Broă 25 - Sră Goh 2018

Pol ntào di đap Phestus

¹ Pe ngai tơnơ̆ mơ tŭ geh jào gơnoar broă tòm kơnhwàl hơ̆, gen Phestus bơh Sesare guh hơ Jerusalem.

² Tềng hơ̆ gơs ală cau gơnoar lam bồ ơn phan duh khoai mơ ală cau kwang làng bol Juda yă Pol di đap Phestus;

³ dan ai bol khai in dô bơta nđàc nàng cèng Pol rê wơl hơ Jerusalem, bơh bol khai neh lơh nền kơp nàng tơnchơt Pol rò gùng.

⁴ Phestus ho lah: Pol neh kòl jàm tòm Sesare, ai să tòm añ gen rơp rê gòñ hơ ƀòn hơ̆.

⁵ Khai đơs tai lah: “Behơ̆ ală cau gơs gơnoar tòm bol mê mù tĕ bal mơ añ, dilah cau hơ̆ neh tìs tòm glài lơi gen kư̆ yă tĕ.”

⁶ Phestus ơm digùl bol khai pơgap phàm hala jơt ngai, lồc behơ̆ tus hơ Sesare; ngai tơnơ̆, khai nggui di tiah cahrña mơ sồr cau cèng Pol tus hơ khai.

⁷ Tòm tŭ Pol neh tus gen ală cau Juda neh mù bơh Jerusalem gơrwàng gùt dar khai, ai oă jơnau kơnjơ̆ yă nàng kơt glài khai, mơya bol khai jòi ò gơs cơng tàng lơi.

⁸ Pol đơs nàng tò să khai lah: “Añ ò lơh bơta lơi tòmdră mơ bơta boh lam cau Juda dê hala tòmdră mơ hìu duh khoai hala tòmdră mơ Sesa ò.”

⁹ Mơya Phestus kòñ lơh niam nùs cau Juda, gen lùp Pol lah: “Mê kòñ guh hơ Jerusalem nàng kong cahrña di đap jơh ală jơnau cau yă do sơl?”

¹⁰ Pol đơs lah: “Añ ntào di tiah cahrña Sesa dê la tiah añ pal kong cahrña; bơh añ ò lơh tìs bơta lơi mơ cau Juda, kung be să tòm ồng neh git loh làng.

¹¹ Dilah ngan añ lơh tìs hala gơs glài lơi pal chơt, gen añ ò dan klàs chơt; mơya dilah bol khai ò gơs cơng tàng lơi nàng kơt glài añ, gen ò gơs cau lơi rgơi bơtào añ bol khai in ò. Añ dan tò să di đap Sesa.”

¹² Tơnơ̆ mơ tŭ neh bơyai mơ ală cau kwang cahrña rau, gen Phestus ho lah: “Mê neh dan tò să di đap Sesa, gen mê rơp lòt tus hơ Sesa.”

Pol ntào di đap bơtau Agrippa

¹³ Dô êt ngai tơnơ̆, bơtau Agrippa mơ Berenis tus tòm Sesare nàng còp să Phestus.

¹⁴ Bol khai ơm tềng hơ̆ jŏ ngai, Phestus ai jơnau Pol mơ yal cau bơtau in lah: “Do gơs dô nă cau ơm jàm mơ Phelik neh lòi wơl.

¹⁵ Tòm tŭ añ tus hơ Jerusalem, gơs ală cau gơnoar lam bồ ơn phan duh khoai mơ cau kwang kra làng bol Juda dê yă khai, mơ dan añ lơh nền glài khai.

¹⁶ Añ ho lah cau Rôma ò gơs bơta òs mòng jào dô nă cau neh kòl yă mơ òhềt tòm mat mơ cau tòmyă, mơ cau hơ̆ òhềt gơs tŭ nàng tò să bơh jơnau cau yă khai.

¹⁷ Behơ̆ tòm tŭ bol khai neh lòt tus hơ do, nàng ò lơh roh tŭ tơngai, mơya ngai tơnơ̆, añ nggui di tiah cahrña, mơ sồr cèng cau hơ̆ tus.

¹⁸ Mơya tòm tŭ ală cau tòmyă ñă ntào, gen ò gơs yă khai bơh bơta lơi iơh be añ neh kơlôi,

¹⁹ mìng bơh ală bơta tòm pơndang bơh gùng duh khoai is bol khai dê mơ bơh dô nă cau sơnđan la Jesu neh chơt rau, mơya Pol đơs nền lah gam kis.

²⁰ Bơh añ ò git mbe kòñ cahrña jơnau hơ̆, gen añ lùp Pol kòñ guh hơ Jerusalem nàng kong cahrña jơnau do tềng hơ̆.

²¹ Mơya Pol neh dan cèng tus hơ cau bơtau nàng cahrña. Behơ̆ añ sồr cau jàm khai lòi gơn tus di tŭ añ bơtào khai Sesa in.”

²² Agrippa đơs mơ Phestus lah: “Să tòm añ kung kòñ iat jơnau cau hơ̆.” Phestus ho lah: “Ngai hìng bơtau rơp kơno.”

²³ Behơ̆, ngai tơnơ̆, bơtau Agrippa mơ Berenis lòt tus dô bă ryŭ ryơm ngan, mut tòm hìu cahrña bal mơ ală cau kwang at bồ mpồl ling mơ ală cau kwang tòm ƀòn dờng. Gen Phestus sồr cau cèng Pol tus.

²⁴ Phestus đơs lah: “Ơ bơtau Agrippa mơ jơh ală ồng gơs mat tềng do bal mơ bol hi, ală ồng gŏ cau do, la cau mơ jơh làng bol Juda tòm Jerusalem mơ tềng do sơl neh rac dan mơ añ, mơ hòi driau lah bañ lòi khai in kis tai.

²⁵ Mơya añ neh sơwì nền mơ gŏ khai ò gơs glài lơi pal chơt ò, mơ bơh să tòm khai neh dan cèng tus hơ Sesa, gen tàng añ neh lơh nền nàng bơtào khai Sesa in.

²⁶ Mơya añ ò gơs bơta lơi nền cê bơh khai nàng yal bơtau in, gen tàng añ hòi khai lòt tus di đap ală ồng, lài ngan la di đap bơtau Agrippa, nàng dơ̆ neh sơwì rau, gen añ gơs bơta nàng cih bơtau in.

²⁷ Tài bơh añ kơlôi lah bơtào dô nă cau ơm jàm mơ ò yal loh bơta tìs glài khai dê, gen tìs ngan.”