Ejekiel 17 - Sră Goh 2018

Bàr nơm klàng bung mơ dô tòm ño

¹ Gơs jơnau Yàng Jehôwa đơs mơ añ lah:

² “Ơ kòn mơnus, ai tĕ dô jơnau đơs pla mơ đơs mơ hìu Israel.

³ Đơs tĕ lah: ‘Jehôwa Yàng Tom Trồ đơs be do: Gơs dô nơm klàng bung dờng gơs ală pơnđar dờng mơ sơnò jòng, să gơ gơs sơnò oă bơnga; gơ par tus di Liban. Gơtă cèng cồng chi nho rề,

⁴ gơ tơrpă cồng chi pa sơmbut mơ pơrdô gơ tus hơ dô nơm lơgar cau kă bro, mơ ơn gơtòm dô nơm ƀòn dờng cau kă bro dê.

⁵ Gen gơ neh ai gar sơntìl tòm lơgar bol mê dê mơ tam tòm tiah ù bơkah. Dô nơm tòm chi tam di tiah oă dà, kung be dô tòm chi nrài dà.

⁶ Gơcat nha mơya liah; ală ntê gơwèt hơ đah klàng bung, ală ryas gơ ơm hơđơm gơ. Behơ̆ gơ gơlik gơs dô tòm ño, gơ gơs ală ntê mơ cat sơmbut pa.

⁷ Mơya gơs dô nơm klàng bung dờng ndai gơs pơnđar dờng mơ oă ngan sơnò. Mơ sền ne, tòm ño pò tơlik ryas gơ dê wèt hơ klàng kung, mơ ntê gơ gơrò hơ đah klàng bung, nàng gơtuh dà tòm ño in. Bơh gơ neh geh tam tòm ù ò niam.

⁸ Mơ gơ neh geh crap tòp di ù tiah niam mơ rềp di gah oă dà tồ gơ in cat ntê, gơlik plai, mơ gơlik gơs dô tòm ño niam.’

⁹ Mê đơs tĕ mơ bol khai lah: ‘Jehôwa Yàng Tom Trồ đơs be do: Tòm ño hơ̆ rơp geh tơlir niam sơl? Gơ rơp ò kong dus mơ pic sang jơh plai gơ dê tồ gơ in ro jrùh, jơh ală bơta hòn dờng pa gơ dê rơp ro jrùh sơl ơ? Ò càng gơs tơwòr tê pràn hala ling pràn kơldang nàng dus gơ bơh ryas gơ dê.

¹⁰ Tòm Tŭ gơ geh tam pa wơl gen gơ rơp geh tơlir niam sơl? Tòm tŭ càl đah mattơngai lik àl gơ, gơ rơp ò ro jrùh jơh hir, ro jrùh di tiah mơ gơ neh hòn dờng sơl ơ?’”

¹¹ Gen gơs jơnau Yàng Jehôwa đơs mơ añ lah:

¹² “Đơs tĕ mơ hìu jak tòmdră do lah: ‘Bol mê ò git bơta hơ̆ gơs jơnau gơtha mbe lơi ơ?’ Đơs tĕ mơ bol khai lah: ‘Bơtau Babilôn neh lòt tus tòm Jerusalem, neh kup cau bơtau mơ ală cau ryŭ ryơm gơ dê cèng bal mơ khai hơ Babilôn.

¹³ Lồc behơ̆ khai neh ai dô nă cau tòm hìu cau bơtau dê mơ bơtào dô bơta ho bal mơ cau hơ̆, sồr khai srat să ho nền. Khai kung neh kup cèng ală cau lam bồ lơgar dê,

¹⁴ nàng lơh lơgar in gơ mù wơl, ò rgơi bơtào tơngguh tai, mìng gam kơnòm di bơta prap gàr bơta ho bal khai dê.

¹⁵ Mơya bơtau hơ̆ neh bơtào tòmdră mơ cau Babilôn, sồr dô mpồl cau kong sồr lòt tus hơ lơgar Ejiptơ nàng dòp geh ală ơseh mơ dô mpồl oă cau ling. Khai rơp geh bơtoah bơtoài sơl? Dô nă cau lơh ală bơta behơ̆ rơp geh lik klàs sơl? Khai gơltac bơta ho bal mơ gam rgơi lik klàs sơl?’

¹⁶ Jehôwa Yàng Tom Trồ đơs lah: ‘Di ngan kung be Añ kis, khai rơp chơt tòm Babilôn, tòm lơgar gơrê mơ cau bơtau neh ơn khai hơđang sơbàn, la cau bơtau mơ khai neh sền òsơp di jơnau srat să ho nền mơ gơltac bơta ho bal.

¹⁷ Pharaôn bal mơ mpồl ling oă cau mơ gơnoar pràn khai dê rơp ò dong kòl khai tòm bơta tòmlơh, tòm tŭ cau Babilôn bơt ală dơrñang mơ ơm kơp gơrwàng gùt dar nàng tơnroh oă cau.

¹⁸ Tài bơh khai neh sền òsơp di jơnau srat să ho nền, mơ neh gơltac bơta ho bal. Tài bơh khai neh at tê tòmho bal rau mơya khai gam lơh jơh ală bơta hơ̆ gen khai rơp ò geh lik klàs.’

¹⁹ Behơ̆ tàng, Jehôwa Yàng Tom Trồ đơs be do: ‘Di ngan kung be Añ kis, Añ rơp tơndùh hơđang bồ khai jơnau srat să ho nền añ jê mơ khai neh sền òsơp mơ bơta ho bal mơ khai neh gơltac sang.

²⁰ Añ rơp dang bơtơng Añ jê nàng kup khai mơ khai rơp yar tòm dă Añ jê. Añ rơp cèng khai tus hơ Babilôn mơ tềng hơ̆ Añ rơp cahrña khai tài bơh khai ò dòn song mơ Añ.

²¹ Jơh ală mpồl ling ntoat dô khai dê rơp gơpừ hơđơm lơmpiat đào, mơ ală cau gam kis rơp kong nrah nring tòm poan đah càl. Gen bol mê rơp git Añ la Yàng Jehôwa neh đơs behơ̆.’”

Israel geh hòn chò tòm tŭ lồi dut

²² Jehôwa Yàng Tom Trồ đơs lah: “Să tòm Añ rơp ai dô nơm sơmbut bơh hơđang bồ chi nho rề mơ Añ rơp tam gơ; Añ rơp dơrpă dô nơm ntê lơbơn bơh di sơmbut hơđang cồng bồ gơ mơ tam gơ hơđang dô nơm mơnơm jơnhoa.

²³ Añ rơp tam gơ hơđang ală tiah jơnhoa mơnơm Israel dê; gơ rơp cat ală ntê, gơlik plai mơ gơlik gơs dô nơm chi nho rề hàng mơnĕ. Tơl ală jơi sềm rơp lơh rsòn hơđang gơ; bol gơ rơp jòi geh tiah ơm hơđơm mƀur ală ntê gơ dê.

²⁴ Jơh ală chi tòm ƀlàng rơp git hơ̆ la Añ, Yàng Jehôwa, neh tơmù chi jơnhoa hơđơm mơ yò tơngguh chi liah hơđang. Añ lơh ro chi tơlir mơ lơh chi ro gơlik tơlir niam wơl. Añ la Yàng Jehôwa, neh đơs mơ Añ rơp lơh bơta hơ̆.”