Ejekiel 2 - Sră Goh 2018

Ejekiel geh Yàng hòi sac

¹ Kơnràñ đơs mơ añ lah: “Ơ kòn mơnus, ñă ntào tĕ, mơ Añ rơp tòmbơhbơr mơ mê.”

² Tòm tŭ Kơnràñ đơs gen Yàng Hwềng mut tòm añ, yò añ ñă ntào, mơ añ kơno Kơnràñ đơs mơ añ.

³ Kơnràñ đơs lah: “Ơ kòn mơnus, Añ sồr mê lòt tus hơ làng bol Israel, tus hơ dô nơm làng bol jak tòmdră neh tòmdră di Añ; bol khai bal mơ ồng pàng bol khai dê neh tìs glài tòmdră mơ Añ jơl tus ngai do.

⁴ Jơi bơtiàn dờng nùs mơ kơldang bồ. Añ sồr mi lòt tus hơ bol khai. Đơs tĕ mơ bol khai lah: ‘Do la jơnau đơs Yàng Jehôwa Gơnap Gơnoar Hơđang Rlau Jơh dê.’

⁵ Mơ bulah bol khai iat hala ò iat, bơh bol khai la dô nơm hìu jak tòmdră, bol khai rơp git lah neh gơs dô nă cau gơnoar hwơr ơm digùl bol khai.

⁶ Ai mê, ơ kòn mơnus, mê bañ rngòt di bol khai hala di jơnau đơs bol khai dê. Bañ rngòt bulah lò mrơt lò mang rồng gùt dar mê, mơ mê ơm digùl ală diang. Bañ rngòt di jơnau lơi bol khai đơs, mơ bañ rơm să tài bơh bol khai, bơh bol khai la dô nơm hìu jak tòmdră.

⁷ Mê pal yal bol khai in ală jơnau Añ đơs, bulah bol khai iat hala ò iat, bơh bol khai la làng bol jak tòmdră ngan.

⁸ Mơya mê, ơ kòn mơnus, iat tĕ ñchi jơnau Añ đơs mơ mê. Bañ tòmdră kung be dô nơm hìu jak tòmdră hơ̆; pò tĕ bơr mê dê mơ sa tĕ phan Añ ai mê in.”

⁹ Gen añ rmê sền mơ añ neh gŏ gơs dô nơm mpàng tê pò tơlik tus di añ, tòm hơ̆ gơs dô pồt sră neh cih.

¹⁰ Khai pò pồt sră hơ̆ di đap añ; hơđang bàr đah sră gơs cih ală jơnau ñìm rac pơt wòl, mơ jê sồt moat jrùng.