Ejekiel 23 - Sră Goh 2018

Bàr nă oh mi rềs àr bơrnàn

¹ Gơs jơnau Yàng Jehôwa đơs mơ añ lah:

² “Ơ kòn mơnus, gơs bàr nă cau ùr la ală kòn ùr dô nă cau mè dê.

³ Bol khai lơh dri tòm Ejiptơ, lơh dri bơh tŭ gam ơruh. Tềng hơ̆, toh bol khai neh cau at mơ hìu kòn bol khai dê neh cau git.

⁴ Cau bi sơnđan la Ôhôlah, ai cau oh sơnđan la Ôhôlibah. Bol khai neh gơrê bal mơ Añ, mơ deh kòn klau kòn ùr. Ôhôlah la Samari, ai Ôhôlibah la Jerusalem.

⁵ Ôhôlah lơh dri tòm tŭ khai neh gơrê bal mơ añ, khai hàm kòñ ală cau khai gơboh la cau Asiri, la ală cau ling,

⁶ soh ào dà tơlir trồ, la ală cau kwang đơng mơ kwang at bồ, jơh ală bol khai la niam klau mơ jak hào ơseh.

⁷ Khai ơn să khai lơh gơs ùr dri jơh ală cau Asiri niam rlau jơh in; khai lơh ƀơ̆ ƀơl să tòm khai mơ jơh ală rùp ràk kòp nă cau mơ khai hàm kòñ.

⁸ Khai ò sang bơta dri tơlàr mơ khai neh rơp sơntòm bơh tòm Ejiptơ, tòm tŭ khai gam ơruh gơs cau bic mơ khai, tơnroh bơta sơmpiat cau ơruh dê, mơ tuh tơlik bơta dri tơlàr bol khai dê hơđang khai.

⁹ Behơ̆ añ neh jào khai tòm tê cau kòñ gơboh khai la ală cau Asiri, ală cau mơ khai neh hàm kòñ.

¹⁰ Ală cau do neh hồ ồi ào khai dê mơ lòi khai ơm kuh, kup kòn klau kòn ùr khai dê, mơ ai đào tơnchơt khai. Khai neh gơlik gơs dô jơnau yal yau tòm mpồl cau ùr, mơ bơta lơh glài neh tuh hơđang khai.

¹¹ Oh ùr khai dê la Ôhôlibah neh sền gŏ ală bơta hơ̆; bulah behơ̆ tòm bơta hàm kòñ mơ bơta dri tơlàr rlau mơ bi ùr khai dê, khai gơlik ƀơ̆ iơh rlau mơ bi khai.

¹² Khai kung hàm kòñ ală cau Asiri, la ală cau kwang đơng kơnhwàl mơ la ală cau kwang at bồ, la cau ling tòmlơh, soh ồi ào hàng mơnĕ, jak hào ơseh, jơh ală la cau pơnu niam klau.

¹³ Añ sền gŏ khai kung neh lơh ƀơ̆ ƀơl să tòm khai dê, jơh bàr nă oh mơ mi bol khai neh lòt bal jat dô nơm gùng.

¹⁴ Mơya khai sơlo bơtơl bơta dri tơlàr khai dê oă rlau tai. Khai gŏ rùp ală cau klau geh cih hơđang dô nơm dơrñang, ală rùp cau Kalde dê pih dà pơrhê,

¹⁵ gơs ală che gơltau kơt di but mơ ală chèo pùt di bồ, jơh ală bol khai sền gơlơh be ală cau kwang, be ală cau Babilôn lơgar tòm la Kalde.

¹⁶ Tòm tŭ pa gŏ bol khai gen khai neh gơs nùs hàm kòñ bol khai, mơ sồr ală cau kong sồr lòt tus hơ bol khai tòm Kalde.

¹⁷ Gen ală cau Babilôn lòt tus mơ khai, tus di cơnòng bic gơboh gơbài, mơ tòm bơta hàm kòñ dri tơlàr lơh ƀơ̆ ƀơl di khai. Tơnơ̆ mơ tŭ khai neh gơkòl bol hơ̆ lơh gơlik ƀơ̆ ƀơl, khai pơrlac sang bol hơ̆ tòm bơta gơjrañ mañ.

¹⁸ Tòm tŭ khai lơh gơs ùr dri dô bă loh làng behơ̆ mơ ràng tơlik să kuh khai dê, añ kung pơrlac sang khai tòm bơta gơjrañ mañ kung be añ neh pơrlac sang bi ùr khai dê behơ̆ sơl.

¹⁹ Bulah behơ̆, khai neh sơlo bơtơl oă bơta dri tơlàr bung jang khai dê tòm tŭ khai kah wơl ală ngai khai gam ơruh, tòm tŭ khai la ùr dri tòm lơgar Ejiptơ.

