Ejekiel 34 - Sră Goh 2018

Ală cau ê mơ belàt

¹ Gơs jơnau Yàng Jehôwa đơs mơ añ lah:

² “Ơ kòn mơnus, đơs hwơr tĕ tòmdră mơ ală cau ê belàt Israel dê; đơs hwơr, mơ đơs tĕ mơ bol khai la ală cau ê belàt lah: ‘Jehôwa Yàng Tom Trồ đơs be do: Ơ bol mê la ală cau ê Israel dê, bol mê la cau mìng ròng siam să tòm! Ò di ală cau ê pal ròng siam mpồl belàt ò ơ?

³ Bol mê sa dơngi belàt, tơnsoh să tòm bol mê mơ sơnò belàt, bol mê lơh poac ală belàt lơmă rlau jơh, mơya bol mê ò ròng siam mpồl belàt!

⁴ Bol mê ò lơh ală belàt lơbơn in gơs pràn wơl, ò sơmbòi ală belàt kòp jê, ò pùt ală belàt kong sồt, bol mê ò cèng brê wơl ală belàt tìs nrah; ò jòi ală belàt neh roh. Mơya, bol mê neh at bồ bol gơ dô bă iơh bơsak mơ rhung rhang.

⁵ Behơ̆ bol gơ nrah nring tài bơh ò gơs cau ê; mơ tòm tŭ neh nrah nring gen bol gơ gơlik gơs phan sa jơh ală phan brê in.

⁶ Belàt Añ jê lòt nrah nring, bol gơ lòt lềng làng hơđang jơh ală mơnơm mơ tòm kòp nơm dòr jơnhoa, belàt Añ jê gơprah gơpring hơđang làm jơh plai ù, ò gơs dô nă cau lơi jòi, ò gơs cau jat bol gơ.’

⁷ Gen tàng, ơ ală bol mê la cau ê, iat tĕ jơnau đơs Yàng Jehôwa dê:

⁸ Jehôwa Yàng Tom Trồ đơs lah: ‘Di ngan be Añ kis, tài bơh mpồl belàt Añ jê neh gơlik gơs dô nơm phan pơndòm, mơ belàt Añ jê neh gơlik gơs phan sa ală phan brê in, bơh di tŭ òhềt gơs cau ê, mơ tài bơh cau ê Añ jê ò lòt jòi belàt Añ in, mơya ală cau ê neh ròng să tòm bol khai mơ ò ròng mpồl belàt Añ jê.’

⁹ Gen tàng, ơ ală cau ê, iat tĕ jơnau đơs Yàng Jehôwa dê:

¹⁰ Jehôwa Yàng Tom Trồ đơs be do: ‘Añ tòmdră mơ ală cau ê mơ Añ rơp lùp belàt Añ jê bơh di tê bol khai; mơ ò ngui bol khai ròng siam belàt tai, nàng ală cau ê rơp ò gam ròng siam să tòm bol khai tai. Añ rơp dong tă mpồl belàt Añ jê klàs bơh di bơr bol khai nàng belàt ò lơh gơs phan sa bol khai in tai.’

Yàng Tom Trồ la Cau Ê Ngan

¹¹ ‘Bơh Jehôwa Yàng Tom Trồ đơs be do: Să tòm Añ rơp jòi belàt Añ jê, mơ Añ rơp jòi jat bol gơ.

¹² Be cau ê lòt jòi mpồl belàt khai dê, tòm tŭ bol khai neh ơm digùl ală belàt nrah nring khai dê, behơ̆ Añ rơp lòt jòi mpồl belàt Añ jê. Añ rơp dong tă bol gơ bơh di jơh ală tiah bol gơ neh lòt nrah nring tòm dô ngai gơs mhwal mơ jơngo cik.

¹³ Añ rơp cèng bol gơlik bơh di ală làng bol mơ tơrgòm bol gơ bơh ală lơgar, mơ Añ rơp cèng bol gơrê wơl tòm lơgar tòm bol gơ dê. Añ rơp siam bol gơ hơđang ală mơnơm Israel dê, tòm ală croh dà, mơ tòm jơh ală tiah gơs làng bol ơm tòm lơgar.

¹⁴ Añ rơp ròng siam bol gơtòm ƀlàng ñhơt niam, mơ ală tiah jơnhoa hơđang mơnơm Israel dê rơp la ƀlàng ñhơt bol gơ dê. Tềng hơ̆ bol khai rơp bic rlô tòm tiah sa ñhơt niam, mơ tềng hơ̆ bol gơ rơp geh ròng siam tòm ƀlàng ñhơt tơlir niam hơđang ală mơnơm Israel dê.

