Ejekiel 32 - Sră Goh 2018

Jơnau ñìm rac bơh Pharaôn

¹ Tòm nam dơ̆ jơt bàr, ngai dùl kơnhai jơt bàr, gơs jơnau Yàng Jehôwa đơs mơ añ be do:

² “Ơ kòn mơnus, ñìm rac tĕ bơh Pharaôn, bơtau Ejiptơ, mơ đơs mơ khai lah: ‘Mê kơlôi tĕ să tòm mê la dô nơm klìu triă digùl ală làng bol; mơya mê be la dô nơm nagrài tòm dàlềng, rpơt làm ală hiòng, ai jơng lơh sơngkal dà, lơh ƀô ồm ală croh dà mê dê.’

³ Jehôwa Yàng Tom Trồ đơs be do: ‘Bal mơ mpồl làng bol oă Añ rơp tras bơtơng añ jê hơđang mê, mơ bol khai rơp hwài mê guh tòm yŭ Añ jê.

⁴ Añ rơp sang mê tòm ù, mơ sơrbì mê tòm ƀlàng dờng. Añ rơp sồr jơh ală jơi sềm trồ ơm hơđang mê, mơ jơh ală jơi phan tòm brê hơđang ù sa hòm mê.

⁵ Añ rơp rsìh poac mê hơđang ală mơnơm, mơ ai ƀồc mê tơmbềng ală thòng.

⁶ Añ rơp ai mhàm mê neh hòr tuh hơđang ù, tus di ală mơnơm, mơ ală croh dà rơp gơs bềng poac mê.

⁷ Tòm tŭ Añ tơnroh mê gen añ rơp jơm ală tap trồ mơ lơh jơngo ală sơmañ gơ dê; Añ rơp ai mhwal cang kìng mattơngai, mơ mat kơnhai rơp ò tai pơnđàng bơta àng gơ dê.

⁸ Jơh ală bơta àng gơcrà hơđang trồ, Añ lơh gơlik jơngo hơđang mê; mơ cèng bơta klam jơngo hơđang lơgar mê,’ Jehôwa Yàng Tom Trồ đơs behơ̆.

⁹ ‘Añ rơp lơh dơrcul nùs oă làng bol dê, tòm tŭ Añ yal tơlik bơta tơnroh mê digùl ală làng bol, digùl ală lơgar mơ mê òhềt git.

¹⁰ Añ rơp lơh oă làng bol in rngòt rngơt bơh mê, mơ ală cau bơtau bol khai dê rơp gơdô nùs bơh mê, tòm tŭ Añ yàt đào Añ jê di đap bol khai, bol khai rơp rơm să kòp tŭ kòp jơ, bơh bơta kis kòp nă bol khai dê, tòm ngai mê gơtup pừ.’

¹¹ Bơh Jehôwa Yàng Tom Trồ đơs be do: ‘Đào bơtau Babilôn dê rơp tus tòmdră mơ bol mê.

¹² Añ rơp lơh mpồl làng bol oă mê dê gơpừ bơh đào ală cau pràn kơldang dê, tơl nă bol khai la ală cau jàñ bơsak rlau jơh tòm ală làng bol. Bol khai rơp tơnroh bơta pơnhừ să Ejiptơ dê, mơ jơh mpồl làng bol oă gơ dê rơp kong roh rui.

¹³ Añ rơp tơnroh jơh ală phan poan jơng gơ dê bơh di gah ală hiòng dà lìu làc gơ dê, mpàng jơng kòn mơnus ò lơh sơngkal gơ, hala nđias phan poan jơng kung ò lơh sơngkal gơ.

¹⁴ Gen Añ rơp lơh sàng dà khai dê, mơ lơh ală croh dà khai dê gơhòr kung be mơñà,’ Jehôwa Yàng Tom Trồ đơs behơ̆.

¹⁵ ‘Tòm tŭ Añ lơh Ejiptơ in gơlik tiah sang lòi ngềt ngơt, mơ tă bơh lơgar jơh ală phan tòm hơ̆, tòm tŭ Añ tơnroh jơh ală cau kis tềng hơ̆, gen bol khai rơp git Añ la Yàng Jehôwa.

¹⁶ Do la jơnau ñìm rac mơ bol khai rơp rac bơh gơ. Ală cau ùr ală lơgar dê rơp rac gơ; Ejiptơ bal mơ ală mpồl làng bol oă gơ dê rơp rac gơ,’ Jehôwa Yàng Tom Trồ đơs behơ̆.”

¹⁷ Tòm ngai dơ̆ jơt pram, nam dơ̆ jơt bàr, kơnhai dơ̆ dùl, gơs jơnau Yàng Jehôwa đơs mơ añ lah:

¹⁸ “Ơ kòn mơnus, pơt wòl tĕ bơh mpồl làng bol oă Ejiptơ dê. Bơtrơh tơlo tĕ làng bol hơ̆ bal mơ ală kòn ùr ală làng bol màng ryŭ tus tòm hơđơm ù, dô bă bal mơ ală cau mù tòm bơtô.

