Ejekiel 28 - Sră Goh 2018

Jơnau đơs hwơr tòmdră mơ bơtau Tirơ

¹ Gơs jơnau Yàng Jehôwa đơs mơ añ lah:

² “Ơ kòn mơnus, đơs tĕ mơ cau at bồ Tirơ lah: Jehôwa Yàng Tom Trồ đơs be do: ‘Tài bơh nùs mê pơnhừ să gen mê neh đơs lah: “Añ la dô nă yàng; Añ nggui hơđang sơbàn ală yàng dê ơm tòm plai nùs dàlềng.” Mơya mê la dô nă kòn mơnus, ò di la dô nă yàng, bulah mê pơndròm dơngoh kơlôi mê mơ dơngoh kơlôi dô nă yàng dê.

³ Mê ngan la jak chài rlau mơ Daniel sơl ơ? Ò gơs bơta ndơp ndơr lơi rgơi pồn bơh di mê sơl ơ?

⁴ Bơh bơta jak chài mơ bơta git wă mê dê, mê neh tơrgòm bơta pas gơs să tòm mê in, mơ neh tơrgòm oă màh mơ priă tơmut tòm ală đam jàr mê,

⁵ Bơh bơta jak chài dờng ngan mê dê tòm bơta kă bro, gen mê neh gơbơtơl oă bơta pas gơs mê dê, mơ nùs mê gơlik pơnhừ să bơh bơta pas sơm mê dê.’

⁶ Gen tàng, Jehôwa Yàng Tom Trồ đơs be do: ‘Tài bơh mê pơndròm dơngoh kơlôi mê dê mơ dơngoh kơlôi dô nă yàng dê,

⁷ gen Añ rơp cèng tus ală cau crih mat tòmdră mơ mê, làng bol jàñ bơsak rlau jơh tòm ală làng bol; bol khai rơp tă đào tòmdră mơ bơta hàng mơnĕ mơ bơta jak chài mê dê, mơ lơh ƀơ̆ ƀơl bơta gơklŏ ryŭ ryơm mê dê.

⁸ Bol khai rơp tơmù mê tus tòm cìr jrô, mơ mê rơp chơt dô bă iơh rmơh tòm kơnàng dàlềng.

⁹ Mê gam khin đơs lah: “Añ la dô nă yàng,” di đap mat ală cau tơnchơt mê sơl ơ? Bulah mê be lơi mơya mê la dô nă kòn mơnus ò di la yàng, tòm tŭ mê ơm tòm tê ală cau lơh mê in jê sồt.

¹⁰ Mê rơp chơt bơh tê cau lơgar bơdìh, be bơta chơt cau ò geh siat gơltau. Jehôwa Yàng Tom Trồ đơs lah: Añ neh đơs behơ̆.’”

Bơta ñìm rac bơh bơtau Tirơ

¹¹ Gơs jơnau Yàng Jehôwa đơs mơ añ lah:

¹² “Ơ kòn mơnus, lơh tĕ dô jơnau đơs crih pơt wòl bơh bơtau Tirơ mơ đơs mơ khai lah: Jehôwa Yàng Tom Trồ đơs lah: ‘Mê la tềl ƀang kì bơta wil tơl dê, bềng bơta jak chài, mơ hàng mơnĕ wil tơl.

¹³ Mê neh ơm tòm suơn Eden, la suơn Yàng Tom Trồ dê; Mê neh geh bơka să mơ tơl ală lŭ màng: lŭ kĕ pơrhê, lŭ kĕ rmit, lŭ kĕ màng, lŭ màng tơlir, lŭ màng pơrhê, lŭ màng gơcrà, lŭ màng tơlir trồ, lŭ kĕ tơlir, lŭ màng tơlir ñhơt. Jơh ală lŭ màng hơ̆ geh lơh bal mơ màh mơ rcang sir tòm ngai mê geh crơng gơs.

¹⁴ Mê la ceruƀim neh geh bong mơñà, Añ neh bơtào mê be cau sền gàr, mê neh ơm hơđang mơnơm sàng goh Yàng Tom Trồ dê; mê neh lòt digùl ală pơnai lŭ ồs dê.

