Ejekiel 35 - Sră Goh 2018

Jơnau đơs hwơr tòmdră mơ Edôm

¹ Gơs jơnau Yàng Jehôwa dê đơs mơ añ lah:

² “Ơ kòn mơnus, wèt tĕ mat tòmdră mơ mơnơm Seir, đơs hwơr tĕ tòmdră mơ gơ,

³ mơ đơs mơ gơ lah: Jehôwa Yàng Tom Trồ đơs be do: ‘Ơ mơnơm Seir, Añ tòmdră mơ mê! mơ Añ rơp pò tê tòmdră mơ mê, lơh mê in gơlik gơs dô bă tiah srau gòi mơ ngềt ngơt.

⁴ Añ rơp lơh tơrlah tơrling ală ƀòn dờng mê dê mơ mê rơp gơlik gơs tiah srau gòi. Gen mê rơp git Añ la Yàng Jehôwa.

⁵ Tài bơh mê gam prap dô bơta gơjrañ bơh yau mơ neh jào phi cau Israel tòm gơnoar pềs tà tòm ngai rung rài bol khai dê, tŭ tơngai bơta lơh glài lồi dut bol khai dê,’

⁶ gen tàng, Jehôwa Yàng Tom Trồ đơs lah: ‘Di ngan be Añ kis, Añ rơp jào bol mê tòm mhàm, mơ mhàm rơp ting jat bol mê. Bơh di tŭ mê ò gơjrañ di bơta gơhòr mhàm, gen bơta gơhòr mhàm rơp ting jat mê.

⁷ Añ rơp lơh mơnơm Seir in gơlik gơs tiah srau gòi, mơ kơryan jơh ală cau mut mơ lik bơh di gơ.

⁸ Añ rơp lơh ală mơnơm gơ dê bềng ƀồc ală cau kong tơnchơt; ală cau gơkòl sreh tơnchơt bơh đào rơp gơpừ hơđang ală dòr mê dê, tòm ală thòng mơ tòm jơh ală croh dà mê dê.

⁹ Añ rơp lơh mê in gơlik gơs tiah srau gòi sùm sùm; ală ƀòn dờng mê dê rơp ò gơs làng bol ơm tai, gen mê rơp git Añ la Yàng Jehôwa.

¹⁰ Tài bơh mê neh đơs lah: “Bàr làng bol hơ̆ mơ bàr nơm lơgar hơ̆ rơp gơrê bal mơ bol hi, mơ bol hi rơp dòp bol gơlơh gơs phan tòm,” bulah Yàng Jehôwa neh ơm tềng hơ̆;’

¹¹ gen tàng Jehôwa Yàng Tom Trồ đơs lah: ‘Di ngan be Añ kis, Añ rơp lơh di mê jat bơta gơhào gơjrañ mơ bơta ƀoah mơ mê ràng tơlik bơh bơta mê gơjrañ tòmdră mơ bol khai, mơ Añ rơp ràng tơlik să tòm Añ digùl bol mê tòm tŭ Añ cahrña mê.

¹² Gen mê rơp git Añ, la Yàng Jehôwa, neh kơno jơh ală jơnau bơtat bơtròh mê neh đơs tòmdră mơ ală mơnơm Israel dê. Mơ neh đơs lah: “Ală mơnơm hơ̆ neh gơkòl lòi srau gòi mơ neh jào phi bol he in nàng sa loan.”

¹³ Mê neh ngui bơr nàng jòng să tòmdră mơ Añ, mơ neh đơs oă jơnau tòmdră mơ Añ, mơ Añ neh kơno gơ.’

¹⁴ Jehôwa Yàng Tom Trồ đơs be do: ‘Tòm tŭ jơh plai ù hòn chò, Añ rơp lơh mê in gơlik gơs tiah lòi srau gòi.’

¹⁵ Ơ mơnơm Seir, mê mơ jơh Edôm, tài bơh mê neh hòn chò tòm tŭ sre brê hìu Israel dê gơlik gơs srau gòi, gen Añ rơp lơh di mê kung behơ̆ sơl. Gen bol khai rơp git Añ la Yàng Jehôwa.”