Ejekiel 30 - Sră Goh 2018

Jơnau pơt wòl bơh Ejiptơ

¹ Gơs jơnau Yàng Jehôwa đơs mơ añ lah:

² “Ơ kòn mơnus, đơs hwơr tĕ lah: Jehôwa Yàng Tom Trồ đơs be do: ‘Ñìm rac tĕ! “Bòl glar ngan ngai hơ̆ in!”

³ Bơh ngai hơ̆ tus rềp rau, ngai Yàng Jehôwa dê tus rềp rau, hơ̆ la ngai gơs oă mhwal, la tŭ tơngai bòl glar ală làng bol in.

⁴ Dô ngkơr đào rơp tus hơđang Ejiptơ, mơ bơta moat jrùng rơp tus tòm Ethiôpi. Tòm tŭ ală cau kong sreh tơnchơt gơpừ tòm Ejiptơ, phan mơna gơ dê rơp gơkòl pơrdô ngài, mơ ală mơnàng gơ dê kong sòr tơrlah.

⁵ Ethiôpi, Put, Lut, mơ jơh Arabi, Libi, mơ làng bol tòm lơgar ho pơgon rơp gơpừ bơh đào bal mơ Ejiptơ.’”

⁶ Do la jơnau Yàng Jehôwa đơs: “Ală cau dong tò Ejiptơ rơp gơpừ, bơta pràn kơldang mơ gơ jòng să rơp kong tơmù; bol khai rơp gơpừ bơh đào bơh Mikdôl tus Siene. Jehôwa Yàng Tom Trồ đơs behơ̆.

⁷ Bol khai rơp gơlik gơs tiah sang lòi ngềt ngơt digùl ală lơgar gơkòl srau gòi, mơ ală ƀòn dờng bol khai dê rơp tơrlah digùl ală ƀòn dờng neh tơrlah tơrling.

⁸ Gen bol khai rơp git lah Añ la Yàng Jehôwa, tòm tŭ Añ ai ồs chu Ejiptơ, mơ jơh tơl nă cau dong kòl gơ gơkòl lề lac jơh.

⁹ Tòm ngai hơ̆, Añ rơp sồr cau kong sồr lòt tòm ơhò tus lơh cau Ethiôpi ơm lơngap lơngai in pal rngòt rngơt. Bơta moat jrùng rơp tus hơđang bol khai tòm ngai rung rài Ejiptơ dê; bơh bơta hơ̆ ngan rơp tus.

¹⁰ Jehôwa Yàng Tom Trồ đơs be do: ‘Añ rơp pơndut mpồl làng bol Ejiptơ dê bơh tê Nebukatnessar, bơtau Babilôn dê.

¹¹ Añ rơp cèng bơtau hơ̆ bal mơ làng bol khai la cau iơh bơsak rlau jơh tòm ală làng bol, tus nàng tơnroh lơgar. Bol khai rơp tă đào bol khai dê tòmdră mơ Ejiptơ, mơ lơh ală ƀồc chơt bềng hơđang ù.

¹² Añ rơp lơh rañ rsơh ală hiòng dà, mơ rơp tac lơgar hơ̆ tòm tê ală cau iơh in; Añ rơp ngui tê ală làng bol bơdìh, tơnroh lơgar hơ̆ mơ jơh ală phan tòm gơ. Añ la Yàng Jehôwa neh đơs behơ̆.’

¹³ Jehôwa Yàng Tom Trồ đơs lah: ‘Añ rơp tơnroh ală rùp ràk mơ pơndut jơh ală rùp duh khoai tòm Memphis. Rơp ò gam gơs dô nă bơtau tai tòm Ejiptơ, behơ̆ Añ rơp ơn bơta rngòt rngơt tơm lơgar Ejiptơ.

¹⁴ Añ rơp lơh Patros in gơlik tiah ngềt ngơt, ai ồs chu Jôan, mơ rơp lơh gơlik gơs bơta cahrña hơđang Thebes.

¹⁵ Añ rơp tuh bơta gơjrañ dờng Añ jê hơđang Pelusium la ƀòn dờng kơ̆ cê Ejiptơ dê, mơ rơp tơnroh jơh làng bol Thebes dê.

¹⁶ Añ rơp ai ồs chu Ejiptơ, Pelusium rơp kong jê sồt oă. Thebes rơp kong tơrlah tơrlơm. Thebes rơp kong tơnlề bơh càl rbut; Memphis rơp kong tòmdră mơ cau sò tơm tòm trồ ngai.

¹⁷ Ală klau pơnu Ôn mơ Pibeset dê rơp gơpừ bơh đào, mơ làng bol tòm ƀòn hơ̆ rơp kong kup cèng.

¹⁸ Tòm Tahphanes, trồ ngai rơp gơlik jơngo cik, tòm tŭ Añ dơrpă gơnoar at bồ Ejiptơ dê; bơta pràn kơldang mơ gơ jòng să rơp lồi. Ƀòn dờng rơp kòl jơm gòm bơh dô puk mhwal, mơ ală kòn ùr gơ dê rơp kong kup cèng pơrdô.

¹⁹ Behơ̆, Añ rơp lơh gơlik gơs bơta cahrña hơđang Ejiptơ, mơ bol khai rơp git Añ la Yàng Jehôwa.’”

Jơnau yal tơnggit tòmdră mơ Pharaôn

²⁰ Nam dơ̆ jơt dùl, ngai poh kơnhai dùl, gơs jơnau Yàng Jehôwa đơs mơ añ lah:

²¹ “Ơ kòn mơnus, Añ neh dơrpă tơwòr tê Pharaôn, bơtau Ejiptơ dê. Gơ ò geh kơt nàng bòi, hala geh pùt mơ che bài nàng geh tơl pràn at đào.

²² Gen tàng, Jehôwa Yàng Tom Trồ đơs be do: ‘Añ tòmdră mơ Pharaôn, bơtau Ejiptơ dê, mơ rơp dơrpă bàr nơm tơwòr tê khai dê, tơwòr tê pràn bal mơ tơwòr tê neh pă, mơ Añ rơp lơh đào dùh bơh di tê khai.

²³ Añ rơp lơh gơprah gơpring làng bol Ejiptơ tòm ală làng bol, mơ rsìh bol khai làm jơh ală lơgar.

²⁴ Añ rơp bơtơl pràn ală tơwòr tê bơtau Babilôn dê mơ ơn đào Añ jê tòm tê khai; mơya Añ rơp dơrpă ală tơwòr tê Pharaôn dê, khai rơp ñìm rơnđơh di đap bơtau ne, kung be dô nă cau kong sồt mòr chơt behơ̆ sơl.

²⁵ Añ rơp bơtơl pràn ală tơwòr tê bơtau Babilôn dê, mơya ală tơwòr tê bơtau Pharaôn dê rơp lơbơn òsô. Gen bol khai rơp git Añ la Yàng Jehôwa, tòm tŭ Añ ơn đào Añ jê tòm tê bơtau Babilôn, mơ khai yơr đào hơ̆ tòmdră mơ lơgar Ejiptơ.

²⁶ Añ rơp lơh nrah nring làng bol Ejiptơ digùl ală làng bol, mơ rsìh bol khai làm ală lơgar. Gen bol khai rơp git Añ la Yàng Jehôwa.’”