¹⁵ Ală gùng dà mê la ò gơs tiah geh lah pơrhơng, bơh tòm ngai mê geh crơng gơs jơl tus di tŭ bơta iơh bơsak neh jòi bàn tòm mê.

¹⁶ Kơnòm di bơta kă bro tơngkah tơngkañ mê dê, mê gơs bềng bơta jàñ bơsak, mơ mê neh tìs glài. Behơ̆ gen Añ neh sơrbì mê be dô nơm phan kòl sền òsơp bơh di mơnơm Yàng Tom Trồ dê, mơ mê la ceruƀim cau sền gàr kong bơtrơh bơh digùl ală pơnai lŭ ồs dê.

¹⁷ Nùs mê neh gơlik pơnhừ să tài bơh bơta hàng mơnĕ mê dê, mơ mê neh lơh ồm lề bơta jak chài mê dê tài bơh bơta gơklŏ ryŭ ryơm mê dê. Behơ̆ Añ neh tơlo mê dùh tòm ù; Añ ràng tơlik mê di đap ală cau bơtau, lơh bol khai in sền be bơta kơnhơl.

¹⁸ Mê neh lơh ƀơ̆ ƀơl ală tiah sàng goh mê dê, bơh bơta tồi glài mê dê gơbơtơl sơlo oă, tòm bơta kă bro ò song mê dê. Behơ̆, Añ neh cèng ồs lik bơh digùl mê, mơ gơ sa pơrguc mê, mơ Añ neh lơh mê in gơlik gơs bùh hơđang ù di đap jơh ală cau ơm sền gŏ.

¹⁹ Jơh ală cau lơi git mê digùl ală làng bol nrơt nrơl bơh mê; mê neh tus di dô bơta lồi dut cù kìr ngan, mơ mê rơp sùm sùm ò gam tai!’”

Jơnau đơs hwơr bơh Sidôn

²⁰ Gơs jơnau Yàng Jehôwa đơs mơ añ lah:

²¹ “Ơ kòn mơnus, wèt mat tĕ hơ đah Sidôn, đơs hwơr tĕ tòmdră mơ gơ

²² mơ đơs tĕ lah: Jehôwa Yàng Tom Trồ đơs be do: ‘Ơ Sidôn, Añ tòmdră mơ mê, mơ Añ rơp geh gơklŏ bơh digùl mê, bol khai rơp git Añ la Yàng Jehôwa, tòm tŭ Añ lơh gơlik gơs bơta cahrña hơđang gơ mơ yal tơlik să tòm Añ la sàng goh tòm gơ.

²³ Bơh Añ rơp sồr kòp jê pluh plàng tus digùl gơ, mơ lơh mhàm gơhòr làm tòm ală gùng gơ dê. Ală cau chơt rơp gơpừ digùl gơ, bơh gơs đào tòmdră mơ gơtòm ală đah. Gen bol khai rơp git lah Añ la Yàng Jehôwa.

²⁴ Hìu Israel dê rơp ò jòi bàn lò jơrmơng hala lò mrơt lơi tai digùl ală làng bol ơm rềp bol khai dê, la ală làng bol òs lơh di bol khai dô bă òsơp òso. Gen bol khai rơp git lah Añ la Jehôwa Yàng Tom Trồ.’”

²⁵ Jehôwa Yàng Tom Trồ đơs be do: “Tòm tŭ Añ pơjum tơrgòm hìu Israel bơh digùl ală làng bol mơ bol khai neh kong gơprah gơpring, gen Añ neh yal tơlik bơta sàng goh Añ jê digùl bol khai di đap ală làng bol. Behơ̆, bol khai rơp ơm tòm ù tòm bol khai dê mơ Añ neh ai cau duh broă Añ in la Jakôp.

²⁶ Bol khai rơp ơm ring lơngai tòm hơ̆, rơp bơt hìu mơ tam suơn ño; bol khai rơp ơm tòm bơta ring lơngai, tòm tŭ Añ lơh gơlik gơs bơta cahrña hơđang ală làng bol ơm rềp di bol khai, la ală làng bol neh sền òsơp di bol khai. Gen bol khai rơp git lah Añ la Jehôwa Yàng Tom Trồ bol khai dê.”