²⁰ Tềng hơ̆ khai hàm kòñ ală cau khai gơboh, la ală cau gơs nùs hàm kòñ duh hul bơta rềs àr dri tơlàr kung be ală alàng mơ ơseh.

²¹ Neh jŏ rau nùs dri tơlàr ai dê bơh tŭ ai gam ơruh, tòm tŭ tòm Ejiptơ hìu kòn ai dê neh cau git mơ toh gam tơrmo ai dê neh cau at.

²² Behơ̆ gen, ơ Ôhôlibah, Yàng Jehôwa đơs be do: ‘Añ rơp chồl bơchồt ală cau ai gơboh tòmsò mơ ai, la ală cau mơ ai neh pơrlac sang tòm bơta gơjrañ mañ, mơ Añ rơp cèng bol khai bơh di kòp ală đah tus tòmsò mơ ai.

²³ Hơ̆ la ală cau Babilôn, jơh ală cau Kalde, ală cau Pekôt, cau Soa mơ cau Koa, mơ jơh ală cau Asiri bal mơ bol khai, la ală cau pơnu niam klau, jơh ală bol khai la ală cau kwang đơng kơnhwàl mơ kwang at bồ, kwang at rơndeh lòs tòmlơh mơ ală cau gơnoar broă dờng, jơh tơl nă gen hào ơseh.

²⁴ Bol khai rơp tus tòmsò mơ ai, cèng ală pềs tà, ală rơndeh lòs tòmlơh, ală rơndeh pơdiang phan, mơ dô mpồl làng bol oă; bol khai rơp rơndap bơta tòmlơh tòmsò mơ ai tòm kòp đah, ngui ală khèl dềt mơ dờng bal mơ ală sơgơn lòs. Añ rơp jào phi ai bol khai in nàng lơh glài, mơ bol khai rơp lơh glài ai jat bơta boh lam bol khai dê.

²⁵ Añ rơp ràng tơlik bơta gơjrañ pơrñat Añ jê tòmdră mơ ai, mơ bol khai rơp lơh gơwèt mơ ai tòm bơta gơjrañ. Bol khai rơp siat muh mơ tồr ai dê; ai ală cau gam wơl gen rơp pừ bơh đào. Bol khai rơp kup cèng ală kòn klau kòn ùr ai dê; ai ală cau gam wơl rơp kong ồs sa roh.

²⁶ Bol khai rơp hồ tă jơh ồi ai dê, mơ tòmpìt ai phan màng bơka să ai dê.

²⁷ Behơ̆ Añ rơp kơryan wơl bơta bung jang gơlềng gơlàng mơ bơta dri tơlàr ai dê mơ ai neh cèng bơh di lơgar Ejiptơ. Ai rơp ò tai gơn kơnòm di ală bơta hơ̆, mơ kung ò kah tai bơh Ejiptơ.’

²⁸ Bơh Jehôwa Yàng Tom Trồ đơs be do: ‘Añ rơp jào phi ai tòm tê ală cau mơ ai gơjrañ kơuềng, tòm tê ală cau mơ ai neh pơrlac sang tòm bơta cù kìr.

²⁹ Bol khai rơp ai bơta gơjrañ mañ gơwèt mơ ai, tă ai jơh ală phan ai neh lơh gơs, bol khai rơp lòi ai ơm kuh lòi rồ, mơ bơta ƀàssìl ƀàsso bơh bơta dri tơlàr ai dê rơp gơkòl ràng tơlik. Bơta bung jang mơ bơta gơlềng gơlàng ai dê

³⁰ neh cèng tus bơta do ai in, tài bơh ai neh lơh dri mơ ală làng bol mơ lơh ƀơ̆ ƀơl să tòm ai dê bơh ală rùp ràk bol khai dê.

³¹ Ai neh lòt jat gùng bi ùr ai dê, gen tàng Añ rơp ơn mơngàn khai dê tòm tê ai.’

³² Jehôwa Yàng Tom Trồ đơs be do: ‘Ai rơp hùc mơngàn bi ùr ai dê, la mơngàn dờng mơ jrô; gơ rơp cèng tus bơta sền òsơp mơ bơta dơñŏ tơnhial, ơn oă ngan tòm gơ.

³³ Ai rơp gơs bềng bơta bơñul lơmbè mơ moat jrùng, hơ̆ la mơngàn rơngòt rngơt mơ sang lòi ngềt ngơt, mơngàn bi ùr Samari ai dê.

