Ejekiel 16 - Sră Goh 2018

Dô jơnau đơs pơnyơu bơh bơta ò dòn song Jerusalem dê

¹ Gơs jơnau Yàng Jehôwa đơs mơ añ lah:

² “Ơ kòn mơnus, ai tĕ Jerusalem in git ală broă lơh cù kìr gơ dê,

³ mơ đơs tĕ lah: ‘Jehôwa Yàng Tom Trồ đơs mơ Jerusalem be do: “Tòm ryas ai dê mơ tiah ai geh deh la tòm lơgar cau Kanaan; bèp ai la dô nă cau Amôrit, mè ai la dô nă cau Hetit.

⁴ Kung be tòm ngai ai geh deh, tòm ngai ai pa deh, che klŏ ai òhềt koh, Añ òhềt tơnum ai tòm dà nàng geh rào goh, òhềt tho ai mơ boh hala pùt ai tòm ồi.

⁵ Ò gơs mat sền nđàc sơngit di ai hala lơh dô bơta lơi tòm ală bơta hơ̆ ai in nàng kòñ nđàc di ai. Mơya ai kòl sang lòi tòm ƀlàng ò gơs chi che, bơh ai neh kòl sền òsơp tòm ngai ai geh deh.”

⁶ Añ lòt gan mơ gŏ ai wañ tòm mhàm, mơ tòm tŭ ai bic tòm mhàm ai dê, Añ đơs mơ ai lah: “Kis tĕ!

⁷ mơ hòn dờng kung be dô nơm chi tòm ƀlàng sre.” Ai neh gơtă dờng mơ gơlik jơnhoa hàng mơnĕ rlau jơh. Toh ai neh but, sŏ ai neh jòng, mơ ai ya gam ơm kuh mơ lòi rồ.

⁸ Añ lòt gan ai tai mơ sền di ai, ai neh di tŭ git kòñ gơboh. Añ lă mum ào jrùh Añ jê hơđang ai, jơm să kuh ai dê. Añ ai să tòm Añ ho pơgon mơ ai mơ bơtào dô bơta ho bal mơ ai gen ai gơrê bal mơ Añ,’ Jehôwa Yàng Tom Trồ đơs behơ̆.

⁹ ‘Gen Añ tơnum ai tòm dà, rào goh jơh mhàm di să ai, mơ bong mơñà ai in.

¹⁰ Añ tơnsoh ào jing bơka niam ai in, mơ tơnjă khŏ mơ gơltau niam. Añ pùt ai tòm bài che dơmài lơbơn, mơ jơm gòm ai mơ bài kas màng.

¹¹ Añ bơka să ai mơ ală phan bơka să. Añ tơndò kòng di tê ai mơ tơnwan che rơnjài di ngko ai.

¹² Añ ơn dô nơm sơmbiat di muh ai, blo bơno di tồr ai, mơ tơndau dô nơm sơgơn hàng mơnĕ hơđang bồ ai.

¹³ Behơ̆, ai geh bơka să mơ màh mơ priă; ồi ào ai dê mơ bài che dơmài lơbơn, bài kas màng mơ jing bơka hàng mơnĕ. Phan sa ai dê la kơmbuh phe mi, dà lơwe mơ mơñà. Ai neh gơlik gơs hàng mơnĕ ngan, mơ gơlik gơs kung be bau ùr bơtau dê.

¹⁴ Bơta hàng mơnĕ ai dê geh tiơng pơnro tòm làm ală lơgar tài bơh bơta gơklŏ Añ neh ai ai in lơh bơta hàng mơnĕ ai in gơlik gơs wil tơl,’ Jehôwa Yàng Tom Trồ đơs behơ̆.

¹⁵ ‘Mơya ai kơnòm di bơta hàng mơnĕ ai dê mơ ngui bơta tiơng pơnro ai dê mơ gơlik gơs dô nă ùr dri. Ai khat gơboh tòmtir mơ cau lơi lòt gan, mơ bơta hàng mơnĕ ai dê gơrê bal mơ cau hơ̆.

¹⁶ Ai ngui ồi ào ai dê nàng lơh ală tiah jòng hàng mơnĕ, tềng hơ̆ ai lơh bơta dri tơlàr. Ală bơta hơ̆ ò di pal gơs, mơ kung ò di gơs tŭ lơi gơlik tus.

¹⁷ Ai kung neh ngui ală phan bơka să hàng mơnĕ mơ Añ neh ai ai in, la ală phan bơka să lơh mơ màh mơ priă Añ jê, nàng lơh gơs ai in ală rùp ràk cau klau mơ lơh bơta dri tơlàr mơ bol khai.

