Broă 21 - Sră Goh 2018

Pol tòm Tirơ

¹ Bol hi neh tơngac bol khai rau gen mut tòm ơhò, lòt song tus hơ Kôs, ngai tơnơ̆ tus hơ Rôdes, mơ bơh hơ̆ tus hơ Patara.

² Tềng hơ̆, bol hi bàn dô nơm ơhò tiă lòt hơ Phenesia, gen bol hi hào ơhò hơ̆ mơ lòt.

³ Tòm tŭ bol hi gŏ bồt pơlào Ciprus gen lòt đah hơđơm gơ, mơ kư̆ lòt song hơ Siri, ơm dơh tòm Tirơ, tài bơh tềng hơ̆ pal tă tơlik ală phan mơna bơh ơhò.

⁴ Tềng hơ̆, bol hi bàn ală cau dòn rau, gen ơm mơ bol khai poh ngai. Ală cau dòn geh Yàng Hwềng lơh rngoh rngac gen đơs mơ Pol bañ guh hơ Jerusalem.

⁵ Mơya ală ngai ơm bal mơ bol khai neh rlau, bol hi pơnjat lòt gùng tai. Jơh ală bol khai bal mơ ală kòn bau bol khai dê jun bol hi hơ bơdìh ƀòn dờng. Jơh tơl nă cùn gơltang di gah dà mơ hòi dan.

⁶ Tơnơ̆ mơ tŭ tòm tơngac bal, gen bol hi mut tòm ơhò, ai ală bol khai rê wơl tòm hìu.

Pol tòm Pơtôlemai mơ Sesare

⁷ Bơh Tirơ, bol hi lòt lồi gùng ơhò, gen tus hơ Pơtôlemai, còp să ală oh mi tềng hơ̆ mơ ơm mơ bol khai dô ngai.

⁸ Ngai tơnơ̆, bol hi bơh tềng hơ̆ lòt tai, tus hơ Sesare, mut tòm hìu Philip la cau bơto yal Jơnau Niam, la dô nă tòm poh nă cau dong gàr hìu jum Jerusalem, mơ ơm mơ khai.

⁹ Khai gơs poan nă kòn ơruh gơs bơta nđàc đơs hwơr.

¹⁰ Tòm tŭ bol hi ơm tềng hơ̆ dô êt ngai, gơs dô nă cau gơnoar hwơr sơnđan la Agabus, tus bơh Jude.

¹¹ Khai tus còp bol hi, gen ai che but Pol dê, cap jơng tê tòm khai dê mơ đơs lah: “Do la jơnau Yàng Hwềng Goh đơs: ‘Tòm Jerusalem cau Juda rơp cap cau gơs che but do behơ̆, mơ bơtào khai tòm tê cau làng bol Bơdìh.’”

¹² Tòm tŭ neh kơno jơnau hơ̆, gen bol hi mơ ală cau tềng hơ̆ dan Pol bañ guh hơ Jerusalem.

¹³ Mơya khai ho lah: “Ñchi oh mi lơh ñìm mơ lơh jê nùs añ behơ̆ taih? Bơh añ gơs nùs rcang sir ò di mìng kong cap lơm mơya kung gơs nùs rcang sir kong chơt tòm Jerusalem tài bơh sơnđan Yàng Jesu.”

¹⁴ Tòm tŭ gŏ khai ò bài iat jơnau bơto pơndòm hơ̆, gen bol hi ơm mơ đơs lah: “Dan nùs kòñ Yàng gơs di!”

Pol tòm Jerusalem

¹⁵ Tơnơ̆ mơ ală ngai hơ̆ bol hi dap phan mơna, guh hơ Jerusalem.

¹⁶ Gơs bàr pe nă cau bơtê bơh Sesare kung lòt bal mơ bol hi sơl, mơ lam bol hi mut ơm tòm hìu dô nă cau sơnđan la Manasôn cau ƀòn Ciprus, la dô nă cau neh dòn Yàng lài ngan.

¹⁷ Tòm tŭ bol hi tus hơ Jerusalem, gen ală cau dòn wă rò bol hi chò hòp ngan.

¹⁸ Ngai tơnơ̆, Pol lòt bal mơ bol hi tus còp Jakơ, jơh ală cau kwang kra gơs mat bal tềng hơ̆.

¹⁹ Pol còp să ală cau hơ̆ rau, gen yal wơl kòp bơta Yàng Tom Trồ neh kơnòm di gơnoar broă khai dê mơ lơh gơs digùl cau làng bol bơdìh.

²⁰ Tòm tŭ kơno rau, gen bol khai jòng ro Yàng Tom Trồ, mơ đơs mơ Pol lah: “Ơ bi, bi rgơi gŏ ò git nđò rbô nă cau Juda neh dòn jat, mơ jơh tơl nă bol khai ngac ngar ngan bơh bơta boh lam.

²¹ Bol khai neh kơno pơnro lah bi bơto jơh ală cau Juda ơm digùl làng bol bơdìh pal sang bơta boh lam Môise, bañ siat gơltau kòn sau he in, kung bañ jat bơta òs mòng he dê sơl.