¹⁹ Đơs tĕ mơ bol khai lah: ‘Mê geh bơta hàng mơnĕ rlau mơ ală cau ndai sơl? Mù tĕ! Pal bic rlô bal mơ ală cau ò siat gơltau.’

²⁰ Bol khai rơp gơpừ digùl ală cau neh kong sreh tơnchơt. Ejiptơ neh geh jào đào in, gơ geh cèng bal mơ ală làng bol gơ dê!

²¹ Jơh ală cau at bồ pràn kơldang mơ ală cau dong kòl gơ dê rơp đơs bơh gơ digùl lơgar làng ƀồc lah: ‘Bol khai neh mù hơđơm, bol khai bic mŏ mŏ, ò siat gơltau, kong chơt bơh đào.’

²² Asiri ơm tềng hơ̆ bal mơ jơh mpồl ling gơ; gùt dar gơ la bơtô ƀồc bol khai dê, tơl nă bol khai kong gơpừ chơt bơh đào.

²³ Bơtô ƀồc bol khai dê ơm tòm ală tiah jrô bơtô dê, mơ mpồl ling khai dê ơm bic gùt dar bơtô ƀồc bol khai dê, jơh ală cau kong tơnchơt bơh đào, la ală cau neh rsìh bơta rngòt rngơt hơđang lơgar cau kis dê.

²⁴ Elam ơm tềng hơ̆ bal mơ jơh ală mpồl làng bol gơ ơm gùt dar bơtô ƀồc gơ dê. Jơh tơl nă bol khai neh kong sreh tơnchơt, neh gơpừ bơh đào. Ală cau ò siat gơltau neh mù tòm ù hơđơm, la ală cau neh rsìh bơta rngòt rngơt tòm ù cau kis dê, bol khai kong ƀàssìl ƀàsso bal mơ ală cau mù tòm brong jrô.

²⁵ Bol khai lơh Elam in dô nơm cơnòng bic digùl ală cau kong sreh tơnchơt, bal mơ jơh mpồl làng bol gơ dê, jơh ală bơtô bol khai dê ơm gùt dar gơ. Jơh tơl nă bol khai la cau ò siat gơltau, bơh bơta rngòt rngơt mơ bol khai neh rsìh tòm lơgar cau kis dê, bol khai kong bơta ƀàssìl ƀàsso bal mơ ală cau mù tòm bơtô; bol khai neh ơm digùl ală cau kong sreh tơnchơt.

²⁶ Mesek mơ Tubal ơm tềng hơ̆ bal mơ jơh ală mpồl làng bol oă, jơh ală bơtô ƀồc bol khai dê ơm gùt dar. Jơh tơl nă bol khai la cau ò siat gơltau, neh kong sreh tơnchơt bơh đào tài bơh bol khai neh rsìh bơta rngòt rngơt tòm ù cau kis dê.

²⁷ Bol khai ò bic bal mơ ală cau ling tòmlơh neh gơpừ bơh jŏ lài òr, la ală cau neh mù tòm lơgar làng ƀồc bal mơ ală phan tòmlơh bol khai dê, ală đào bol khai dê neh gòl hơđơm bồ bol khai dê, mơ ală khèl bol khai dê ơm hơđang ntìng bol khai dê; bơh bơta rngòt rngơt cau ling tòmlơh neh ơm tòm ù cau kis dê.

²⁸ Behơ̆, mê rơp kong bơcah lề mơ bic digùl ală cau ò siat gơltau, bal mơ ală cau kong sreh tơnchơt bơh đào.

²⁹ Edôm gơs tềng hơ̆, ală cau bơtau mơ ală cau kwang at bồ gơ dê; la ală cau pràn kơldang geh bic bal mơ ală cau kong tơnchơt bơh đào. Bol khai bic bal mơ ală cau ò siat gơltau, bal mơ ală cau mù tòm bơtô.

³⁰ Jơh ală cau kwang at bồ đah đang ơm tềng hơ̆, jơh tơl nă bol khai mơ jơh ală cau Sidôn; la ală cau neh mù tòm bơta ƀàssìl bal mơ ală cau kong sreh chơt, bơh ală bơta rngòt rngơt hơ̆ neh gơlik bơh gơnoar pràn bol khai dê. Bol khai bic ò siat gơltau bal mơ ală cau neh kong sreh tơnchơt bơh đào, mơ kong ƀàssìl ƀàsso bal mơ ală cau neh mù tòm bơtô.

³¹ Tòm tŭ Pharaôn sền gŏ bol khai, khai rơp geh pơndòm pơniang bơh jơh ală mpồl ling khai dê. Pharaôn mơ mpồl ling khai dê, kong chơt bơh đào, Jehôwa Yàng Tom Trồ đơs behơ̆.

³² Bulah Añ neh lòi khai rsìh bơta rngòt rngơt hơđang ù tiah cau kis dê, mơya khai geh ơn rlô digùl ală cau ò siat gơltau bal mơ ală cau neh kong sreh tơnchơt bơh đào. Pharaôn bal mơ mpồl oă làng bol khai dê,” Jehôwa Yàng Tom Trồ đơs behơ̆.