¹⁸ Ai kung neh ngui ală ồi ào jing bơka hàng mơnĕ nàng tơ̆ hơđang bol khai, ai ơn mơñà mơ kơlhô di đap bol khai.

¹⁹ Phan sa mơ Añ neh rcang pà ai in, hơ̆ la kơmbuh phe niam, mơñà ôlibe, mơ dà lơwe mơ Añ ai ai in sa, gen ai ơn lơh gơs phan ƀô bơlhu di đap bol khai. Hơ̆ la bơta neh gơlik gơs ngan,’ Jehôwa Yàng Tom Trồ đơs behơ̆.

²⁰ ‘Gen ai neh kup ală kòn klau mơ ală kòn ùr mơ ai neh tơnggơs Añ in mơ ơn bol khai lơh gơs kung be phan sa ală rùp ràk in. Bơta dri tơlàr ai dê kàr hơ̆ ò tơl sơl ơ?

²¹ Ai neh tơnchơt ală kòn Añ jê mơ neh ơn bol khai lơh gơs phan ơn chu ală rùp ràk in.

²² Tòm jơh ală broă lơh cù kìr mơ bơta dri tơlàr dê, ai ò kah wơl ală ngai tòm tŭ ai gam kơnòm să, tòm tŭ ai ơm kuh lòi rồ mơ wañ tòm mhàm.’

²³ Jehôwa Yàng Tom Trồ đơs lah: ‘Bòl glar, bòl glar ai in! Gơbơtơl tai hơđang jơh ală bơta iơh bơsak ndai ai dê,

²⁴ ai neh bơt bơtào dô bă tiah jơnhoa hơđang să tòm ai in mơ lơh gơs dô nơm hìu bơmồng jơnhoa tòm kòp nơm gùng tòm ƀòn dờng.

²⁵ Di bồ ală gùng, ai neh bơt bơtào ală hìu bơmồng jơnhoa, mơ neh lơh bơta hàng mơnĕ ai dê gơlik cù kìr, ai neh ơn să ai dê tòm bơta rềs àr dri tơlàr sơlo ngai sơlo oă mơ kòp nă cau lòt gan.

²⁶ Ai neh lơh bơta dri tơlàr mơ ală cau Ejiptơ la cau gơp ƀòn ai dê gơs bềng nùs hàm kòñ poac să, mơ ai neh bơrcek Añ gơhào gơjrañ bơh bơta dri tơlàr sơlo ngai sơlo oă ai dê.

²⁷ Behơ̆, Añ neh pò tê tòmdră mơ ai mơ pơndêt lơgar ai dê; Añ jào phi ai tòm bơta hàm hà cau sò tơm ai dê, hơ̆ la ală kòn ùr Philistin; bol khai neh ai lơh krơi bơh bơta lơh lòt gơlềng gơlàng ai dê.

²⁸ Ai kung neh lơh bơta dri tơlàr mơ ală cau Asiri, tài bơh ai oă hàm kòñ bơta hơ̆, mơ bulah tơnơ̆ mơ hơ̆, ai kung ò làp dil.

²⁹ Gen ai neh bơtơl bơta dri tơlàr ai dê mơ Babilôn la lơgar gơs oă cau kă bro, mơya bulah neh lơh behơ̆, ai kung ò làp dil!’

³⁰ Jehôwa Yàng Tom Trồ đơs lah: ‘Ai gơs nùs hàm kòñ ò git nđò tòm tŭ ai neh lơh jơh ală bơta hơ̆, lơh kung be dô nă cau ùr dri ò git ƀàssìl ƀàsso!

³¹ Tòm tŭ ai bơt ală tiah jơnhoa hơđang ai dê di bồ kòp nơm gùng, mơ bơtào ală hìu bơmồng jơnhoa tòm kòp nơm gùng, ai lơh ò di kung be cau ùr dri, bơh ai sền òsơp di jền cau tơm ai in.

³² Ơ bau ùr rềs àr bơrnàn! La cau neh dòp cau klau crih mat ala bau klau ai dê!

³³ Kòp nă cau ùr dri dòp dô khà jền cau tơm khai in; mơya ai gen cèng phan ai gòi ai jơh ală cau klau mơ ai kòñ gơboh; loă bol khai nàng tus hơ ai bơh làm bă tiah bơh bơta hòi jà tìs ai dê.

³⁴ Behơ̆, tòm bơta lơh dri tơlàr ai dê, ai neh lơh sơlơ̆u wơl mơ ală ùr ndai; ò gơs dô nă cau lơi ntoat jat ai bơh jơnau hòi jà ai dê; bơh ai tơm jền cau in mơ ò gơs dô nă cau lơi tơm ai in, ai la cau krơi is ngan.

