Cau Bơto 1 - Sră Goh 2018

Jơh dunnia roh lơm

¹ Jơnau cau bơto dê, kòn klau Dabit, bơtau ơm tòm Jerusalem.

² Cau bơto đơs: Roh lơm bơta roh lơm dê, roh lơm bơta roh lơm dê, jơh ală la roh lơm.

³ Ñchi kwơ jơi kòn mơnus in, bơh jơh ală broă bòl glar bol khai neh lơh hơđơm mattơngai taih?

⁴ Dô rài neh rlau, gen dô rài ndai tus; mơya ù tiah kư̆ gam sùm sùm.

⁵ Mattơngai lik mơ mattơngai ñơp, gơ sơrbac sơrbang rê wơl hơ tiah gơ neh lik.

⁶ Càl khồm hơ đah đơm, mơ gơ lòt gùt dar hơ đah đang; càl gơpơdar gùt dar ò dơh, mơ gơrê wơl hơ dar yau gơ dê.

⁷ Ală hiòng hòr tus hơ dàlềng, mơya dàlềng ò bềng; tus hơ tiah dà hiòng hòr, gen gơpơnjat hòr tai.

⁸ Jơh ală phan bòl glar, jơi kòn mơnus ò rgơi đơs jơh; mat sền sùm ò git làp, tồr iat sùm ò git dil.

⁹ Bơta lơi neh gơs, hơ̆ la bơta rơp gơs; bơta lơi neh lơh, hơ̆ la bơta rơp lơh tai; ò gơs bơta lơi pa hơđơm mattơngai.

¹⁰ Dilah gơs dô nơm phan lơi mơ cau đơs lah: “Sền tĕ, chi do pa!” Phan hơ̆ neh gơs rau, tòm ală rài lài mơ bol he.

¹¹ Cau ò kah ală rài lài; mơ ală cau rài tơnơ̆ la ală cau òhềt tus, bơh ală cau tus tơnơ̆ mơ bol khai kung rơp ò kah bol khai.

Bơta roh lơm bơta jak chài dê

¹² Añ la cau gơnoar bơto neh lơh gơs bơtau Israel tòm Jerusalem.

¹³ Ơn nùs nàng jòi mơ bàn bơta jak chài jơh ală broă lơh gơs hơđơm trồ do; hơ̆ la dô nơm broă bòl glar mơ Yàng Tom Trồ neh jào kòn mơnus in nàng giga mơ gơ.

¹⁴ Añ neh sền gŏ ală broă lơh hơđơm mattơngai; mơ ne, jơh ală la roh lơm, jat dô ròs càl khồm.

¹⁵ Bơta lơi neh kwe ò rgơi bơsong wơl, mơ phan lơi siơ̆u ò rgơi kòp nàng tơl.

¹⁶ Añ đơs tòm nùs lah: “Do, añ neh geh bơta jak chài dờng rlau mơ jơh ală cau lài mơ añ tòm Jerusalem; ngan nùs añ neh git làm oă bơta jak chài mơ bơta git jak.”

¹⁷ Mơ añ ngui dơngoh nàng git bơta jak chài, mơ git bơta tùl gơla, mơ sơnrang sơnrồng; añ đal git bơta hơ̆ kung la jat dô ròs càl khồm.

¹⁸ Bơh dilah bơta jak chài oă, bơta kơlôi sơnơng moat jrùng kung oă; cau lơi geh bơtơl bơta git jak rơp bơtơl bơta jê sồt.