Đơs Crih 34 - Sră Goh 2018

Yàng Jehôwa la Bơtau rcang gàr mơ la Bơtau dong tă

Jơnau Đơs Crih Dabit cih tòm tŭ khai lơh be sơnrang di đap Abimelek, kòl Abimelek bơtrơh, gen khai dô

¹ Añ rơp jòng ro Yàng Jehôwa sùm sùm, Bơta jòng ro Kơnràñ rơp ơm sùm di bơr añ.

² Hwềng soàn añ jòng să tòm Yàng Jehôwa; Lòi ală cau pơndêt să kơno mơ chò hòp.

³ Jòng ro duh khoai tĕ Yàng Jehôwa bal mơ añ, Bol he dô nùs bal tĕ yò tơngguh sơnđan Kơnràñ dê.

⁴ Añ neh jòi jat Yàng Jehôwa, Kơnràñ ho wơl añ, Mơ dong tă añ bơh di jơh ală bơta rngòt rngơt.

⁵ Tơnggòr sền tĕ Kơnràñ mơ gơs tĕ muh mat àng gơcrà, Gen muh mat bol mê dê ò gơs tŭ lơi ƀàssìl.

⁶ Cau dồn sa rƀah do hòi dan, gen Yàng Jehôwa dòp jơnau khai dê, Mơ dong khai klàs di jơh ală bơta bòl glar khai dê.

⁷ Cau gơnrơh Yàng Jehôwa dê ơm kơp gùt dar ală cau duh rngòt di Kơnràñ, Mơ dong tă bol khai.

⁸ Lòng tĕ mơ sền Yàng Jehôwa la niam ò git nđò! Lơngai cau lơi in kìng crŭ tòm Kơnràñ!

⁹ Ơ ală cau sàng goh Yàng Jehôwa dê, duh rngòt tĕ di Kơnràñ, Bơh cau lơi duh rngòt di Kơnràñ gen ò siơ̆u phan lơi.

¹⁰ Klìu triă brồ dam gơkòl siơ̆u mơ kong jơgloh, Mơya cau lơi jòi jat Yàng Jehôwa gen rơp ò siơ̆u phan niam lơi.

¹¹ Ơ ală kòn, tus tĕ iat añ, Añ rơp bơto bol mê in bơta duh rngòt di Yàng Jehôwa.

¹² Ñcau la cau kòñ bơta kis, Mơ gơboh oă ngai nàng dòp bơta lơngai taih?

¹³ Kơrmap gàr tĕ lơmpiat he bañ đơs jơnau iơh bơsak, Mơ sơndồi he bañ đơs jơnau blac pơrlồm.

¹⁴ Pleh tĕ di bơta iơh mơ lơh tĕ bơta niam; Jòi jat tĕ bơta ring lơngai mơ ting jat tĕ gơ.

¹⁵ Mat Yàng Jehôwa dê wèt sền cau song ring, Tồr Kơnràñ dê kơno jơnau hòi dan bol khai dê.

¹⁶ Muh mat Yàng Jehôwa dê gơtòmsò mơ cau lơh iơh, Nàng tơnroh bơta kir yau bol khai dê bơh ù.

¹⁷ Tòm tŭ ală cau song ring hòi dan, gen Yàng Jehôwa kơno, Mơ dong tă bol khai bơh di jơh ală bơta bòl glar.

¹⁸ Yàng Jehôwa ơm rềp mơ ală cau gơs nùs jê sồt, Mơ dong klàs ală cau ò gam gơs bơta gơn kơnòm.

¹⁹ Cau song ring gơkòl oă bơta bòl glar kalke, Mơya Yàng Jehôwa dong tă khai bơh di jơh ală bơta hơ̆.

²⁰ Kơnràñ prap gàr jơh ală ntìng khai dê, Ò gơs dô nơm lơi pă.

²¹ Bơta iơh tơnchơt cau iơh bơsak; Ală cau gơjrañ kơuềng di cau song ring rơp gơkòl lơh nền glài.

²² Yàng Jehôwa tơwài bơta kis ală cau duh broă Kơnràñ dê; Mơ cau lơi kìng crŭ să he tòm Kơnràñ gen ò gơkòl lơh nền glài.