Amôs 7 - Sră Goh 2018

Bơta gơtơnggŏ Amôs dê ( 7:1 – 9:15 ) Srah nting, ồs mơ che rnoas bơt hìu

¹ Do la bơta mơ Jehôwa Yàng Tom Trồ neh sơnio añ in: Kơnràñ lơh gơs srah nting di di tŭ ñhơt sơntòm hòn wơl, hơ̆ la ñhơt hòn wơl tơnơ̆ mơ tŭ koh ñhơt bơtau dê.

² Tòm tŭ gơ neh sa jơh hir ñhơt tòm lơgar rau; añ hòi dan lah: “Ơ Jehôwa Yàng Tom Trồ, añ dan Kơnràñ toh glài! Mbe Jakôp rgơi ntào jai taih? Khai la dềt ngan!”

³ Behơ̆ Yàng Jehôwa tơmù nùs bơh bơta do, Yàng Jehôwa đơs lah: “Bơta hơ̆ rơp ò gơlik tus.”

⁴ Do la bơta Jehôwa Yàng Tom Trồ sơnio añ in: Jehôwa Yàng Tom Trồ neh hòi mìu ồs nàng lơh glài; gơ sa jơh thòng dờng jrô mơ sa jơh lơgar.

⁵ Gen añ hòi dan lah: “Ơ Jehôwa Yàng Tom Trồ, añ dan Kơnràñ ơm dơh wơl! Mbe Jakôp rgơi ntào jai taih? Khai la dềt ngan!”

⁶ Behơ̆ Yàng Jehôwa tơmù nùs bơh bơta do. Jehôwa Yàng Tom Trồ đơs lah: “Bơta hơ̆ kung rơp ò gơlik tus.”

⁷ Do la bơta Kơnràñ neh sơnio añ in: Yàng Jehôwa ntào di gah dô nơm dơrñang neh bơt song mơ che rnoas mơ trà, mơ tòm tê Kơnràñ at dô dang che rnoas mơ trà.

⁸ Mơ Yàng Jehôwa đơs mơ añ lah: “Ơ Amôs, ñchi mê gŏ taih?” Añ ho lah: “Añ gŏ dô dang che rnoas mơ trà. Gen Yàng đơs lah: Sền do, Añ dang dô nơm che rnoas mơ trà digùl làng bol Israel Añ jê; Añ rơp ò lòi rlau bol khai in tai.

⁹ Ală tiah jòng jơnhoa Isak dê rơp kòl tơnroh, mơ ală tiah sàng goh Israel dê rơp kòl lòi srau gòi, mơ Añ rơp at đào guh tòmdră mơ hìu Jerôbôam.”

Amôs mơ Amajiah

¹⁰ Gen Amajiah, cau gơnoar ơn phan duh khoai Betel dê, pơyoa jơnau đơs mơ Jerôbôam la bơtau Israel dê lah: “Amôs bơtào kai gơrmơ̆i tòmdră mơ bơtau tòm làm bă tiah digùl hìu Israel. Lơgar ò rgơi ơnòng jai jơh ală jơnau khai dê.

¹¹ Bơh do la ală jơnau Amôs neh đơs: ‘Jerôbôam rơp chơt bơh đào, mơ Israel pal kong kup cèng ngài bơh di lơgar tòm bol khai dê.’”

¹² Lồc behơ̆, Amajiah đơs mơ Amôs lah: “Ơ cau sền git lài, lòt tĕ! Dô ngài tĕ hơ lơgar Juda. Jòi tĕ piang lă mê in tềng hơ̆, mơ đơs hwơr tềng hơ̆.

¹³ Mơya bañ đơs hwơr tai tòm Betel; bơh do la tiah sàng goh bơtau dê, mơ la hìu duh khoai lơgar bơtau dê.”

¹⁴ Amôs ho wơl mơ Amajiah lah: “Añ ò di la cau gơnoar hwơr, kung ò di la dô nă kòn klau cau gơnoar hwơr dê; mơya añ la dô nă cau ê belàt, mơ añ kung rcang gàr niam ală chi ƀal brê.

¹⁵ Mơya Yàng Jehôwa neh tă añ bơh broă jat mpồl belàt, mơ Yàng Jehôwa đơs mơ añ lah: ‘Lòt tĕ đơs hwơr mơ làng bol Israel Añ jê.’

¹⁶ Gen tàng tŭ do, dan iat tĕ jơnau Yàng Jehôwa dê: Mê đơs lah: ‘Bañ đơs hwơr tòmdră mơ Israel, mơ bañ ai jơnau bơto tòmdră mơ hìu Isak.’

¹⁷ Gen tàng Yàng Jehôwa đơs be do: ‘Bau ùr mê dê rơp gơlik gơs dô nă ùr dri tòm ƀòn dờng; ală kòn klau mơ ală kòn ùr mê dê rơp gơpừ bơh đào; lơgar mê rơp kong was mơ tòmpà gơs oă pơnah, ai să tòm mê rơp chơt tòm dô nơm lơgar ò goh, mơ Israel ngan rơp kong kup cèng pơrdô bơh di lơgar tòm bol khai dê.’”