³⁵ Behơ̆ gen, ơ cau ùr dri tơlàr, iat tĕ jơnau Yàng Jehôwa dê.’

³⁶ Jehôwa Yàng Tom Trồ đơs be do: ‘Tài bơh ai neh tuh tơlik phan mơna jền priă ai dê, mơ ràng tơlik să kuh ai dê tòm bơta dri tơlàr mơ cau klau ai kòñ gơboh; mơ tài bơh jơh ală rùp ràk cù kìr ai dê, kung tài bơh mhàm ală kòn sau ai dê mơ ai neh ơn bol gơ in,

³⁷ gen tàng Añ rơp pơjum jơh ală cau tòmtir mơ ai, la ală cau neh lơh ai in niam nùs, ală cau ai kòñ gơboh bal mơ ală cau ai gơjrañ kơuềng. Añ rơp pơjum bol khai tòmdră mơ ai bơh di jơh ală lơgar gùt dar, mơ Añ rơp hồ ồi ào ai di đap bol khai, mơ bol khai rơp sền gŏ jơh să jan ơm kuh lòi rồ ai dê.

³⁸ Añ rơp cahrña mơ lơh glài ai kung be lơh glài ală cau ùr rềs àr bơrnàn mơ lơh gơhòr mhàm; Añ rơp tuh hơđang ai mhàm bơta sal tê bơh bơta gơjrañ dờng mơ bơta ƀoah pơrñat Añ jê.

³⁹ Gen Añ rơp phi ai tòm tê ală cau ai kòñ gơboh, bol khai rơp sòr tơrlah ală tiah jơnhoa mơ tơnroh ală hìu bơmồng jơnhoa ai dê. Bol khai rơp hồ ồi ào ai dê, tă ai ală phan bơka să hàng mơnĕ ai dê, mơ sang lòi ai ơm kuh lòi rồ.

⁴⁰ Bol khai rơp cèng tus dô mpồl cau tòmdră mơ ai, rơp cơm lŭ di ai mơ ngui đào koh ai rpot rpet.

⁴¹ Bol khai rơp ai ồs chu ală hìu ai dê mơ lơh glài ai di đap oă cau ùr. Añ rơp pơndut bơta rềs àr dri tơlàr ai dê, mơ ai rơp ò tai ai jền tơngai ală cau ai kòñ gơboh in.

⁴² Gen bơta gơjrañ dờng Añ jê tòmdră mơ ai rơp rài, mơ bơta ƀoah pơrñat Añ jê rơp pơrlac ngài bơh di ai; Añ rơp ơm mŏ mŏ, ò gơjrañ tai.

⁴³ Tài bơh ai ò kah ală ngai tòm tŭ ai gam kơnòm să, mơya neh lơh Añ in gơhào gơjrañ bơh jơh ală bơta do, gen ngan la Añ rơp tơndùh hơđang ai ală bơta ai neh lơh,’ Jehôwa Yàng Tom Trồ đơs behơ̆. Ai ò di neh bơtơl bơta rềs àr bơrnàn tòm ală broă cù kìr ai neh lơh ò ơ?

⁴⁴ Kòp nă cau òs ngui jơnau pơnđik rơp đơs wơl jơnau pơnđik do bơh ai mơ lah: ‘Mè mbe lơi, gen kòn ùr behơ̆!’

⁴⁵ Ai la dô nă kòn ùr tòm mè ai dê; mè ai neh sền òsơp bau klau mơ kòn khai dê; ai la oh ùr tòm ală bi ùr ai dê la ală cau neh sền òsơp di ală bau mơ ală kòn bol khai dê. Mè ai dê la dô nă cau Hetit, mơ bèp ai la dô nă cau Amôrit.

⁴⁶ Bi ùr ai dê la Samari la cau ơm tòm lơgar đah đang ai dê bal mơ ală kòn ùr khai dê, mơ oh ùr ai dê la Sôdôm bal mơ ală kòn ùr khai dê ơm tòm lơgar đah đơm ai dê.

⁴⁷ Ai neh ò di mìng cơnđòa lòt jat ală gùng dà bol khai dê mơ đòm jat ală broă cù kìr ƀơ̆ ƀơl khai neh lơh, mơya ai kung neh mhar gơlik gơs ồm lề rlau mơ bol khai tòm jơh ală gùng dà ai dê.

⁴⁸ Jehôwa Yàng Tom Trồ đơs lah: ‘Di ngan kung be Añ kis, Sôdôm, oh ùr ai dê, bal mơ ală kòn ùr khai dê òhềt tŭ lơi lơh bơta ai mơ ală kòn ùr ai dê neh lơh.

