Ejekiel 13 - Sră Goh 2018

Lơh nền glài ală cau gơnoar hwơr ma blac

¹ Gơs jơnau Yàng Jehôwa đơs mơ añ lah:

² “Ơ kòn mơnus, đơs hwơr tĕ tòmdră mơ ală cau gơnoar hwơr Israel dê la ală cau ơm đơs hwơr. Đơs tĕ mơ ală cau đơs hwơr bơh bơta kơlôi sơnơng is bol khai dê lah: ‘Iat tĕ jơnau Yàng Jehôwa dê!’

³ Jehôwa Yàng Tom Trồ đơs be do: ‘Bòl glar ngan ală cau gơnoar hwơr tùl gơla, ne la ală cau đơs jat hwềng nùs is bol khai dê, mơ ò gŏ bơta lơi ò!

⁴ Ơ Israel, ală cau gơnoar hwơr bol mê dê kung be ală so brê ơm tòm tiah roh rui.

⁵ Bol mê ò lòt tus di ală tiah tơrlah dơrñang dê nàng bơt wơl dô nơm dơrñang hìu Israel in, nàng gơ rơp ntào kơ̆ tòm bơta tòmlơh tòm ngai Yàng Jehôwa dê.

⁶ Bơta gơtơnggŏ bol khai dê la ò gơs ngan, mơ jơnau đơs hwơr bol khai dê la blac. Bol khai đơs lah: “Yàng Jehôwa đơs,” tòm tŭ Yàng Jehôwa ò sồr bol khai, bulah behơ̆ bol khai kơp gơn ală jơnau bol khai dê geh gơlik gơs wil tơl.

⁷ Bol mê ò di neh gŏ ală bơta gơtơnggŏ tìs mơ đơs hwơr ma blac tòm tŭ bol mê đơs lah: “Yàng Jehôwa đơs,” bulah Añ ò đơs ò ơ?’

⁸ Gen tàng, Jehôwa Yàng Tom Trồ đơs be do: ‘Tài bơh ală jơnau tìs mơ ală bơta gơtơnggŏ blac bol mê dê; do, Añ tòmdră mơ bol mê,’ Yàng Jehôwa đơs behơ̆.

⁹ Tê Añ rơp tòmdră mơ ală cau gơnoar hwơr gŏ bơta gơtơnggŏ tìs mơ đơs hwơr ma blac. Bol khai rơp ò gơrê bal mơ mpồl tơrña broă làng bol Añ jê hala geh cih mat tòm sră hìu Israel dê, mơ bol khai kung rơp ò geh mut tòm lơgar Israel dê. Gen bol mê rơp git Añ la Jehôwa Yàng Tom Trồ.

¹⁰ Tài bơh, ngan bol khai neh lam làng bol Añ jê lòt tìs nrah tòm tŭ đơs lah: ‘Ring lơngai,’ mơya ò gơs bơta ring lơngai dô êt lơi; mơ tòm tŭ làng bol bơt dô nơm dơrñang, bol khai pih cùr bò hơđang gơ.

¹¹ Đơs tĕ mơ ală cau pih gơ mơ cùr bò lah gơ rơp tơrlơm. Tềng hơ̆ rơp gơs dà kŏ mìu dờng tus, lŭ piar rơp dùh mơ càl rbut dờng rơp khồm pràn.

¹² Tòm tŭ dơrñang tơrlah tơrlơm, ò di rơp lùp bol mê lah: ‘Ntềng đah cùr bò mơ bol mê neh pih dơrñang taih?’

¹³ Behơ̆ gen, Jehôwa Yàng Tom Trồ đơs be do: ‘Tòm bơta gơjrañ dờng Añ jê, Añ rơp sồr càl rbut dờng, mơ tòm bơta gơhào gơjrañ Añ jê, Añ rơp dùh lŭ piar mơ mìu dờng tơnroh lề lac jơh.

¹⁴ Añ rơp sòr tơrlah dơrñang mơ bol mê neh pih mơ cùr bò, mơ rơp tơmù gơ tus di ù, tian gơs mpòl mơnàng gơ. Tòm tŭ gơpừ tơrlah, bol mê rơp kong tơnroh tòm dơlam gơ, mơ bol mê rơp git lah Añ la Yàng Jehôwa.

¹⁵ Behơ̆, Añ rơp dùh bơta gơjrañ dờng Añ jê hơđang dơrñang mơ ală cau pih gơ mơ cùr bò; mơ Añ rơp đơs mơ bol mê lah: “Dơrñang ò gam tai, mơ ală cau pih gơ mơ cùr bò kung behơ̆ sơl,

¹⁶ hơ̆ la ală cau gơnoar hwơr Israel dê neh đơs hwơr mơ Jerusalem, sền ală bơta gơtơnggŏ ring lơngai gơ in tòm tŭ ò gơs ring lơngai, Jehôwa Yàng Tom Trồ đơs behơ̆.”’

¹⁷ Ai mê ơ kòn mơnus, mê wèt mat tòmdră mơ ală kòn ùr làng bol mê dê, la ală cau đơs hwơr jat bơta kơlôi sơnơng is bol khai dê. Đơs hwơr tòmdră mơ bol khai,

¹⁸ mơ đơs lah: ‘Jehôwa Yàng Tom Trồ đơs be do: Bòl glar ngan ală cau ùr in jing crìu gun di ală ko tê, mơ lơh chèo gòm bồ jòng liah krơi is nàng mòc bơta kis kòn mơnus. Bol ai rơp tơnroh bơta kis làng bol Añ jê mơ pơnjat sùm bơta kis să tòm bol ai dê sơl ơ?

¹⁹ Bol ai neh sền òsơp di Añ digùl ală làng bol bơh dô sơmbat kòi brà mơ dô êt piang lă. Bơh jơnau đơs blac mơ làng bol Añ jê la cau iat ală jơnau đơs blac, bol ai tơnchơt ală cau ò di pal chơt mơ lòi kis ală cau ò di pal kis.’

²⁰ Gen tàng, Jehôwa Yàng Tom Trồ đơs be do: ‘Añ tòmdră mơ ală crìu gun bol ai dê mơ bol ai ngui nàng mòc bơta kis, Añ rơp crè gơ bơh tơwòr tê bol ai dê; Añ rơp tơngklàs làng bol mơ bol ai neh mòc geh kung be sềm.

²¹ Añ rơp crè chèo jơm mat bol ai dê mơ dong klàs làng bol Añ jê bơh di tê bol ai, mơ bol khai rơp ò tai kòl kup tòm tê bol ai dê. Mơ bol ai rơp git Añ la Yàng Jehôwa.

²² Tài bơh bol ai neh ai bơta đơs blac lơh gơplơ̆ nùs cau song ring tòm tŭ Añ ò lơh bol khai in moat jrùng, mơ tài bơh bol ai chồl nùs cau iơh bơsak nàng bol khai ò rê wơl bơh di ală gùng iơh bol khai dê tồ dong klàs bơta kis bol khai dê,

²³ gen tàng bol ai rơp ò tai gŏ bơta gơtơnggŏ blac hala đơs hwơr tai. Añ rơp dong tă làng bol Añ klàs bơh di tê bol ai. Gen bol ai rơp git Añ la Yàng Jehôwa.’”