Ejekiel 36 - Sră Goh 2018

Bơta Ai Lơngai Hơđang Israel

¹ Ơ kòn mơnus, đơs hwơr tĕ bơh ală mơnơm Israel dê mơ đơs lah: “Ơ ală mơnơm Israel, iat tĕ jơnau Yàng Jehôwa dê!

² Jehôwa Yàng Tom Trồ đơs be do: Tài bơh ală cau sò tơm neh đơs bơh bol mê lah: ‘Aha! Ală dòr jơnhoa rài yau neh gơlik gơs phan tòm bol he dê!’”

³ Gen tàng, đơs hwơr tĕ mơ đơs lah: “Jehôwa Yàng Tom Trồ đơs be do: ‘Tài bơh bol khai ngan neh phà tơnroh mơ sò tơm bol mê bơh kòp đah tồ lơh bol mê in gơlik gơs phan tòm gơrê bal mơ ală làng bol gam wơl tòm ală lơgar, mơ gơlik gơs phan đơs bơrsèl tơnhial mơ bơtat bơtròh digùl ală làng bol,’

⁴ gen tàng, ơ ală mơnơm Israel dê, iat tĕ jơnau Jehôwa Yàng Tom Trồ: ‘Jehôwa Yàng Tom Trồ đơs be do mơ ală mơnơm mơ ală dòr, mơ ală croh dà mơ ală thòng mơ ală tiah sang lòi ngềt ngơt, mơ ală ƀòn dờng ò gơs cau ơm, neh gơlik gơs phan phà kơñau mơ dơñŏ tơnhial jơh ală làng bol gam wơl gùt dar in.’

⁵ Gen tàng Jehôwa Yàng Tom Trồ đơs be do: ‘Añ neh đơs tòm bơta ƀoah pơrhiat dờng Añ jê, tòmdră mơ ală làng bol gam wơl, tòmdră mơ jơh Edôm, la ală cau neh jơh nùs hòn chò sền òsơp, neh tòmpìt ù tiah Añ jê lơh gơs phan tòm bol khai dê, nàng tòmpìt ai ƀlàng ñhơt gơ dê.’

⁶ Gen tàng, đơs hwơr tĕ bơh lơgar Israel mơ đơs mơ ală mơnơm, ală dòr, ală croh dà mơ ală thòng lah: ‘Jehôwa Yàng Tom Trồ đơs be do: Añ đơs tòm bơta ƀoah gơjrañ añ jê tài bơh bol mê neh kong jê sồt tòm bơta bơtat bơtròh ală lơgar dê.’

⁷ Gen tàng, Jehôwa Yàng Tom Trồ đơs be do lah: ‘Añ srat să lah jơh ală lơgar gùt dar mê kung rơp kong bơta jê sồt mơ bơtat bơtròh să tòm bol khai in!

⁸ Mơya bol mê, ơ ală mơnơm Israel dê, bol mê rơp cat ală ntê mơ gơlik plai làng bol Israel Añ in; bơh gam dô êt tai gen bol khai rơp rê hìu.

⁹ Tŭ do sền tĕ, Añ bơh bol mê, mơ rơp wèt hơ bol mê; bol mê rơp geh lơòr mơ geh sih gar,

¹⁰ mơ Añ rơp ai bơtơl oă khà làng bol bol mê dê, hơ̆ la jơh hìu Israel dê. Ală ƀòn rơp gơs cau ơm, mơ ală tiah tơrlah tơrlơm rơp geh bơt bơtào wơl.

¹¹ Añ rơp ai bơtơl khà kòn mơnus mơ phan poan jơng hơđang bol mê, bol khai rơp gơbơtơl mơ gơlik oă. Añ rơp lơh mê in gơs làng bol ơm kung be lài òr, mơ ai bol mê in oă bơta niam rlau mơ lài òr. Gen bol mê rơp git Añ la Yàng Jehôwa.

