Apdia 1 - Sră Goh 2018

Edôm pơnhừ să rơp kong tơmù

¹ Do la bơta gơtơnggŏ Apdia dê. Jehôwa Yàng Tom Trồ đơs bơh Edôm be do: “Bol he neh kơno jơnau yal bơh Yàng Jehôwa, mơ gơs dô nă cau kong sồr geh sồr lòt tus digùl ală làng bol mơ đơs lah: ‘Guh tĕ, mơ bol he lòt tĕ tòmdră mơ gơtòm bơta tòmlơh.’

² Ngan, Añ rơp lơh mê in gơlik gơs dềt rhền digùl ală làng bol; mê rơp kong sền òsơp tơn.

³ Nùs pơnhừ să mê dê neh pơrlồm mê; mê la cau ơm tòm ală tiah cìr pơnai lŭ dê, la ală cau ơm hơđang ală tiah jơnhoa, mê đơs òm tòm nùs mê dê lah: ‘Ñcau rơp cèng añ mù tus di ù taih?’

⁴ Bulah mê par jơnhoa hơđang kung be klàng bung, bulah mê lơh rsòn mê dê digùl ală sơmañ, Añ kung rơp cèng tơmù mê bơh tềng hơ̆,” Yàng Jehôwa đơs behơ̆.

Bơta iơh bơsak Edôm dê rơp tơm wơl

⁵ Dilah cau ntung kơñau neh tus hơ mê tòm trồ mang, bol khai mìng tòmpìt ală phan bol khai kòñ. Dilah ală cau pic plai ño tus, bol khai kung lòi wơl dô êt. Mơya tŭ cau sò tơm mê dê tus bol mê rơp kong tơnroh jơh.

⁶ Esau neh kong phà kơñau ò git nđò, ală phan màng pồn ndơp khai dê neh gơkòl jòi sơwì jơh!

⁷ Jơh ală cau dô bă bal mơ mê pơrlồm mê, bol khai bơtrơh mê tus di nhàr lơgar; ală cau dô bă bal mơ mê tòmdră mơ pha rlau mơ mê; ală cau sa piang lă mê dê rơp pơt dô nơm dă nàng kup mê; bulah behơ̆ khai ò git wă ñchi bơh tài ală bơta hơ̆ gơlik gơs.

⁸ Yàng Jehôwa đơs lah: “Tòm ngai hơ̆, Añ rơp tơnroh ală cau jak chài Edôm dê, mơ ală cau gơs bơta git wă tòm ală mơnơm Esau dê.

⁹ Ơ Theman, ală cau ling jak mê dê rơp gơdô nùs, mơ jơh ală cau tòm mơnơm Esau dê rơp kong tơnchơt.

Edôm bơtrơh oh mi khai dê

¹⁰ Bơh bơta tơnchơt mơ bơta jàñ bơsak mê neh lơh di oh mi mê la Jakôp, bơta ƀàssìl rơp jơm ndơp mê, mơ mê rơp kong tơnroh jơl sùm sùm!

¹¹ Tòm ngai mê ntào is dô đah, tòm ngai ală cau crih mat tă cèng phan mơna khai dê, mơ làng bol bơdìh mut tòm ală mpồng ƀòn khai dê, mơ tă khà bơh Jerusalem, gen mê kung rơp be dô nă tòm bol khai.

¹² Di pal ngan mê ò di chò hòp di oh mi mê dê, tòm ngai rung rài khai dê; kung ò di chò hòp bơh làng bol Juda tòm ngai tơnroh bol khai dê, kung ò di jòng să oă ir tòm ngai bòl glar bol khai dê.

¹³ Mê ò di mut di mpồng ƀòn làng bol Añ jê tòm ngai rung rài bol khai dê, mê kung ò di lơh dô bă bal hòn chò di Juda tòm bơta rung rài khai dê, mê kung ò di phà tòmpìt phan mơna khai dê tòm ngai rung rài bol khai dê.

¹⁴ Mê ò di ntào di sơnah gùng nàng tơnroh ală cau dô klàs khai dê, mê kung ò di jào phi ală cau gam kis khai dê tòm ngai sơbơng roh bol khai dê.

¹⁵ Bơh ngai Yàng Jehôwa dê neh rềp la ngai tòmdră mơ jơh ală làng bol. Ñchi mê neh lơh gen rơp lơh wơl mê in; ală broă lơh mê dê rơp tuh wơl hơđang bồ tòm mê dê.

¹⁶ Bơh bol mê neh ñô mơngàn bơta lơh glài hơđang mơnơm sàng goh Añ jê. Mơ jơh ală làng bol gùt dar bol mê kung rơp ñô ò dơh; bol khai rơp ñô mơ loan rau, gen bol khai rơp kong tơnroh be òhềt gơs bol khai.

Bơta pha lin lồi dut Israel dê

¹⁷ Mơya hơđang mơnơm Siôn rơp gơs ală cau geh klàs, mơ gơ rơp la sàng goh; mơ hìu Jakôp dê rơp dòp geh sre brê bơh ală cau neh tă ai gơ.

¹⁸ Hìu Jakôp rơp la ồs, mơ hìu Jôsep rơp la lơmpiat ồs; hìu Esau rơp la rhe, mơ bol khai rơp chu pơrguc gơ. Rơp ò gam cau lơi kis tòm hìu Esau dê.” Yàng Jehôwa neh đơs behơ̆.

¹⁹ Làng bol bơh Negep rơp dòp geh ală mơnơm Esau dê, ală cau Sepelah ơm tòm ù tiah cau Philistin dê. Bol khai rơp dòp geh ală ù tiah Epraim mơ Samari dê, ală cau Benjamin rơp dòp geh Galaat.

²⁰ Ală cau Israel kong kup cèng gơs dĭ ơm tòm Halah rơp dòp geh ù tiah jơl tus di Jarepta; ală cau neh kong kup cèng Jerusalem dê ơm tòm Jarephat, rơp dòp geh ală ƀòn dờng tòm Negep.

²¹ Ală cau neh geh dong tă rơp guh hơđang mơnơm Siôn nàng at bồ mơnơm Esau dê. Mơ lơgar bơtau rơp gơrê bal mơ Yàng Jehôwa.