Đơs Crih 144 - Sră Goh 2018

Hòi dan mơ Yàng dong tă, bơta lơngai lơngò làng bol Yàng dê

Jơnau Đơs Crih Dabit cih

¹ Pal jòng ro Yàng Jehôwa, la pơnai lŭ añ jê! Kơnràñ bơto tê añ tòmlơh, bơto ràs tê añ git lơh kơlìn.

² Kơnràñ la lŭ klềr mơ la tiah kơp gàr añ jê, La theng kơ̆ cê añ jê mơ la Bơtau dong tă añ, la khèl đo añ jê mơ la tiah añ kìng crŭ; Kơnràñ kup ală làng bol dòn duh hơđơm añ.

³ Ơ Yàng Jehôwa, jơi kòn mơnus la ñchi mơ Kơnràñ wèt sền di khai taih? Kòn sau kòn mơnus la ñchi mơ Kơnràñ kơlôi bơh khai taih?

⁴ Kòn mơnus kung be nhơm tă; Rài kòn mơnus kung be mƀur lòt gan.

⁵ Ơ Yàng Jehôwa, dan tơnliah ală tap trồ mơ mù, Tup di ală mơnơm, gen gơ rơp gơlik ñhŭ.

⁶ Dan ai puhlèp nàng lơh nrah nring cau sò tơm di añ, Dan pañ kam Yàng dê nàng lơh bol khai in dô gơprah.

⁷ Dan Yàng pò tơlik tê Kơnràñ bơh đang jơnhoa, Dong klàs añ, tă tơlik añ bơh di dà tih, Mơ tă añ bơh di tê cau làng bol bơdìh.

⁸ Bơr bol khai đơs jơnau blac pơrlồm, Tê ma bol khai dê lơh bơta ma blac.

⁹ Ơ Yàng Tom Trồ, añ rơp đơs chò Yàng in dô bơta đơs chò pa, Pĕ kơñi jơt che nàng jòng ro Yàng.

¹⁰ Yàng ai bơta pha lin rlau ală cau bơtau in, Yàng dong klàs Dabit la cau duh broă Kơnràñ dê.

¹¹ Dan dong añ klàs bơh đào lơh iơh, Mơ dong tă añ bơh di tê ală làng bol bơdìh. Bol khai đơs jơnau blac pơrlồm, Tê ma bol khai dê lơh bơta ma blac.

¹² Dan ală kòn klau gam pơnu bol hi dê gơlik ndròm be chi hòn dờng; Dan ală kòn ùr bol hi dê gơlik ndròm be jrong mum hìu, koh nàng bơt ală hìu dờng gơlang bơtau dê.

¹³ Dan đam jàr bol hi dê geh bềng lìu, tơnggơs tơl ală jơi phan; Dan belàt bol hi dê tơnggơs oă rbô rhiang tơlak tơmàn tòm ală ƀlàng sre bol hi dê.

¹⁴ Dan kơnrồ me bol hi dê tơnggơs gal ngan kòn dềt, Dan dơrñang ƀòn bol hi ò gơs tiah bluh, ò gơs cau lơi kòl kup cèng. Dan bañ gơs jơnau driau dờng jê sồt tòm ală gùng lòt bol hi dê.

¹⁵ Lơngai làng bol lơi in geh bơta bơtoah bơtoài behơ̆! Lơngai làng bol lơi in gơs Jehôwa la Yàng Tom Trồ bol khai dê!