²² Behơ̆, pal lơh mbe lơi taih? Bơh ngan bol khai git lah bi neh tus rau.

²³ Behơ̆ do la bơta bol hi kòñ bi lơh: Bol hi gơs poan nă cau neh gơkòl jơnau ho pơgon;

²⁴ cèng tĕ poan nă cau hơ̆ lòt, lơh bơta sàng goh bal mơ bol khai, mơ kong ai jền bol khai in koah sŏ. Behơ̆ gen, tơl nă cau rơp git lah ală bơta bol khai neh kơno pơnro bơh bi la ò ngan, mơya git lah să tòm bi kung prap gàr bơta boh lam sơl.

²⁵ Mơya gơwèt mơ làng bol bơdìh neh gơlik gơs cau dòn, gen bol hi neh cih sră pơyoa lơh nền la bañ sa phan ơn duh khoai rùp ràk, mhàm, phan chơt rhwat mơ kơrmap gàr să he, mơ bañ tìs glài rềs àr bơrnàn.”

²⁶ Pol cèng poan nă cau hơ̆ lòt bal, ngai tơnơ̆, lơh bơta sàng goh bal mơ bol khai rau, gen mut tòm hìu duh khoai nàng yal bol khai in git tŭ tơngai lơi bơta lơh sàng goh rơp geh wil tơl, mơ phan ơn duh khoai bơh kòp nă bol khai pal ơn.

Pol kòl cau kup tòm hìu duh khoai

²⁷ Tòm tŭ poh ngai hơ̆ mòr tơl, ală cau Juda tus bơh kơnhwàl Asia gŏ Pol tòm hìu duh khoai, gen chồl bơchồt jơh mpồl làng bol lơh nggồr nggàc, ai tê sơmbat kup khai,

²⁸ mơ hòi driau lah: “Ơ cau Israel, dong kòl tĕ! Do la cau neh bơto sồr làm jơh ƀòn lơgar nàng tòmdră mơ làng bol, tòmsò mơ bơta boh lam Môise, mơ hìu duh khoai do sơl; tian gơs khai kung lam cau Grek mut tòm hìu duh khoai, mơ lơh ngkòr ngkàc tiah sàng goh do.”

²⁹ Bol khai đơs behơ̆, tài bơh lài bol khai neh gŏ Trôphim cau Ephesô ơm bal mơ Pol tòm ƀòn dờng, behơ̆ tồnlah Pol neh lam khai mut tòm hìu duh khoai.

³⁰ Jơh làm ƀòn dờng gơlik gơs sơlồng sơlàng, làng bol ntoat ràn tus, kup Pol hwài tơlik bơh hìu duh khoai, gen ală mpồng hìu duh khoai til jơh mo.

³¹ Bol hơ̆ ơm jòi bơta nàng tơnchơt khai, gen gơs jơnau yal tus hơ cau kwang at bồ mpồl ling Rôma lah làm jơh Jerusalem gơs bơta sơlồng sơlàng.

³² Tŭ hơ̆ mo, khai lam ală cau ling mơ bàr pe nă cau at bồ ling ntoat tus di mpồl làng bol hơ̆. Bol khai gŏ cau kwang at bồ mpồl ling mơ ală cau ling, gen bol khai lòi ò pù lơh Pol tai.

³³ Cau kwang at bồ mpồl ling lòt tus rềp kup khai, lồc behơ̆ sồr ai bàr dang che sreng cap khai, gen lùp: “Khai la ñcau, mơ ñchi broă neh lơh?”

³⁴ Tòm mpồl làng bol, cau do hòi driau be do, cau ne hòi driau be ne; tài bơh jơnau nggồr nggàc hơ̆, khai ò rgơi git nền, gen tàng sồr tề cèng Pol hơ đồn ling.

³⁵ Tòm tŭ bol khai guh kơnă ntùng, gen cau ling pal tùng Pol tài bơh mpồl làng bol lơh jàñ bơsak ngan.

³⁶ Mpồl làng bol jat bơh tơnơ̆ mơ hòi driau lah: “Tơnchơt tĕ khai!”

Pol tò să khai

³⁷ Tòm tŭ Pol mòr mut tòm đồn, gen đơs mơ cau kwang at bồ mpồl ling lah: “Añ geh gơnoar đơs mơ ồng bàr pe jơnau sơl?” Cau kwang ling ho lah: “Mê git đơs jơnau Grek sơl?

³⁸ Behơ̆ gen mê ò di la cau Ejiptơ ne, tòm ngai lài òr neh lơh sơlồng sơlàng, lam poan rbô nă cau tơnchơt cau lòt tus tòm ƀlàng ngềt ngơt ò ơ?”

³⁹ Pol ho lah: “Añ la cau Juda, deh tòm Tarsơ gơrê bal mơ Silisi, cau làng tòm, tòm dô nơm ƀòn dờng dờng màng dê. Dan ai gơnoar añ in đơs mơ làng bol.”

⁴⁰ Neh geh gơnoar đơs rau, gen Pol ntào hơđang kơnă ntùng, pò tê lơh tềl làng bol in. Tòm tŭ jơh tơl nă ơm mŏ mŏ, gen khai đơs tòm jơnau Hebrơ lah: