Ejekiel 27 - Sră Goh 2018

Jơnau ñìm rac bơh Tirơ

¹ Gơs jơnau Yàng Jehôwa đơs mơ añ lah:

² “Ơ kòn mơnus, lơh tĕ dô bơta đơs crih pơt wòl bơh Tirơ.

³ Đơs tĕ mơ Tirơ, la ƀòn dờng ơm di mpồng dàlềng dê, tiah kă bro mơ ală làng bol ơm tòm oă tiah di gah dàlềng, Jehôwa Yàng Tom Trồ đơs be do: ‘Ơ Tirơ, mê neh đơs lah: “Añ gơs bơta hàng mơnĕ wil tơl.”

⁴ Ală nhàr lơgar mê dê ơm tòm nùs dàlềng dê; ală cau bơt bơtào mê neh lơh wil tơl bơta hàng mơnĕ mê dê.

⁵ Bol khai neh lơh jơh ală mpàn mê dê mơ chi nho rề Senir dê; bol khai ai chi pơnggŏ bơh Liban nàng lơh gơs jrong bềl yàr mê dê;

⁶ ai chi gus Basan dê lơh gơs ală gai wàs ơhò mê dê; ai chi rmit rò gah dàlềng Kittim dê lơh gơs mpàn tìm, ƀềp mơ bla rwas.

⁷ Bài che dơmài lơbơn jing bơka Ejiptơ dê la bềl yàr mê dê, mơ kung ngui lơh gơs bồng bi mê dê sơl; bài dà gur dà tơlir bơh di ală tiah rò gah dàlềng Elisa lơh gơs bài kơrnìng mê dê.

⁸ Ală cau Sidôn mơ Arbat la cau wàs ơhò mê dê; ală cau chài rgơi bơh Jemer ơm digùl mê, bol khai la ală cau at ơhò mê dê.

⁹ Ală cau kra tòm Gebal mơ ală cau chài rgơi lơh ală broă mơ tê ơm digùl mê, mơ ală cau tơmbồl tiah sèt bluh ơhò mê dê kung behơ̆ sơl. Jơh ală ơhò dàlềng bal mơ ală cau lơh broă tòm ơhò tus lòt bal nàng kă bro mơ mê.

¹⁰ Cau Persia, cau Lidi, cau Libi, lơh gơs cau ling tòm mpồl ling mê dê, bol khai yồng khèl mơ sơgơn lòs bol khai dê di ală dơrñang mê dê, lơh mê in gơcrà hàng mơnĕ.

¹¹ Ală cau Arbat mơ Helek ơm làm hơđang ală dơrñang mê dê; ală cau Gamat ơm hơđang ală theng mê dê. Bol khai yồng ală ding kam bol khai dê gùt dar dơrñang mê dê; bol khai lơh bơta hàng mơnĕ mê dê gơlik gơs wil tơl.

¹² Làng bol Tarsis kă bro mơ mê tơngkah tơngkañ bơta pas sơm bơh phan mơna mê dê, bol khai tòmgơl priă, lòs, sơlo, trà mơ phan kă bro mê dê.

¹³ Ală làng bol Jaban, Tubal mơ Mesek kă bro mơ mê, bol khai tòmpơrgơl mơ mê kòn mơnus mơ ală gri lơh mơ kòng nàng geh ală phan kă bro mê dê.

¹⁴ Ală cau Bet Tôgarma tòmpơrgơl ală ơseh lơh broă, ơseh tòmlơh, alàng ơseh mơ ai phan kă bro mê dê.

¹⁵ Ală cau Dedan kă bro mơ mê; mơ oă tiah rò gah dàlềng la tiah drà is gơrê bal mơ mê; bol khai tơm mê in ală bla rwas mơ chi dà jù.

¹⁶ Tài bơh mê gơs oă phan kă bro, gen tàng Siri kă bro mơ mê; bol khai ai lŭ màng gơcrà, bài dà phồng, phan jing bơka, bài che dơmài lơbơn, bơkào lŭ tòm dàlềng, lŭ màng pơrhê mơ tòmpơrgơl phan kă bro mê dê.

¹⁷ Juda mơ lơgar Israel kung kă bro mơ mê; bol khai tòmpơrgơl mơ ală phan kă bro mê dê mơ kòi mi Minnit, piang lă lơngồt, dà lơwe, mơñà, mơ kơlhô.

¹⁸ Damaskus kă bro mơ mê bơh phan mơna mê oă ngan.Tài bơh mê gơs oă phan kă bro mơ pas sơm bơh ală phan mơna tơl jơh ală phan, tơrnòm bơh Helbon, mơ sơnò belàt bò.

¹⁹ Ală cau Bedan mơ cau Jaban bơh Ujal mut kă bro phan mơna mơ mê; bol khai cèng lòs gơcrà, kơmhò kwĕ, mơ chi ƀô niam nàng tòmpơrgơl phan kă bro mê dê.

²⁰ Cau Dedan kă bro mơ mê bơh ală ồi lă hơđang ngkòi ơseh.

²¹ Cau Arabi mơ jơh ală cau kwang at bồ tòm Kedar la ală cau kă bro mơ mê, bol khai kă bro mơ mê mơ ală belàt kòn, belàt dam, mơ be dam.

²² Ală cau kă bro Seba mơ Raamah kă bro mơ mê, ai ală phan ƀô bơlhu rlau jơh tòm ală kơmbuh tĕ biap, jơh ală lŭ màng mơ màh mơ tòmpơrgơl phan kă bro mê dê.

²³ Haran, Kanneh mơ Eden, bal mơ ală cau kă bro Seba dê, Asur mơ Kilmat la ală cau kă bro mơ mê.

²⁴ Tòm ală drà, bol khai kă bro mơ mê ală ồi ào hàng mơnĕ, brài dà tơlir trồ, phan jing bơka, ală ồi lă mơnàng hìu gơs oă dà hàng mơnĕ, gơs che tàñ bal mơ kơt kơ̆ ngan.

²⁵ Ală ơhò Tarsis ngui nàng pơdiang ală phan kă bro. Mê pơdiang oă phan kơnjơ̆ tòm gùl dàlềng.

²⁶ Ală cau wàs ơhò neh cèng mê mut tòm dàlềng dờng. Mơ càl đah mattơngai lik pòng bơcah mê, tòm nùs dàlềng dê.

²⁷ Phan mơna mê dê, ală phan kă bro mê dê, ală cau wàs ơhò mê dê, ală cau lam gùng tòm dàlềng mê dê, ală cau rcang wơl ơhò mê dê, ală cau kă bro mê dê, jơh ală cau ling tòmlơh mê dê bal mơ jơh mpồl làng bol hào ơhò bal mơ mê rơp gơkram tòm kơnàng dàlềng tòm ngai gơkram ơhò mê dê.

²⁸ Tòm tŭ sap hòi driau ală cau at ơhò mê dê, ală ƀòn gùt dar gơlơnggơr,

²⁹ mơ mù bơh ơhò bol khai dê, ală cau wàs ơhò rơp sang ală ơhò bol khai dê, ală cau lam gùng tòm dàlềng mơ jơh ală cau lơh broă tòm ơhò rơp ñă ntào di gah dàlềng.

³⁰ Bol khai rơp nggà ñìm dờng rac ròc sràt bơtang bơh mê; bol khai rơp rsìh thul hơđang bồ bol khai dê mơ rlơ̆ să tòm bùh.

³¹ Bol khai rơp koah bồ tài bơh mê, mơ kơt but mơ ƀào sơnò kiat. Bol khai rơp ñìm mơ pơt wòl rac ròc tài bơh mê mơ ñìm rac sràt bơtang tòm hwềng soàn.

³² Tòm tŭ bol khai pơt wòl mơ ñìm rac tài bơh mê, bol khai lơh dô bơta đơs crih pơt wòl bơh mê mơ lah: “Gơs ƀòn lơi ơm thit ngềt mŏ mŏ kung be Tirơ la ƀòn ơm digùl dàlềng sơl ơ?”

³³ Tòm tŭ phan kă bro mê dê neh tus bơh dàlềng, mê neh lơh hừh nùs oă làng bol; mê neh lơh pas sơm ală cau bơtau tòm plai ù bơh bơta pas sơm oă ngan mơ ală phan kă bro mê dê.

³⁴ Tŭ do, mê neh roh jơh tòm dàlềng, tòm tiah jrô ală dà dê; ală phan kă bro mơ jơh ală cau bal mơ mê neh gơkram tòm dà bal mơ mê.

³⁵ Jơh ală làng bol ơm di ală gah dàlềng ai lơh mơp dơl tài bơh mê; ală cau bơtau bol khai dê rngòt rơm să, muh mat bol khai dê gơlơh be cau chơt tài bơh rngòt.

³⁶ Ală cau kă bro digùl ală làng bol hwac di mê; mê neh tus hơ bơta lồi dut cù kìr ngan, mơ mê rơp sùm sùm ò gam tai!’”