⁴⁹ Do la bơta tồi glài oh ùr ai dê la Sôdôm: Khai mơ ală kòn ùr khai dê pơnhừ să, jròk ñô sa, mơ ò git kơlôi bơh cau lơi; bol khai ò dong kòl ală cau rƀah lơòi mơ siơ̆u siar.

⁵⁰ Bol khai jòng să mơ lơh ală bơta cù kìr di đap Añ. Gen tàng Añ neh sang lòi bol khai kung be ai neh gŏ.

⁵¹ Tồi glài mơ Samari neh tìs ò tus di nggùl tồi glài mơ ai neh lơh. Ai neh lơh oă bơta cù kìr rlau mơ bol khai, mơ ai neh lơh ală oh mi ai dê gơlơh song ring bơh ală broă cù kìr ai dê.

⁵² Ai kong tĕ bơta cau sền òsơp, bơh ai neh ai kai nàng ală oh mi ai dê rgơi tò să bol khai dê. Tài bơh ală bơta tồi glài ai dê la iơh rmơh rlau mơ tồi glài bol khai dê, gen bol khai geh sền gơlơh be la song ring rlau mơ ai. Behơ̆ gen, kong tĕ bơta ƀàssìl ƀàsso mơ bơta sền òsơp, bơh ai neh lơh oh mi ai dê geh sền la song ring!

⁵³ Bulah behơ̆, Añ rơp bơtào wơl sre brê Sôdôm mơ ală kòn ùr khai in, Samari mơ ală kòn ùr khai in, mơ sre brê ai dê bal mơ bol khai,

⁵⁴ nàng ai kong bơta cau sền òsơp mơ bơta ƀàssìl ƀàsso bơh ală bơta ai neh lơh nàng ai bol khai in bơta pơndòm pơniang.

⁵⁵ Mơ oh mi ai dê la Sôdôm mơ ală kòn ùr khai dê bal mơ Samari bal mơ ală kòn ùr khai dê, rơp rê wơl kung be ngai lài òr; mơ ai mơ ală kòn ùr ai dê kung rê wơl be lài òr.

⁵⁶ Ai kung rơp ò hoan đơs bơh sơnđan oh ùr ai dê la Sôdôm tòm ngai ai jòng să ai dê,

⁵⁷ tòm tŭ bơta iơh bơsak ai dê òhềt ràng tơlik. Bulah behơ̆, tŭ do ai kong lah pơrhơng bơh di ală kòn ùr Edôm bal mơ jơh ală lơgar ơm gùt dar gơ, mơ ală kòn ùr Philistin sơl, hơ̆ la jơh ală lơgar ơm gùt dar ai sền òsơp di ai.

⁵⁸ Ai rơp àñ ală cồng nha gơlik gơs bơh bơta rềs àr bơrnàn ai dê mơ ală broă cù kìr ai neh lơh,’” Yàng Jehôwa đơs behơ̆.

Bơta ho bal gam sùm sùm

⁵⁹ Jehôwa Yàng Tom Trồ đơs be do: “Añ rơp lơh gơwèt mơ ai jat bơta ai pal kong tài bơh ai neh sền òsơp di jơnau srat să ho pơgon Añ jê bơh bơta ai sang lòi bơta ho bal.

⁶⁰ Bulah behơ̆, Añ rơp kah wơl bơta ho bal Añ neh bơtào mơ ai tòm ngai ai gam kơnòm să, mơ Añ rơp bơtào mơ ai dô bơta ho bal gam sùm sùm.

⁶¹ Gen ai rơp kah wơl ală gùng dà ai dê mơ ƀàssìl ƀàsso tòm tŭ ai wă rò ală oh mi ai dê, ală cau dờng sơnam rlau mơ ai bal mơ ală cau dềt sơnam rlau mơ ai. Añ rơp ai bol khai ai in lơh gơs kung be ală kòn ùr, mơya ò di jat bơta ho bal mơ Añ neh bơtào mơ ai.

⁶² Behơ̆, Añ rơp bơtào bơta ho bal Añ jê mơ ai, mơ ai rơp git Añ la Yàng Jehôwa.

⁶³ Gen tòm tŭ Añ lơh bơta tơwài glài ai in bơh jơh ală bơta ai neh lơh, ai rơp kah wơl mơ ƀàssìl, mơ ai ò gam pò bơr tai tài bơh bơta ƀàssìl ƀàsso ai dê,” Jehôwa Yàng Tom Trồ đơs behơ̆.