ai tĕ dô nơm gac, ơn gơ di đap mê, mơ cih rùp ƀòn dờng Jerusalem hơđang hơ̆.

² Lồc behơ̆ gơrwàng gơ; rơndap bơta gơrwàng tòmdră mơ gơ, bơt dô nơm dơrñang gùt dar gơ; bơtào sàl ling tòmlơh mơ gơ, mơ ơn ală phan phà tơrlah dơrñang gùt dar gơ.

³ Gen ai tĕ dô nơm chàng mơ lòs, ơn gơlơh gơs dô nơm dơrñang lòs digùl mê mơ ƀòn dờng; lồc behơ̆ mê wèt mat di gơ. Gơ rơp kong gơrwàng, mơ mê rơp gơrwàng gơ. Hơ̆ rơp la dô nơm tềl hìu Israel in.

⁴ Gen mê rơp bic sơrkềng să đah kiau, mơ ơn bơta lơh glài hìu Israel dê hơđang să tòm mê. Mê pal àñ ơnòng bơta lơh glài bol khai dê tòm nđò ngai mê bic sơrkềng să behơ̆.

⁵ Añ neh lơh nền mê in khà ngai ndròm bal mơ khà nam bơta lơh glài bol khai dê. Behơ̆ tòm pe rhiang sin jơt ngai mê rơp àñ ơnòng bơta lơh glài hìu Israel dê.

⁶ Tơnơ̆ mơ tŭ mê neh lơh sir bơta hơ̆ gen mê pal bic sơrkềng să đah ma mơ àñ ơnòng bơta lơh glài hìu Juda dê. Añ neh lơh nền mê in tòm poan jơt ngai, dô ngai ala dô nam.

⁷ Wèt tĕ mat hơ bơta gơrwàng Jerusalem bal mơ tơwòr tê kuh đơs hwơr tòmdră mơ gơ.

⁸ Añ rơp ngui che cap mê, behơ̆ mê ò rgơi pơrlac bơh đah do hơ đah ne jơl tus di tŭ mê neh sir ală ngai gơrwàng ƀòn mê dê.

⁹ Ai tĕ kòi mi mơ kòi brà, khoah mơ biap, dơngòi, kòi mac, ơn bal tòm dô nơm yang, ngui gơlơh gơs ƀañ să tòm mê in. Mê rơp sa ƀañ hơ̆ tòm pe rhiang sin jơt ngai mơ mê bic sơrkềng dô đah.

¹⁰ Kơr tĕ bàr jơt sieklơ phan sa nàng sa kòp ngai mơ sa tĕ jat ală tŭ jơ neh lơh nền.

¹¹ Kung was tĕ prau hin dà hùc mơ hùc tĕ jat ală tŭ jơ neh lơh nền.

¹² Sa tĕ phan sa hơ̆ kung be sa ƀañ kòi brà, buh tĕ gơ di đap làng bol, mơ è kòn mơnus.”

¹³ Yàng Jehôwa đơs lah: “Kung behơ̆, làng bol Israel rơp sa phan sa ƀơ̆ ƀơl digùl ală lơgar mơ Añ rơp bơtrơh bol khai lòt tus.”

¹⁴ Gen añ đơs lah: “Ò di behơ̆, ơ Yàng Jehôwa At Bồ Hơđang Jơh, añ ò tŭ lơi lơh ƀơ̆ ƀơl să tòm añ. Bơh tŭ kơnòm să tus tŭ do, añ ò tŭ lơi sa phan chơt is hala kong phan brê crè poac. Ò tŭ lơi gơs poac ò goh lơi mut tòm bơr añ jê.”

¹⁵ Kơnràñ đơs lah: “Behơ̆, Añ rơp lòi mê in buh piang lă mê dê hơđang ồs è kơnrồ ala è kòn mơnus.”

¹⁶ Gen Kơnràñ đơs tai mơ añ lah: “Ơ kòn mơnus, Añ rơp tă jơh ală phan ngui sa tòm Jerusalem. Làng bol rơp kơr ƀañ nàng sa tòm bơta rngòt rngơt, mơ was dà nàng hùc tòm bơta gơdô nùs,

¹⁷ bơh phan sa mơ dà hùc rơp ò gam oă, bol khai rơp rngòt rơm să rmê mat bal mơ gơp, mơ siar roh tài bơh bơta lơh glài bol khai dê.”