Ejekiel 19 - Sră Goh 2018

Bơta ñìm rac bơh ală cau kwang dờng at bồ Israel

¹ Ai mê, đơs chò tĕ dô jơnau ñìm rac bơh ală cau kwang dờng at bồ Israel dê, lah:

² “Mè bol mê la dô nơm klìu triă me ơm digùl ală klìu triă dam! Gơ bic digùl ală klìu triă brồ dam mơ ròng siam ală kòn gơ dê.

³ Gơ ròng siam dô nơm tòm ală kòn gơ dê, mơ gơ gơlik gơs dô nơm klìu triă pràn kơldang. Klìu triă do bơtê kap crè phan gơ kup geh, mơ sa loan ală kòn mơnus.

⁴ Ală làng bol neh kơno bơh gơ mơ gơ neh dùh tòm dô nơm tơrluh. Bol khai neh ngui ală gai lòs kwĕ di kàng mơ tề gơ tus tòm lơgar Ejiptơ.

⁵ Tòm tŭ klìu triă me gŏ gơ gơkòl kơryan, mơ bơta gơn kơnòm gơ dê neh roh, gen gơ ai dô nơm klìu triă ndai tòm ală kòn gơ dê mơ lơh gơ in gơlik gơs dô nơm klìu triă brồ dam.

⁶ Klìu triă hơ̆ lik lòt jòi kup phan digùl ală klìu triă ndai bơh gơ neh gơlik gơs dô nơm klìu triă brồ dam. Gơ bơtê kap crè phan gơ kup geh mơ sa loan ală kòn mơnus.

⁷ Gơlơh tơrlah ală theng kơ̆ cê bol khai dê, mơ tơnroh jơh ală ƀòn dờng bol khai dê. Lơgar bal mơ jơh ală phan tòm hơ̆ rơm să rngòt bơh sap ơluh ơhùm gơ dê.

⁸ Gen ală lơgar tus tòmdră mơ gơ, la ală lơgar ơm tòm ală tiah gùt dar. Bol khai dang bơtơng hơđang gơ, mơ gơkòl kup tòm tơrluh bol khai neh tò.

⁹ Bol khai ngui gai kơlnĕ lòs mơ hwài tơmut gơtòm wàng, lồc behơ̆ cèng tus hơ bơtau lơgar Babilôn. Bol khai krơ̆ gơtòm hìu jàm, behơ̆ sap ơluh ơhùm gơ dê ò tai kơno hơđang ală mơnơm Israel.

¹⁰ Mè mê la be dô tòm ño tòm suơn ño mê dê, tam di gah dà; gơ gơs oă plai mơ oă ntê, tài bơh gơs dà tơngkah tơngkañ.

¹¹ Ală ntê pràn rlau jơh gơ dê gơlik gơs gai gơnoar at bồ. Gơhòn jơnhoa ngan gơs oă ntê mơ nha, cồng gơ jơnhoa hơđang ơm digùl ală ntê, lơh cau in gŏ bơta jơnhoa gơ dê.

¹² Mơya gơ neh kong dus bơh bơta gơjrañ, mơ kong sơrbì tòm ù. Càl đah mattơngai lik neh lơh gơ in ro rañ, ală plai gơ dê rung jơh; ală ntê pràn kơldang gơ dê neh ñòp ro; mơ ồs neh sa pơrguc gơ.

¹³ Tŭ do gơ neh tam wơl tòm ƀlàng bràs, tòm tiah ro rañ ò gơs dà.

¹⁴ Ồs neh lik bơh di ală ntê dờng gơ dê, mơ neh sa pơrguc ală ntê mơ plai gơ dê. Gen tàng ò gơs dô nơm ntê pràn kơldang gam wơl, ò gơs gai gơnoar at bồ. Hơ̆ la dô jơnau ñìm rac geh ngui nàng ñìm rac pơt wòl.”