Đơs Crih 8 - Sră Goh 2018

Bơta gơklŏ Yàng Jehôwa dê mơ bơta kas màng kòn mơnus dê

Jơnau Đơs Crih Dabit cih. Ai cau lam bồ đơs chò in ngui. Jat sap đơs chò Gitit

¹ Ơ Yàng Jehôwa la Yàng bol hi dê, Sơnđan Kơnràñ la gơklŏ ryŭ ryơm làm jơh plai ù git nđò! Bơta gơklŏ Kơnàñ dê geh ràng tơlik hơđang ală tap trồ!

² Yàng kơnòm di bơr ală cau kơnòm mơ ală kòn gam pô nàng jòng ro Kơnràñ, Mơ Yàng bơtào gơs gơnoar pràn Kơnràñ dê tài bơh ală cau sò tơm di Kơnràñ, Nàng lơh bol khai mơ cau sal tê in ơm mŏ mŏ.

³ Tŭ añ tơnggòr sền ală tap trồ la broă bơh ràs tê Kơnràñ lơh, Kơnhai mơ ală sơmañ mơ Yàng neh rơndap nền,

⁴ Gen jơi kòn mơnus la ñchi mơ Kơnràñ kah taih? Kòn mơnus la ñchi mơ Kơnràñ wèt sền taih?

⁵ Kơnràñ crơng gơs kòn mơnus gơhuc mơ Yàng Tom Trồ dô êt, Tơndau sơgơn bơtau gơklŏ mơ ryŭ ryơm khai in.

⁶ Yàng ai khai in gơnoar at bồ ală phan tê Yàng neh lơh, Ơn jơh ală phan dòn duh hơđơm jơng khai dê.

⁷ Hơ̆ la jơh ală belàt, jơh ală kơnrồ, Jơl tus di ală phan brê sơl,

⁸ Sềm trồ, mơ ală ka tòm dàlềng, Bal mơ jơh ală jơi phan re tòm dàlềng.

⁹ Ơ Yàng Jehôwa la Yàng bol hi dê. Sơnđan Kơnràñ la gơklŏ ryŭ ryơm làm jơh plai ù ò git nđò!