Broă 15 - Sră Goh 2018

Bơta pơjum dờng tòm Jerusalem

¹ Gơs ală cau tus bơh Jude, bơto ală cau dòn lah: “Dilah oh mi ò bài kong siat gơltau jat bơta boh lam Môise dê, gen ò rgơi geh dong klàs.”

² Tŭ hơ̆, gơs bơta ò dô nùs bal mơ bơta tòm pơndang oă ngan gơlik gơs digùl Pol mơ Banaba bal mơ ală cau hơ̆. Gen tàng Pol mơ Banaba bal mơ dô êt cau tòm mpồl bol hơ̆ geh sac rwah guh hơ Jerusalem, lòt tus hơ ală cau gơnoar bơto dờng mơ ală cau kwang kra nàng lùp bơh broă do.

³ Behơ̆, tơnơ̆ mơ tŭ geh Hìu Jum Goh jun lòt gùng, bol khai lòt gan Phenesi mơ Samari, yal wơl bơta ală cau làng bol bơdìh rê wơl hơ Yàng Tom Trồ, lơh jơh ală cau dòn in geh hòn chò oă ngan.

⁴ Tòm tŭ tus hơ Jerusalem, bol khai geh Hìu Jum Goh, ală cau gơnoar bơto dờng mơ ală cau kwang kra wă rò, lồc behơ̆ bol khai yal wơl jơh ală bơta Yàng Tom Trồ neh lơh kơnòm di bol khai.

⁵ Mơya gơs ală cau dòn tòm bơnòr cau Pharisi, ntào đơs lah: “Pal siat gơltau ală cau làng bol bơdìh in, mơ sồr bol khai pal prap gàr bơta boh lam Môise dê.”

⁶ Ală cau gơnoar bơto dờng mơ ală cau kwang kra pơjum bal nàng sền sơwì bơh broă do.

⁷ Tơnơ̆ mơ tŭ bơyai nền cê, Pier ntào đơs mơ bol hơ̆ lah: “Ơ oh mi, oh mi git lah bơh ală ngai sơnròp Yàng Tom Trồ neh sac añ bơh digùl ală oh mi, nàng bơto Jơnau Niam làng bol bơdìh in, bơh hơ̆ bol khai rgơi kơno mơ dòn.

⁸ Yàng Tom Trồ la Bơtau git nùs tơl nă cau, neh lơh cơng Kơnràñ dòp rò bol khai tòm tŭ ai Yàng Hwềng Goh bol khai in kung be ai bol he in sơl.

⁹ Kơnràñ ò di cah is bol he mơ cau làng bol bơdìh ò, mơya Kơnràñ toh glài bol khai in bơh bơta dòn.

¹⁰ Behơ̆ tŭ do, ñchi bơh tài oh mi khin lòng Yàng Tom Trồ, tơntui ală cau dòn in yô mơ ồng pàng bol he hala să tòm bol he kung ò jai tui?

¹¹ Ò, bol he dòn lah kơnòm di bơta nđàc Yàng Jesu dê mơ bol he geh dong klàs kung be bol khai sơl.”

¹² Jơh mpồl jơnum dờng ơm mŏ mŏ iat jơnau Banaba mơ Pol yal wơl ală bơta krơi tềl is mơ Yàng Tom Trồ neh ngui bàr nă ồng lơh gơs digùl làng bol bơdìh.

¹³ Tòm tŭ bol khai đơs sir rau, gen Jakơ đơs lah: “Ơ oh mi, dan iat tĕ añ!

¹⁴ Simôn neh yal wơl mbe lơi dơ̆ sơnròp Yàng Tom Trồ neh wèt sền làng bol bơdìh, nàng bơh bol khai gơlik gơs dô làng bol gơrê bal mơ Kơnràñ.

¹⁵ Bơta hơ̆ tòm toh ngan be jơnau cau gơnoar hwơr neh cih lah:

¹⁶ Yàng đơs lah: ‘Tơnơ̆ mơ ală broă hơ̆ Añ rơp rê wơl, mơ bơtào wơl lơgar bơtau Dabit dê. Añ rơp lơh wơl ală tiah neh tơrlơm lề, mơ bơtào gơs wơl.

¹⁷ Tồ ală cau gam wơl in, Bal mơ jơh làng bol Bơdìh geh hòi mơ sơnđan Añ, rơp jòi jat Añ. Yàng, la Bơtau neh yal loh broă do bơh rài yau đơs behơ̆.

¹⁸ Hơ̆ la ală broă neh git bơh tŭ jŏ jòng bơh rài yau.’

¹⁹ Behơ̆, añ sơwì gŏ ò di lơh dơrcul di ală cau làng bol bơdìh rê wơl hơ Yàng Tom Trồ,

²⁰ mơya bol he cih tĕ sră pơyoa nting bol khai kơrmap gàr să he klàs bơh phan sa ngkòr ngkàc neh ơn rùp ràk in, mơ glài rềs àr bơrnàn, kung bañ sa phan chơt rhwat, mơ mhàm.

