Ejekiel 11 - Sră Goh 2018

Bơta cahrña ală kwang at bồ Israel dê

¹ Gen Hwềng yò tơngguh añ mơ cèng añ tus di mpồng dờng đah mattơngai lik hìu Yàng Jehôwa dê, wèt hơ đah mattơngai lik.Tềng hơ̆, di gùng mut tòm mpồng dờng gơs bàr jơt pram nă cau klau; digùl bol khai, añ gŏ gơs Jaajania kòn klau Ajur, mơ Phelatia kòn klau Benayah, la ală cau kwang at bồ làng bol.

² Yàng Jehôwa đơs mơ añ lah: “Ơ kòn mơnus, hơ̆ la ală cau bơtào gơs bơta tìs mơ bơyai lơh bơta iơh tòm ƀòn dờng do;

³ bol khai đơs lah: ‘Tŭ do ò di la tŭ bơt bơtào hìu ơm. Ƀòn dờng do la glah, mơ bol he la poac.’

⁴ Behơ̆ gen, đơs hwơr tĕ tòmdră mơ bol khai, ơ kòn mơnus, đơs hwơr tĕ!”

⁵ Gen Hwềng Yàng Jehôwa dê mù hơđang añ, mơ Kơnràñ đơs mơ añ lah: “Yàng Jehôwa đơs be do: ‘Ơ hìu Israel, do la ală bơta kơlôi sơnơng bol mê dê, mơya Añ git ală bơta kơlôi sơnơng tòm dơngoh bol mê dê.

⁶ Bol mê neh tơnchơt oă ngan cau tòm ƀòn dờng do, mơ lơh bềng ƀồc chơt tòm ală gùng gơ dê.’

⁷ Gen tàng, Yàng Jehôwa đơs be do: ‘Ƀồc chơt ală cau mơ bol mê neh sang lòi tềng hơ̆ la poac, mơ ƀòn dờng la glah; ai bol mê rơp pal kong ting bơtrơh bơh digùl gơ.

⁸ Bol mê neh rngòt di pềs tà, mơ Añ rơp cèng pềs tà tus hơđang bol mê, Jehôwa Yàng Tom Trồ đơs behơ̆.

⁹ Añ rơp tă tơlik bol mê bơh digùl ƀòn dờng do, mơ jào bol mê tòm tê làng bol lơgar bơdìh, mơ rơp lơh gơs bơta cahrña hơđang bol mê.

¹⁰ Bol mê rơp gơpừ bơh đào; mơ Añ rơp cahrña bol mê di tiah nhàr lơgar Israel dê. Gen bol mê rơp git lah Añ la Yàng Jehôwa.

¹¹ Ƀòn dờng do rơp ò lơh gơs glah bol mê in, bol mê kung rơp ò di lơh gơs poac tòm hơ̆; Añ rơp cahrña bol mê di tiah nhàr lơgar Israel dê.

¹² Gen bol mê rơp git Añ la Yàng Jehôwa, bơh bol mê neh ò lơh jat ală bơta sồr lam hala prap gàr ală bơta sồr lam Añ jê; mơya bol mê neh lơh jat ală sơnoa rnoas ală lơgar ơm gùt dar bol mê.’”

¹³ Gen, jat be añ neh đơs hwơr, Phelatia, kòn klau Benayah, chơt. Gen añ bic blup mat tòm ù mơ driau dờng lah: “Ơ hơh! Ơ Jehôwa Yàng Tom Trồ, Kơnràñ rơp tơnroh jơh làng bol gam wơl Israel dê, sơl ơ?”

Yàng Tom Trồ rơp tơm wơl Israel in

¹⁴ Gen gơs jơnau Yàng Jehôwa đơs mơ añ lah:

¹⁵ “Ơ kòn mơnus, ală oh mi mê dê, ală oh mi mê dê la làng bol kong kup cèng pơrdô bal mơ mê, mơ jơh dô nơm hìu Israel, la ală cau mơ làng bol Jerusalem neh đơs lah: ‘Bol khai ơm ngài ngan bơh di Yàng Jehôwa; lơgar do neh geh ai bol he in lơh gơs sre brê.’

¹⁶ Behơ̆ gen, đơs tĕ lah: ‘Yàng Jehôwa At Bồ Hơđang Jơh đơs be do: Bulah Añ neh cèng bol khai tus di tiah ngài digùl ală làng bol, neh lơh bol khai in gơprah gơpring tòm ală lơgar, Añ kung gam la tiah sàng goh bol khai in tòm dô êt jŏ tòm ală lơgar mơ bol khai neh lòt tus.’

¹⁷ Behơ̆ gen, đơs tĕ lah: ‘Yàng Jehôwa đơs be do: Añ rơp pơjum bol mê wơl bơh digùl ală làng bol, Añ rơp cèng bol mê rê wơl bơh di ală lơgar mơ bol mê neh kong nrah nring, mơ Añ rơp ai wơl bol mê in lơgar Israel.

¹⁸ Tòm tŭ bol khai rơp rê wơl tềng hơ̆, bol khai rơp tă sang jơh ală rùp duh khoai iơh rmơh mơ ală rùp ràk cù kìr.

¹⁹ Añ rơp ai bol khai in dô nơm nùs ò wil wơl, mơ ai dô nơm hwềng pa tòm bol khai; Añ rơp tă sang nùs mơ lŭ bơh di bol khai mơ ai bol khai in dô nơm nùs mơ poac,

²⁰ behơ̆ tàng bol khai rơp lơh jat ală bơta sồr lam Añ jê mơ kơrhia prap gàr ală bơta sồr lam Añ jê. Bol khai rơp lơh gơs làng bol Añ jê, mơ Añ rơp lơh gơs Yàng Tom Trồ bol khai dê.

²¹ Mơya gơwèt mơ ală cau gơs nùs lòt jat ală rùp duh khoai iơh rmơh mơ ală rùp ràk cù kìr bol khai dê, gen Añ rơp tuh wơl ală bơta bol khai neh lơh hơđang bồ bol khai dê,’ Jehôwa Yàng Tom Trồ đơs behơ̆.”

²² Gen ală ceruƀim pò pơnđar, gơs ală kong rơndeh ơm di gah bol khai, mơ bơta gơklŏ Yàng Tom Trồ Israel dê ơm hơđang bol khai.

²³ Bơta gơklŏ Yàng Jehôwa dê guh hơđang bơh dơlam ƀòn dờng, mơ ơm dơh wơl hơđang mơnơm đah mattơngai lik gơ dê.

²⁴ Hwềng yò tơngguh añ tòm bơta gơtơnggŏ mơ Hwềng Yàng Tom Trồ cèng añ tus hơ Kalde, tus hơ ală cau kong kup cèng. Gen bơta gơtơnggŏ mơ añ neh gŏ lik bơh di añ.

²⁵ Mơ añ yal wơl ală cau kong kup cèng in kòp bơta mơ Yàng Jehôwa neh sơnio añ in gŏ.