¹² Añ rơp tề lam làng bol ơm hơđang mê, hơ̆ la làng bol Israel Añ jê, bol khai rơp geh mê lơh gơs phan tòm; mơ mê rơp lơh gơs sre brê bol khai dê, mơ mê rơp ò tŭ lơi lơh roh kòn sau bol khai dê tai.’”

¹³ Jehôwa Yàng Tom Trồ đơs be do: “Tài bơh bol khai đơs mơ mê lah: ‘Mê sa loan cau, mơ lơh roh lơgar kòn sau gơ dê,’

¹⁴ gen tàng mê rơp ò tŭ lơi sa loan cau tai hala lơh lơgar bol mê dê kơnền, Jehôwa Yàng Tom Trồ đơs behơ̆.

¹⁵ Añ rơp ò tŭ lơi lòi mê kơno ală jơnau lah sơrpah ală lơgar dê tai; mê rơp ò gam kong bơta bơtat bơtròh ală làng bol dê tai, mơ ò tai lơh lơgar mê dê gơkòl tơnroh, Jehôwa Yàng Tom Trồ đơs behơ̆.”

Bơta bơtào wơl làng bol Israel

¹⁶ Gơs jơnau Yàng Jehôwa đơs mơ añ lah:

¹⁷ “Ơ kòn mơnus, tòm tŭ làng bol Israel ơm tòm ù tòm bol khai dê, bol khai neh lơh ƀơ̆ ƀơl gơ bơh gùng dà mơ broă lơh bol khai dê. Bơta lơh lòt bol khai dê di đap mat Añ la kung be bơta ƀơ̆ ƀơl kòp kơnhai dô nă cau ùr dê.

¹⁸ Behơ̆ Añ neh tuh bơta gơjrañ dờng añ jê hơđang bol khai tài bơh bol khai neh lơh gơhòr mhàm tòm lơgar, mơ bơh bol khai neh lơh ƀơ̆ ƀơl lơgar hơ̆ bơh rùp ràk bol khai dê.

¹⁹ Añ neh lơh gơprah gơpring bol khai digùl ală làng bol, mơ bol khai neh kong rsìh tòm ală lơgar; Añ neh cahrña bol khai jat bơta lơh lòt bol khai dê

²⁰ Mơya tòm tŭ bol khai neh tus hơ ală làng bol, bol khai neh lơh cau in sền òsơp di sơnđan sàng goh Añ jê, bơh bơta hơ̆ cau neh đơs bơh bol khai lah: ‘Do la làng bol Yàng Jehôwa dê bulah behơ̆ bol khai pal lik lòt bơh di lơgar Kơnràñ dê!’

²¹ Mơya Añ neh kơlôi bơh sơnđan sàng goh Añ jê mơ hìu Israel neh lơh cau sền òsơp digùl ală làng bol la tiah bol khai neh lòt tus.

²² Behơ̆ gen đơs tĕ mơ hìu Israel lah: ‘Jehôwa Yàng Tom Trồ đơs be do: Ơ hìu Israel, hơ̆ ò di la tài bơh bol mê mơ Añ rơp lơh ală bơta do, mơya hơ̆ la tài bơh sơnđan sàng goh Añ jê, la sơnđan mơ bol mê neh lơh cau in sền òsơp digùl ală làng bol mơ bol mê neh lòt tus.

²³ Añ rơp lơh sàng goh sơnđan dờng Añ jê, la sơnđan neh gơkòl cau sền òsơp digùl ală làng bol, sơnđan mơ bol mê neh lơh cau sền òsơp digùl bol khai. Gen ală làng bol rơp git Añ la Yàng Jehôwa tòm tŭ añ bơh bol mê mơ ràng tơlik bơta sàng goh Añ jê di đap bol khai, Jehôwa Yàng Tom Trồ đơs behơ̆.

²⁴ Bơh Añ rơp tă bol mê bơh di ală làng bol mơ tơrgòm bol mê bơh di jơh ală lơgar mơ cèng bol mê mut tòm lơgar tòm bol mê dê.