²¹ Bơh rài yau bơta boh lam Môise dê neh geh sền tòm ală hìu jum cau Juda dê, kòp ngai Saƀat mơ jơnau Kơnràñ dê geh bơto yal tòm kòp nơm ƀòn dờng.”

²² Tŭ hơ̆, ală cau gơnoar bơto dờng mơ ală cau kwang kra bal mơ jơh Hìu Jum Goh lơh nền sac ală cau bơh digùl bol khai mơ sồr lòt bal mơ Pol mơ Banaba tus hơ Antiôt; Bol khai sồr Jude kung sơnđan la Barsaba, mơ Sila, la bàr nă cau geh cau dòn sền dờng màng ryŭ rlau.

²³ Bal mơ sră pơyoa be tơnơ̆ do: “Bol hi, la cau gơnoar bơto dờng mơ ală cau kwang kra, mơ oh mi, oh mi dê pơyoa jơnau còp să ală oh mi cau làng bol bơdìh tòm Antiôt, Siri mơ Silisi.

²⁴ Bơh bol hi neh kơno lah gơs cau ƀà tòm bol hi bulah ò dòp gơnoar lơi bơh bol hi neh đơs ală bơta lơh sơlồng sơlàng mơ lơh dơrcul nùs oh mi.

²⁵ Gen tàng, bol hi dô nùs bal sac mơ sồr ală cau do lòt bal mơ bàr nă cau bol hi kòñ gơboh ngan la Banaba mơ Pol nàng tus hơ oh mi;

²⁶ Bàr nă cau hơ̆ neh phi să bol khai bơh sơnđan Yàng bol he dê la Yàng Jesu Krist.

²⁷ Behơ̆ bol hi neh sồr Jude mơ Sila lòt tus nàng tìp mơ đơs mơ oh mi ală bơta bol hi cih tòm sră pơyoa.

²⁸ Bơh Yàng Hwềng Goh mơ bol hi neh dô nùs bal ò di tơnàñ kơnjơ̆ tai oh mi in rlau mơ ală bơta pal càng do:

²⁹ Pal wèr phan duh khoai rùp ràk, mhàm, phan chơt rhwat, mơ bañ tìs glài rềs àr bơrnàn. Dilah oh mi kơrmap gàr să he ò lơh bơta hơ̆ la niam. Ơm ngac yơ.”

³⁰ Behơ̆, ală cau hơ̆ tơngac Hìu Jum Goh mù hơ Antiôt, la tiah bol khai pơjum tơrgòm jơh ală cau dòn mơ tong sră pơyoa hơ̆.

³¹ Tơnơ̆ mơ tŭ sền sră pơyoa rau, bol khai hòn chò bơh jơnau bơto pơndòm hơ̆.

³² Jude mơ Sila kung la ală cau gơnoar hwơr, ngui oă jơnau bơto pơndòm mơ lơh bol khai in sơlo pràn kơldang.

³³ Tơnơ̆ mơ tŭ ơm tềng hơ̆ dô êt jŏ, bol khai geh ală oh mi jun dô bă lơngap lơngai tồ rê wơl hơ ală cau neh sồr bol khai lòt. [

³⁴ Mơya Sila lơh nền ơm wơl tềng hơ̆.]

Pol mơ Banaba tòmcah is

³⁵ Pol mơ Banaba kư̆ ơm tòm Antiôt, dô bă bal mơ oă cau ndai, bơto sồr mơ bơto yal jơnau Yàng.

³⁶ Dô êt jŏ tơnơ̆, Pol đơs mơ Banaba lah: “Bol he rê wơl lă nàng còp jơh ală oh mi tòm ală ƀòn dờng mơ bol he neh bơto yal jơnau Yàng dê nàng sền mbe gơlơh bol khai.”

³⁷ Banaba kòñ cèng Jang Mak lòt bal mơ bol khai.

³⁸ Mơya Pol kơlôi lah ò di cèng Mak lòt bal, tài bơh Mak neh sang lòi bàr nă bol khai tòm Pamphili, ò lơh broă tai bal mơ bol khai.

³⁹ Bơh bơta hơ̆, gơs bơta tòm pơndang bal kràñ cê ngan, tian gơs bàr nă bol khai tòmcah is; Banaba cèng Mak hào bal ơhò lòt tus hơ Ciprus.

⁴⁰ Ai Pol gen lòt, tơnơ̆ mơ tŭ neh sac Sila, mơ kơnòm ală oh mi jào bol khai tòm bơta nđàc Yàng dê.

⁴¹ Pol lòt làm jơh Siri mơ Silisi, lơh ală Hìu Jum Goh in geh kơ̆ nền mơ pràn kơldang.