Đơs Crih 148 - Sră Goh 2018

Bơto tơngkah ală phan jòng ro Yàng Jehôwa

¹ Jòng ro Yàng Jehôwa! Jòng ro Yàng Jehôwa bơh hơđang ală tap trồ, Jòng ro Kơnràñ tòm ală tiah jơnhoa hơđang!

² Ơ jơh ală cau gơnrơh Kơnràñ dê, jòng ro tĕ Kơnràñ! Ơ jơh ală mpồl ling Kơnràñ dê, jòng ro tĕ Kơnràñ!

³ Ơ mattơngai mơ kơnhai, jòng ro tĕ Kơnràñ! Ơ jơh ală sơmañ àng gơcrà, jòng ro tĕ!

⁴ Ơ ală tap trồ hơđang rlau jơh, ơ dà hơđang ală tap trồ, Jòng ro tĕ Kơnràñ!

⁵ Lòi bol khai jòng ro sơnđan Yàng Jehôwa dê, Bơh Kơnràñ tơlik gơnoar sồr, gen jơh ală bơta geh crơng gơs.

⁶ Kơnràñ bơtào kơ̆ ală phan hơ̆ gam sùm sùm, Kung neh lơh nền nhàr ală phan hơ̆ in, nàng ò rgơi lòt rlau.

⁷ Ơ ală jơi phan tòm dàlềng mơ ală tiah jrô, Jòng ro tĕ Yàng Jehôwa bơh tòm ù!

⁸ Ơ ồs mơ lŭ piar, kơmbuh piar mơ dà tŭ, Càl rbut dờng lơh jat wil tơl gơnoar sồr Kơnràñ dê!

⁹ Ơ ală mơnơm mơ ală dòr, Ală chi gơs plai mơ jơh ală chi pơnàng,

¹⁰ Ơ phan poan jơng tòm brê mơ ală phan poan jơng tòm hìu, Jơi wìn nsròng mơ jơi sềm,

¹¹ Ơ ală cau bơtau dunnia dê mơ jơh ală làng bol, Ală kwang bàng mơ jơh ală cau at bồ tòm plai ù,

¹² Ơ ală cau pơnu mơ cau ơruh, Cau kra mơ cau kơnòm dềt;

¹³ Lòi bol khai jòng ro sơnđan Yàng Jehôwa, Bơh mìng sơnđan Kơnràñ dê geh yò tơngguh hơđang; Bơta gơklŏ Kơnràñ dê jơnhoa rlau mơ plai ù mơ ală tap trồ.

¹⁴ Kơnràñ neh pò tơngguh ngke làng bol Kơnràñ dê. La bơta jòng ro ală cau dòn song Kơnràñ dê, Hơ̆ la làng bol Israel, la cau ơm rềp di Kơnràñ. Jòng ro Yàng Jehôwa!