Ejekiel 15 - Sră Goh 2018

Jerusalem kung be dô tòm ño ò kwơ

¹ Gơs jơnau Yàng Jehôwa đơs mơ añ lah:

² “Ơ kòn mơnus, mbe tòm chi ño rgơi gơs lin rlau mơ ală tòm ño ndai digùl ală chi tòm brê taih?

³ Mpàn gơlik bơh gơlơh gơs phan lơi gơs kwơ sơl? Rgơi lơh gơs mơng pơng nàng yồng phan sơl?

⁴ Sang gơtòm ồs nàng sing, tòm tŭ ồs neh sa bàr đah bồ gơ, mơ gơl digùl ồs sa gơs chah, gen gơ gam gơs kwơ tòm broă lơi taih?

⁵ Tòm tŭ gơ gam gơs wil tơl gơ neh la ò gơs kwơ bơta lơi in, tơ ài lah tòm tŭ gơ neh ồs sa gơs chah rau gen sơlo ò kwơ rlau tai ò git nđò nàng lơh gơs kwơ phan lơi in!”

⁶ Gen tàng, Jehôwa Yàng Tom Trồ đơs be do: “Kung be tòm ño digùl ală chi tòm brê mơ Añ neh ai nàng lơh gơs lòng sing ồs, gen Añ kung rơp lơh behơ̆ gơwèt hơ làng bol Jerusalem.

⁷ Añ rơp wèt mat tòmdră mơ bol khai. Bulah bol khai neh lik klàs bơh ồs, ồs rơp gam chu pơrguc bol khai. Mơ mê rơp git Añ la Yàng Jehôwa, tòm tŭ Añ wèt mat tòmdră mơ bol khai.

⁸ Mơ Añ rơp lơh lơgar gơlik tiah ngềt ngơt, tài bơh bol khai neh lơh broă ò dòn song,” Jehôwa Yàng Tom Trồ đơs behơ̆.