Ejekiel 18 - Sră Goh 2018

Hwềng soàn tìs glài rơp chơt

¹ Gơs jơnau Yàng Jehôwa đơs mơ añ be do lah:

² “Ñchi bol mê kơlôi tòm tŭ bol mê đơs wơl jơnau pơnđik do bơh lơgar Israel: ‘Mè bèp sa plai ño sràt, mơ kòn sau kìr sề taih’?

³ Jehôwa Yàng Tom Trồ đơs lah: ‘Di ngan kung be Añ kis, bol mê rơp ò đơs tai jơnau pơnđik hơ̆ tòm Israel.’

⁴ Bơh git lah kòp hwềng kis gơrê bal mơ Añ; hwềng soàn mè bèp kung be hwềng soàn kòn, gơrê jơh bal mơ Añ. Hwềng soàn lơi tìs glài gen hwềng soàn hơ̆ rơp chơt.

⁵ Dilah gơs dô nă cau song ring, mơ lơh ală bơta song mơ di.

⁶ Dilah khai ò sa phan duh khoai hơđang mơnơm hala wèt sền di ală rùp ràk hìu Israel dê. Khai ò lơh ƀơ̆ ƀơl bau ùr cau gơp ƀòn khai dê hala bic mơ dô nă cau ùr tòm tŭ gơs kơnhai.

⁷ Khai ò rồn bơklơn cau lơi ndai, mơya tơm wơl phan ai bồ cau kòl dồs mơ khai. Khai ò kơñau phan lơi cau dê, mơya pà phan sa khai dê cau jơgloh in mơ ai phan soh cau ơm kuh in.

⁸ Khai ò ai càn jền nàng sa cồng kơnjơ̆, hala ai cồng oă rlau. Khai ruc tê ò lơh bơta tìs mơ cahrña song digùl cau do mơ cau ne.

⁹ Khai lơh jat ală jơnau sồr Añ jê mơ dòn song prap gàr bơta sồr lam Añ jê. Cau hơ̆ la cau song ring; di ngan la khai rơp kis, Jehôwa Yàng Tom Trồ đơs behơ̆.

¹⁰ Dilah khai gơs dô nă kòn klau rhung rhang mơ lơh gơtuh mhàm, hala lơh bơta lơi ndai ò di kung be ală bơta neh đơs hơđang ne,

¹¹ (bulah bèp khai ò lơh bơta lơi tòm ală bơta hơ̆) hơ̆ la cau sa hơđang mơnơm mơ lơh ƀơ̆ ƀơl bau ùr cau gơp ƀòn khai dê.

¹² Khai rồn bơklơn cau rƀah lơòi mơ cau siơ̆u siar, mơ khai tìs glài ntung kơñau. Khai ò ai wơl phan ai bồ cau ai khai in, khai wèt sền di ală rùp ràk mơ lơh ală bơta cù kìr.

¹³ Khai ai cau càn jền mơ sa cồng kơnjơ̆ mơ ai jền cồng oă rlau. Cau lơh behơ̆ rơp geh kis sơl ơ? Ò, khai rơp ò geh kis! Tài bơh khai neh lơh jơh ală bơta cù kìr hơ̆, gen ngan la khai rơp kong chơt, mơ mhàm khai dê rơp ơm hơđang bồ khai.

¹⁴ Mơya, dilah cau klau do gơs dô nă kòn klau neh gŏ ală bơta tồi glài mơ bèp he neh tìs, mơ bulah khai gŏ ală bơta hơ̆, khai ò lơh ală bơta behơ̆;

¹⁵ hơ̆ la khai ò sa hơđang mơnơm, hala wèt sền di ală rùp ràk hìu Israel dê. Khai ò lơh ƀơ̆ ƀơl bau ùr cau gơp ƀòn khai dê.

¹⁶ Khai ò rồn bơklơn cau lơi hala dan phan ai bồ cau càn jền khai dê. Khai ò tìs glài ntung kơñau mơya khai pà phan sa khai dê cau jơgloh in, mơ ai ồi ào cau ơm kuh lòi rồ in.

¹⁷ Khai ruc tê wơl bơh di tồi glài mơ ò sa jền cồng kơnjơ̆ hala ai jền cồng oă rlau. Khai prap gàr ală bơta boh lam Añ jê mơ lơh jat ală jơnau sồr Añ jê. Khai rơp ò chơt bơh bơta tồi glài bèp khai dê, ngan la khai rơp kis.

¹⁸ Gơwèt mơ bèp khai, tài bơh khai neh lơh ală broă iơh, ntung kơñau ală oh mi khai dê, mơ lơh ală broă ò niam digùl làng bol khai dê, khai chơt bơh tồi glài khai dê.