³⁴ Ai rơp hùc mơngàn hơ̆ mơ rơp hùc jơh hir; ai rơp jan bơcah gơ rpot rpet, mơ ai rơp crè is ntơh ai dê. Añ neh đơs rau,’ Jehôwa Yàng Tom Trồ đơs behơ̆.

³⁵ Gen tàng, Jehôwa Yàng Tom Trồ đơs be do: ‘Tài bơh ai neh hŭi Añ, mơ sơrbì Añ di ngkòi ai, gen ai pal kong cồng nha bơh bơta gơlềng gơlàng mơ dri tơlàr ai dê.’”

³⁶ Yàng Jehôwa neh đơs mơ añ lah: “Ơ kòn mơnus, mê rơp cahrña Ôhôlah mơ Ôhôlibah ơ? Gen yal tơlik tĕ ală broă lơh cù kìr bol khai dê,

³⁷ bơh bol khai neh tìs glài rềs àr bơrnàn, mơ mhàm neh gơs di tê bol khai dê. Bol khai neh tìs glài rềs àr bơrnàn mơ ală rùp ràk bol khai dê; tian gơs bol khai neh ơn ală kòn bol khai dê lơh gơs phan sa bol gơ in, la ală kòn mơ bol khai neh tơnggơs Añ in.

³⁸ Bol khai kung neh lơh bơta do Añ in: Tòm dô ngai bol khai neh lơh ngkòr ngkàc tiah sàng goh Añ jê, mơ sền òsơp ală ngai Saƀat Añ jê be ngai òs.

³⁹ Tòm ngai mơ bol khai neh tơnchơt kòn bol khai dê lơh gơs phan ơn rùp ràk bol khai in, bol khai mut tòm tiah sàng goh Añ jê mơ lơh tiah hơ̆ in gơlik ngkòr ngkàc. Hơ̆ la bơta bol khai neh lơh tòm hìu Añ jê.

⁴⁰ Bol khai kung neh sồr cau kong sồr lòt jà ală cau tus bơh tiah ngài, mơ tòm tŭ bol khai neh tus gen ai neh um dà nàng wă rò bol khai, pih mat mơ dò wan phan bơka să ai dê.

⁴¹ Ai nggui hơđang dô nơm cơnòng bic niam mơnĕ, di đap gơ gơs dô nơm cơnòng ơn phan, hơđang hơ̆ ai neh ơn kơlhô mơ mơñà la phan gơrê bal mơ Añ.

⁴² Ntas ur ur bơh mpồl oă cau ală alai ơm gùt dar khai; ală cau Sabe bal mơ ală cau ò dă ò diơng, geh cèng tus bơh tòm ƀlàng ngềt ngơt, bol khai tơndò kòng di tê cau ùr mơ oh ùr khai dê mơ tơndau sơgơn hàng mơnĕ hơđang bồ bol khai.

⁴³ Gen Añ đơs bơh cau neh bòl glar tòm bơta rềs àr dri tơlàr lah: ‘Tŭ do lòi tĕ bol khai ngui khai kung be cau dri tơlàr bơh khai ngan la behơ̆.’

⁴⁴ Mơ bol hơ̆ bic mơ khai. Cau bic mơ cau ùr dri be lơi gen kung behơ̆ bol khai bic mơ ală cau ùr dri tơlàr la Ôhôlah mơ Ôhôlibah.

⁴⁵ Mơya ală cau song ring rơp cahrña lơh glài bol khai kung be lơh glài ală cau ùr rềs àr dri tơlàr mơ lơh gơtuh mhàm, tài bơh bol khai la cau rềs àr dri tơlàr mơ gơs mhàm di tê bol khai dê.

⁴⁶ Jehôwa Yàng Tom Trồ đơs be do: ‘Cèng tĕ dô mpồl cau oă tòmsò mơ bol khai, mơ jào phi tĕ bol khai tòm bơta rngòt rngơt mơ tòmpìt tòmhà.

⁴⁷ Mpồl bol oă hơ̆ rơp cơm lŭ bol khai, mơ ai đào srơp tơnchơt bol khai; bol hơ̆ rơp tơnchơt kòn klau kòn ùr bol khai dê, mơ ai ồs chu hìu bol khai dê.

⁴⁸ Behơ̆ añ rơp pơndut jơh ală bơta rềs àr bơrnàn tòm lơgar, tồ jơh ală cau ùr geh bơto pơhìn mơ ò đòm krơh bol ai dê.

⁴⁹ Bol ai rơp kong jê sồt bơh bơta lơh glài tài bơh bơta rềs àr dri tơlàr bol ai dê, mơ rơp àñ cồng nha bơh tồi glài duh rùp ràk bol ai dê. Gen bol ai rơp git Añ la Jehôwa Yàng Tom Trồ.’”