Ejekiel 10 - Sră Goh 2018

Bơta gơklŏ Yàng Tom Trồ lik bơh hìu duh khoai

¹ Añ sền mơ gŏ dơwàng trồ hơđang bồ ală ceruƀim gơs gơlơh kung be dô nơm sơbàn mơ lŭ màng tơlir trồ.

² Gen Yàng Jehôwa đơs mơ cau soh bài che dơmài lah: “Mut tĕ tòm gùl ală dơwàng kong rơndeh hơđơm ceruƀim; tơmbềng tĕ bàr đah tê mê mơ ồs rnga hơng bơh digùl ală ceruƀim, mơ rsìh gơ hơđang làm jơh ƀòn dờng.” Cau hơ̆ mut tòm tŭ añ rmê sền.

³ Tòm tŭ khai mut gen ală ceruƀim ñă ntào di đah hơđơm hìu duh khoai; mơ dô puk mhwal bềng rơng dơlam hìu.

⁴ Gen bơta gơklŏ Yàng Jehôwa dê gơguh bơh hơđang ceruƀim mơ gơ lòt tus di di đap mpồng hìu duh khoai. Hìu duh khoai bềng mhwal, mơ rơng hìu bềng àng gơcrà bơta gơklŏ Yàng Jehôwa dê.

⁵ Ntas ală pơnđar ceruƀim dê geh kơno mpong tus di rơng hìu đah bơdìh, gơlơh kung be sap Yàng Tom Trồ Gơnap Gơnoar Dờng dê tòm tŭ Kơnràñ đơs.

⁶ Tòm tŭ Yàng Jehôwa sồr cau soh bài dơmài lah: “Ai tĕ ồs bơh dơlam ală kong rơndeh, bơh digùl ală ceruƀim,” gen khai mut tòm hơ̆ mơ ñă ntào di gah dô nơm kong rơndeh.

⁷ Gen dô nơm ceruƀim pò tê tus di ồs digùl bol khai, khai ai dô êt ồs hơ̆ mơ ơn tòm tê cau soh bài dơmài; cau do dòp gơ mơ lik lòt.

⁸ Ceruƀim gơs rùp să gơlơh be tê dô nă kòn mơnus dê hơđơm ală pơnđar bol gơ dê.

⁹ Añ tơnggòr sền mơ gŏ gơs poan nơm kong rơndeh di gah ceruƀim, dô nơm kong rơndeh di gah kòp nơm ceruƀim; ală kong rơndeh hơ̆ gơcrà kung be lŭ màng rmit.

¹⁰ Bơh rùp să ală kong rơndeh hơ̆ poan nơm gơs rùp ndròm bal; kòp nơm gơlơh kung be dô nơm kong rơndeh tòm rsò mơ kong rơndeh.

¹¹ Tòm tŭ bol gơ lòt, bol gơ rgơi lòt đah lơi di lơm tòm poan đah di đap mat bol gơ; tòm tŭ bol gơ lòt gen ală kong rơndeh ò càng pơrlac wơl. Ală ceruƀim lòt đah lơi di đap mat bol gơ kung ò càng wơlke tòm tŭ lòt.

¹² Jơh să ală ceruƀim dê la ngkòi, tê, mơ pơnđar bol gơ dê, tiah lơi kung gơs bềng ală mat kung be poan nơm kong rơndeh bol gơ dê.

¹³ Añ kơno ală kong rơndeh hơ̆ geh sơnđan la “Ală kong rơndeh gơpơrlac.”

¹⁴ Kòp ceruƀim gơs poan đah muh mat: muh mat dùl gơs be ceruƀim; muh mat bàr gơs be kòn mơnus; muh mat pe gơs be klìu triă; mơ muh mat poan gơs be klàng bung.

¹⁵ Gen ală ceruƀim guh hơđang. Hơ̆ la ală phan kis mơ añ neh gŏ di gah hiòng Kebar.

¹⁶ Tòm tŭ ală ceruƀim lòt gen ală kong rơndeh di gah gơ kung lòt bal; mơ tòm tŭ ală ceruƀim pò pơnđar nàng guh bơh di ù tiah gen ală kong rơndeh ò tòmgơl tiah.

¹⁷ Tòm tŭ ală ceruƀim ơm dơh wơl, ală kong rơndeh kung ơm dơh wơl; mơ tòm tŭ ală ceruƀim guh hơđang, bol gơ kung guh bal hơđang bơh hwềng ală phan kis ơm tòm bol gơ.

¹⁸ Bơta gơklŏ Yàng Jehôwa dê lik bơh di mpồng hìu duh khoai, mơ ơm hơđang ală ceruƀim.

¹⁹ Ală ceruƀim pò pơnđar bol gơ dê mơ guh bơh ù tiah di đap mat añ, mơ bol gơ lòt gen ală kong rơndeh kung lòt bal sơl. Bol gơ ơm dơh wơl di gùng mut tòm mpồng đah mattơngai lik hìu Yàng Jehôwa dê, mơ bơta gơklŏ Yàng Tom Trồ Israel dê ơm hơđang bol gơ.

²⁰ Hơ̆ la ală phan kis mơ añ neh gŏ hơđơm Yàng Tom Trồ Israel dê, di gah hiòng Kebar, mơ añ đal git bol gơ la ală ceruƀim.

²¹ Kòp ceruƀim gơs poan nơm muh mat mơ poan nơm pơnđar; hơđơm ală dar gơs gơlơh kung be ală tê dô nă kòn mơnus dê.

²² Rùp să bol gơ kung be ală muh mat mơ añ neh gŏ di gah hiòng Kebar, kòp nơm bol gơ lòt song hơđap.