¹⁹ Bulah behơ̆ bol mê gam lùp lah: ‘Ñchi bơh tài cau kòn ò kong bơta lơh glài bal mơ bèp khai dê taih?’ Tài bơh cau kòn neh lơh jat bơta song mơ dimơ neh kơrhia prap gàr jơh ală jơnau sồr Añ jê: ngan la khai rơp kis.

²⁰ Hwềng soàn lơi tìs glài gen hwềng soàn hơ̆ rơp chơt. Kòn rơp ò kong bơta tồi glài bơh bèp khai dê, mơ bèp kung ò kong bơta tồi glài bơh kòn khai dê sơl. Bơta song ring cau song ring dê rơp geh kòp khai in, mơ bơta iơh bơsak cau iơh bơsak dê rơp cèng bơta cahrña lơh glài khai in.

²¹ Mơya dilah cau iơh bơsak pơrlac sang jơh ală tồi glài khai neh tìs, prap gàr jơh ală jơnau sồr Añ jê, mơ lơh bơta song mơ di, gen ngan la khai rơp kis, khai rơp ò chơt ò.

²² Ò gơs dô nơm tồi glài lơi khai neh tìs rơp gơkòl tơngkah wơl tòmdră mơ khai. Tài bơh ală bơta song ring khai neh lơh gen khai rơp kis.

²³ Jehôwa Yàng Tom Trồ đơs lah: ‘Añ rơp niam nùs bơh bơta chơt cau iơh bơsak dê, sơl ơ? Gơsơlơ̆u wơl, ò di la Añ niam nùs tòm tŭ bol khai pơrlac wơl bơh di ală gùng dà bol khai dê mơ geh kis ò ơ?

²⁴ Mơya dilah dô nă cau song ring pơrlac wơl bơh di bơta song ring khai dê mơ tìs glài, mơ lơh ală bơta cù kìr ndròm bal be cau iơh bơsak lơh gen khai rơp geh kis sơl? Ò gơs dô nơm broă song ring lơi khai neh lơh rơp geh kah wơl. Tài bơh bơta ò dòn song gen khai kong lơh nền glài, mơ tài bơh tồi glài khai neh tìs gen khai rơp chơt.’

²⁵ Bulah behơ̆ bol mê gam đơs lah: ‘Gùng dà Yàng Jehôwa dê ò song ring!’ Ơ hìu Israel, iat tĕ: Gùng dà Añ jê ngan la ò song ring sơl ơ? Ò di la ală gùng dà bol mê dê la ò song ring ơ?

²⁶ Dilah dô nă cau song ring pơrlac sang bơta song ring khai dê mơ tìs glài, khai rơp chơt bơh bơta hơ̆; tài bơh bơta tồi glài khai neh tìs gen khai rơp chơt.

²⁷ Mơya dilah dô nă cau iơh bơsak pơrlac sang bơta iơh bơsak mơ khai neh lơh mơ lơh wơl bơta song ring mơ di gùng gen khai rơp dong klàs bơta kis khai dê.

²⁸ Tài bơh khai kơlôi sơwì jơh ală bơta tồi glài mơ khai neh lơh mơ pơrlac ngài bơh di ală bơta hơ̆, di ngan la khai rơp kis mơ ò chơt.

²⁹ Bulah behơ̆ hìu Israel đơs lah: ‘Gùng dà Yàng Jehôwa dê la ò song ring.’ Ơ hìu Israel, ngan la gùng dà Añ jê ò song ring sơl ơ? Ò di la ală gùng dà bol mê dê ò song ring ò ơ?

³⁰ Gen tàng, Yàng Jehôwa đơs lah: ‘Ơ hìu Israel, Añ rơp cahrña bol mê, kòp nă jat gùng dà khai dê. Gơjrañ sang glài tĕ! Pơrlac ngài tĕ bơh di jơh ală bơta tìs bol mê neh lơh; dilah ò, gen bơta tồi glài rơp la bơta tơnroh bol mê.

³¹ Tă sang tĕ bơh di să tòm bol mê jơh ală bơta tìs mơ bol mê neh lơh mơ gơs tĕ dô nơm nùs pa mơ dô nơm hwềng pa. Ơ hìu Israel, ñchi bơh tài bol mê kòñ chơt taih?’

³² Jehôwa Yàng Tom Trồ đơs lah: ‘Añ ò niam nùs bơh bơta chơt dô nă cau lơi, behơ̆ gơjrañ sang glài tĕ mơ geh kis!’”