¹⁵ Să tòm Añ rơp la cau ê mpồl belàt Añ jê mơ ai bol gơ in bic rlô,’ Jehôwa Yàng Tom Trồ đơs behơ̆.

¹⁶ ‘Añ rơp jòi belàt neh roh, cèng brê wơl belàt neh tìs nrah. Añ rơp pùt belàt neh kong sồt, mơ lơh pràn wơl belàt lơbơn lơño, mơya belàt lơmă mơ pràn añ rơp tơnroh. Añ rơp ròng siam bol gơ mơ bơta song ring.’

¹⁷ Jehôwa Yàng Tom Trồ đơs be do: ‘Ai bol mê, ơ mpồl belàt Añ jê, Añ rơp cahrña digùl belàt mơ belàt, digùl belàt dam mơ be.

¹⁸ Bol mê sa tòm ƀlàng ñhơt tơlir niam la ò tơl sơl ơ? Mơya bol mê pal ai jơng bol mê dê jă hơđang ală tiah gam wơl tòm ƀlàng ñhơt bol mê dê sơl ơ? Tòm tŭ bol mê hùc dà sàng, bol mê pal ai jơng lơh sơngkal dà gam wơl sơl ơ?

¹⁹ Mpồl belàt añ jê pal sa ñhơt mơ jơng bol mê neh jă hơđang, mơ pal hùc dà mơ jơng bol mê neh lơh sơngkal sơl ơ?’

²⁰ Gen tàng, Jehôwa Yàng Tom Trồ đơs be do mơ bol khai: ‘Să tòm añ rơp cahrña digùl belàt lơmă mơ belàt rgai.

²¹ Tài bơh bol mê ai wĕ ai pơnì mơ chồl, ai ngke mơ gĕ jơh ală belàt lơbơn òsô jơl tus di tŭ bol mê neh lơh gơprah gơpring jơh bol khai làm tiah ngài.

²² Añ rơp dong tă mpồl belàt añ jê, bol gơ rơp ò tai kong phà tơnroh tai, mơ añ rơp cahrña digùl belàt mơ belàt.

²³ Añ rơp bơtào hơđang bol gơ dô nă cau ê, hơ̆ la Dabit cau duh broă añ jê, khai rơp ròng siam bol gơ; mơ lơh gơs cau ê gàr bol gơ.

²⁴ Añ la Yàng Jehôwa rơp lơh gơs Yàng Tom Trồ bol gơ dê, mơ cau duh broă Añ la Dabit rơp gơs bơtau digùl bol khai. Añ la Yàng Jehôwa neh đơs behơ̆.

²⁵ Añ rơp bơtào mơ bol gơ dô bơta ho bal ring lơngai, mơ rơp bơtrơh ală phan brê bơh di lơgar nàng bol gơ rgơi ơm tòm ƀlàng ngềt ngơt mơ bic tòm brê tòm dơr dô bă lơngap lơngai.

²⁶ Añ rơp ai lơngai bol gơ in bal mơ tiah gùt dar dòr añ jê. Añ rơp đùh mìu di di kơnhai gơ dê, hơ̆ rơp la mìu lơngai lơngò.

²⁷ Ală chi tòm ƀlàng rơp gơlik plai bol gơ dê, mơ ù tiah rơp bơtơl oă cồng nha gơ dê; bol khai rơp ơm lơngap lơngai tòm ù bol khai dê, mơ bol khai rơp git Añ la Yàng Jehôwa tòm tŭ Añ dơrpă ală yô bol khai dê, mơ dong tă bol khai klàs bơh di tê ală cau kup dĭ bol khai.

²⁸ Bol khai rơp ò kong phà kup bơh ală làng bol bơdìh tai; kung ò kong jơi phan brê sa loan tai. Bol khai rơp ơm lơngap lơngai, ò gơs cau lơi lơh bol khai in rngòt rngơt.

²⁹ Añ rơp rcang ai bol khai in ù tiah tùc tam bơh plai đo pơnro niam, bol khai rơp ò tai kong jơgloh tòm lơgar, hala kong ală lơgar bơtat bơtròh tai.

³⁰ Gen bol khai rơp git Añ la Jehôwa Yàng Tom Trồ bol khai dê, ơm bal mơ bol khai, mơ hìu Israel dê, la làng bol Añ jê, Jehôwa Yàng Tom Trồ đơs behơ̆.

³¹ Bol mê la belàt Añ jê, la belàt ƀlàng ñhơt Añ jê, mơ Añ la Yàng Tom Trồ bol mê dê,’ Jehôwa Yàng Tom Trồ đơs behơ̆.”