Amôs 9 - Sră Goh 2018

Israel rơp gơkòl tơnroh

¹ Añ gŏ Yàng Jehôwa ntào rềp di gah cơnòng duh khoai, mơ Kơnràñ đơs lah: “Pòng tĕ ală bồ jrong jơl tus ală ròc bơr mpồng gơlơnggơr; pòng bơcah tĕ bol gơ hơđang bồ jơh ală làng bol, ală cau gam wơl gen Añ rơp tơnchơt mơ đào. Ò gơs dô nă cau lơi rơp geh dô, ò gơs dô nă cau lơi rơp geh klàs.

² Bulah bol khai tò jrô tòm tiah bơtô ƀồc, tềng hơ̆ tê Añ rơp tă tơlik bol khai; bulah bol khai hào guh tus hơđang trồ, Añ rơp cèng tơmù bol khai bơh tềng hơ̆.

³ Bulah bol khai pồn să bol khai dê hơđang bồ mơnơm Karmel, tềng hơ̆ Añ rơp jòi bàn mơ kup bol khai, mơ bulah bol khai pồn bơh di đap mat añ tòm kơnàng dàlềng, tềng hơ̆ Añ rơp sồr bơs dờng tòm dàlềng mơ gơ rơp kap bol khai.

⁴ Bulah bol khai gơkòl cau sò tơm kup cèng krơ̆ jàm, tềng hơ̆ Añ rơp sồr đào, mơ gơ rơp tơnchơt bol khai. Añ rơp ơn mat Añ sền hơđang bol khai nàng lơh tơnroh, ò di la bơta niam.”

⁵ Bơh Jehôwa Yàng Tom Trồ Gơnap Gơnoar Dờng Làm Jơh, la Bơtau ƀư di plai ù gen gơlề lac, mơ jơh ală làng bol kis hơđang hơ̆ ñìm rac; jơh plai ù gơguh kung be hiòng Nil, mơ gơkram wơl kung be hiòng Ejiptơ dê.

⁶ Kơnràñ la Bơtau neh bơt bơtào tiah ơm Kơnràñ dê hơđang ală tap trồ, mơ neh bơt dơwàng wil Kơnràñ dê hơđang plai ù, la Bơtau neh hòi ală dà tòm dàlềng, mơ tuh gơ hơđang ù; Sơnđan Kơnràñ la Yàng Jehôwa.

⁷ Yàng Jehôwa neh đơs: “Ơ kòn sau Israel, gơwèt mơ Añ gen bol mê kung ò di be kòn sau Kus ò ơ? Ò di Añ neh cèng Israel lik bơh Ejiptơ, cau Philistin bơh Kaptôr, mơ cau Aramean bơh Kir ò ơ?

⁸ Mat Yàng Jehôwa dê ơn hơđang lơgar bềng tồi glài do. Añ rơp tơnroh gơ bơh di plai ù; mơya Añ rơp ò tơnroh jơh hir hìu Jakôp dê,” Yàng Jehôwa đơs behơ̆.

⁹ “Bơh Añ rơp ai jơnau sồr, mơ Añ rơp nggum hìu Israel digùl jơh ală làng bol, mơya ò gơs dô gơnar lơi rơp rung di ù.

¹⁰ Jơh ală cau tồi glài tòm làng bol Añ jê rơp chơt bơh đào, hơ̆ la jơh ală cau đơs lah: ‘Rung rài rơp ò dùh hơđang bol he, hala tus rềp di bol he.’”

Israel geh bơt bơtào wơl

¹¹ “Tòm ngai hơ̆, Añ rơp bơtào wơl sàl Dabit neh gơtơrlơm, Añ rơp rcang wơl ală tiah neh tơrlah gơ dê, bơt wơl bơta tơnroh lề lac gơ dê, mơ bơtào wơl kung be gơ neh gơs lài òr;

¹² Tian gơs bol khai rơp dòp geh làng bol gam wơl Edôm dê mơ jơh ală lơgar geh tơmoh bơh sơnđan Añ,” Yàng Jehôwa la Bơtau rơp lơh ală bơta do đơs behơ̆.

¹³ Yàng Jehôwa đơs lah: “Ală ngai rơp tus, tòm tŭ cau lơòr rơp jat bàn cau toès, cau pơrjă plai ño jat bàn cau tam ño. Tơrnòm pa rơp ñhat bơh di ală mơnơm, mơ hòr lik bơh di ală dòr.

¹⁴ Añ rơp cèng brê wơl làng bol Israel Añ jê neh kong kup cèng gơs dĭ; bol khai rơp bơt bơtào wơl ală ƀòn dờng neh kong tơnroh mơ ơm tòm ală ƀòn dờng hơ̆. Bol khai rơp tam ală suơn ño mơ ñô tơrnòm gơ dê; bol khai rơp lơh suơn mơ sa plai gơ dê.

¹⁵ Añ rơp tam Israel tòm lơgar tòm bol khai dê, mơ bol khai rơp ò gơs tŭ lơi gơkòl dus tai, bơh di lơgar mơ Añ neh ai bol khai in.” Jehôwa Yàng Tom Trồ mê dê đơs behơ̆.