Đơs Crih 5 - Sră Goh 2018

Dan Yàng sền gàr he bơh di cau iơh bơsak

Jơnau Đơs Crih Dabit cih. Ai cau lam bồ đơs chò in ngui mơ kơñi uh

¹ Ơ Yàng Jehôwa, dan ai tồr iat jơnau añ, Sền sơwì bơta kơlôi sơnơng añ jê.

² Ơ Bơtau at bồ añ mơ la Yàng Tom Trồ añ, dan iat jơnau hòi dan añ jê, Bơh añ hòi dan mơ Kơnràñ.

³ Ơ Yàng Jehôwa, tòm àng drim Kơnràñ kơno jơnau añ; Tòm àng drim añ yal tơlik jơnau añ jê di đap Kơnràñ, mơ drơng kơp.

⁴ Bơh Kơnràñ ò di la Yàng Tom Trồ niam nùs di bơta iơh bơsak; Cau iơh bơsak rơp ò geh ơm bal mơ Kơnràñ.

⁵ Cau pơnhừ să ntào ò jai di đap Kơnràñ; Kơnràñ gơjrañ kơuềng di jơh ală cau lơh bơta tồi glài iơh bơsak.

⁶ Kơnràñ tơnroh ală cau đơs blac; Yàng Jehôwa sền ngkòr ngkàc di cau lơh gơtuh mhàm mơ cau blac pơrlồm.

⁷ Ai añ, kơnòm di bơta kòñ gơboh kơ̆ dơn tơngkah tơngkañ Kơnràñ dê, añ rơp mut tòm hìu Kơnràñ; Añ rơp ai nùs duh rngòt di Kơnràñ mơ duh khoai wèt hơ đah Hìu Duh Khoai Sàng Goh Kơnràñ dê.

⁸ Ơ Yàng Jehôwa, tài bơh cau sò tơm di añ, Dan ai bơta song ring Kơnràñ dê mơ tề lam añ, Mơ bơsong gùng Kơnràñ dê di đap añ.

⁹ Bơh di bơr bol khai ò gơs bơta dòn song; Nùs bol khai bềng bơta tơnroh, Rnồng bol khai la bơtô ƀồc pò tơlik, Lơmpiat bol khai dê bềng lìu jơnau rơmhòc.

¹⁰ Ơ Yàng Tom Trồ, dan lơh glài hơđang bol khai, Lòi bol khai gơdùh tòm jơnau bơyai bol khai dê. Dan ting bơtrơh bol khai tài bơh bơta tìs glài bềng lìu bol khai dê, Bơh bol khai neh tòmdră mơ Kơnràñ.

¹¹ Mơya lòi jơh ală cau lơi in kìng crŭ să he tòm Kơnràñ gen geh hòn chò, Lòi bol khai đơs chò hòn chò sùm; Dan Yàng sền gàr bol khai, Nàng cau lơi kòñ gơboh di sơnđan Kơnràñ dê, rơp hòn chò tòm Kơnràñ.

¹² Ơ Yàng Jehôwa, Kơnràñ ai lơngai cau song ring in; Kơnràñ ai bơta nđàc jơm gòm khai kung be khèl sơl.