²⁵ Añ rơp rsìh dà sàng goh hơđang bol mê; mơ bol mê rơp geh sàng goh; Añ rơp lơh bol mê in goh jơh bơh di ală bơta ƀơ̆ ƀơl bol mê dê mơ bơh di jơh ală rùp ràk bol mê dê.

²⁶ Añ rơp ai bol mê in dô nơm nùs pa, mơ ơn dô nơm hwềng pa tòm bol mê; Añ rơp tă nùs mơ lŭ bơh di bol mê, mơ ai bol mê in nùs mơ poac.

²⁷ Añ rơp ơn Hwềng Añ tòm bol mê, mơ lơh bol mê in lòt jat bơta sồr lam Añ jê, mơ kơrhia prap gàr ală bơta boh lam Añ jê.

²⁸ Bol mê rơp ơm tòm lơgar mơ Añ neh ai ồng pàng bol mê in; bol mê rơp lơh gơs làng bol Añ jê, mơ Añ rơp lơh gơs Yàng Tom Trồ bol mê dê.

²⁹ Añ rơp dong tă bol mê klàs bơh di ală bơta ƀơ̆ iơh bol mê dê. Añ rơp ai kòi mbo mơ lơh gơ in gơlik gơs oă, mơ rơp ò tơndùh bơta jơgloh rung hơđang bol mê.

³⁰ Añ rơp ai bơtơl oă plai hơđang ală chi mơ oă kòi mbo hơđang ală mìr sre tồ bol mê in ò tai kong sền òsơp digùl ală làng bol tài bơh bơta jơgloh rung.

³¹ Gen bol mê rơp kah wơl ală gùng dà iơh mơ ală broă lơh bơsak bol mê dê, mơ bol mê rơp cù kìr di să tòm bol mê bơh ală tồi glài mơ broă lơh iơh rmơh bol mê dê.’

³² ‘Añ kòñ bol mê git la Añ ò di bơh bol mê mơ Añ lơh behơ̆,’ Jehôwa Yàng Tom Trồ đơs behơ̆. ‘Ơ hìu Israel, pal git ƀàssìl mơ rngòt rngơt bơh gùng dà bol mê dê!’

³³ Jehôwa Yàng Tom Trồ đơs be do: ‘Tòm ngai mơ Añ lơh goh bol mê bơh di jơh ală tồi glài bol mê dê, Añ rơp lơh ƀòn dờng gơs cau ơm, mơ ală tiah srau gòi rơp geh bơt bơtào wơl.

³⁴ Ù tiah lòi srau rơp geh troă lơòr, ò tai sang lòi ngềt ngơt di đap jơh ală cau lòt gan gơ.

³⁵ Bol khai rơp đơs lah: “Ù tiah lòi srau do neh gơlik gơs kung be suơn Eden; ală ƀòn dờng tơrlah tơrlơm, sang lòi ngềt ngơt, mơ gơkòl tơnroh, tŭ do neh geh bơtào kơ̆ mơ gơs làng bol ơm!”

³⁶ Gen ală làng bol gam wơl gùt dar bol mê rơp git lah Añ, Yàng Jehôwa, neh bơt bơtào wơl tiah kong tơnroh, mơ neh tam wơl tiah neh kong lòi srau gòi. Añ, Yàng Jehôwa neh đơs behơ̆, mơ Añ rơp lơh behơ̆.’

³⁷ Jehôwa Yàng Tom Trồ đơs be do: ‘Añ kung rơp lòi hìu Israel dan Añ lơh bơta do bol khai in: Añ rơp bơtơl khà làng bol bol khai in gơlik gơs oă be mpồl belàt.

³⁸ Be mpồl belàt lơh gơs phan ơn pơdơng, be mpồl belàt tòm Jerusalem tòm ală ngai pơjum sa neh lơh nền gơ dê, behơ̆ ală ƀòn dờng tơrlah tơrlơm rơp geh bềng lìu ală mpồl làng bol. Gen bol khai rơp git Añ la Yàng Jehôwa.’”